(Scottish စာရေးဆရာ George Mackay Brown (1921-1996) ရဲ့ The Story of Jorkel Hayforks ကို စိတ်ကြိုက်ဘာသာပြန်ဆိုပါသည်။)
(က)
နွေလယ်မရောက်ခင် တစ်ပတ်လောက်အလိုပေါ့။ ဂျော်ကဲနဲ့ ရွာသားလူငယ်လူရွယ်ခြောက်ယောက် နော်ဝေရဲ့တနေရာ ဘာဂျမ်ရွာမှသည် ရွက်လွှင့်လို့ ခရီးစချီခဲ့ပါတယ်။ အော့ကနေအရပ်က ဝှိုင်ဆိုတဲ့ ကျွန်းကြီးဆီပေါ့။ လေကလည်းကောင်းတယ်။ အနောက်ဘက်ကို ရွက်တိုက်လာလိုက်တာ နှစ်ရက်ကြာတော့ ရှတ်လန်းဒေသက ဝေါလ်ဆေးရွာကိုရောက်ပြီး ကမ်းကပ်လိုက်တယ်။ အဲဒီက လယ်သမားတစ်ယောက်က သူတို့ကို တော်တော်လေး ဧည့်ဝတ်ကျေကျေပြုစုတယ်။ ညနေစာအပြီး နည်းနည်းသောက်စားကြပြီးတဲ့နောက်မှာတော့ သူတို့နော်ဝေသားတွေထဲက ဖင်းဆိုတဲ့တစ်ယောက်က စောင်းကောက်တွေ ဘာတွေ ထတီးပြီး ကဗျာတွေဘာတွေ ကောက်ရွတ်တော့တာပဲ။
ဖင်း ကဗျာရွတ်ပြီးတာနဲ့ အိမ်ရှင်ရဲ့ သမီးက သူ့အဖေကို ကပ်ပူဆာပါတော့တယ်။ မြင်းတစ်ကောင်နဲ့ မြေတစ်ကွက်ပေးပြီး ဖင်းကို ဒီရွာမှာနေခဲ့အောင် ဆွဲထားဖို့လေ။
အိမ်ရှင်ကလည်း သူ့သမီးအလိုကိုလိုက်တယ်။ ဒါပေမယ့် ဖင်းပြန်ပြောလိုက်တာက “ကျုပ်တို့ ခု သိပ်အရေးကြီးတဲ့ ကိစ္စတစ်ခုနဲ့ အော့ကနေ ကိုသွားနေတာ။ မနက်အစောကြီးထရွက်လွှင့်ရမှာ။ ကျုပ်ဒီမှာနေလို့ မဖြစ်ဘူးဗျ။”
အိမ်ရှင်လည်း သူ့သမီးကို ပြန်ပြောပြရတာပေါ့။
သန်းခေါင်တိုင်ပြီ။ လူငယ်တွေကတော့ မီပုံဘေးမှာ သောက်ကောင်းတုန်းအချိန်။ ကောင်မလေး နိုးလာပြီး အိပ်ယာထဲက ထွက်လာတယ်။ အိမ်ရှင်ဖြစ်သူ ဖအေကို တစ်ခါထပ်ပူဆာပြန်တယ်။ “သမီးတော့ အိပ်မရတော့ဘူး အဖေရယ်။ ဖင်းကို ရွှေလက်ပတ်နဲ့ ငွေလက်စွပ်ပေးမယ်ဆိုပြီး ပြောကြည့်ပါ။” အိမ်ရှင်ကြီးက ဖင်းကို တစ်ယောက်တည်းခေါ်ပြီး ပြောပြတယ်။ ဒီတစ်ခါ ဖင်းပြန်ပြောလိုက်တာက “ကျုပ်က ဆင်းရဲသားပါ။ ပြီးတော့ ပေါ့ပေါ့ပါးပါးပဲ နေတတ်တယ်။ မိန်းမနဲ့ ရွှေဆိုတာ ကျုပ်ကို ကဗျာရေးမရအောင် လုပ်မယ့်ဟာတွေပါ။ ပြီးတော့ ဒီနွေလယ်ရာသီမှာ အော့ကနေရောက်အောင် သွားဖို့ အရေးကြီးကိစ္စ ရှိတယ်ဗျ။”
အိမ်ရှင်လည်း သူ့သမီးကို ပြန်ပြောပြရတာပေါ့။
အရုဏ်တက်ပြီ။ မောင်ရင်တွေ သောက်ကောင်းတုန်း။ ဗျစ်အရက်စည်တွေကတော့ ဗလာကျင်းနေပြီ။ တစ်ချို့လည်းမီးပုံဘေးထိုင် တစ်ချို့လည်း ခုံတန်းအောက်လဲ။ ဒါပေမယ့် ဖင်းကတော့ အဲဒီရွာကလူတွေနဲ့ ကဗျာ့စည်းဝါးအကြောင်း ဆွေးနွေးကောင်းတုန်း။
“အာမစိုတော့လို့ဗျာ။ နို့မဟုတ်ရင် ကျူပ်ကောင်းကောင်းကြီး ပြောပြနိုင်တယ်။”
သိပ်မကြာပါဘူး။ အိမ်ရှင်ကောင်မလေး ရောက်လာပြီး ဖင်းကို ဗျစ်ရည်တစ်ခွက်ပေးတယ်။ ဖင်းခများ သောက်ချလိုက်တုန်းသူ့မုတ်ဆိတ်မွေးပေါ်ပေသွားတဲ့ အမြုပ်ကလေးတွေတောင် သေအောင် မစောင့်နိုင်ဘဲ မေးလိုက်တာက။
“ဒါကို မင်းကိုယ်တိုင် စပ်တာလား ကောင်မလေး။”
“ကျွန်မတစ်ယောက်တည်း ကိုယ်တိုင်စပ်တာလေ။”
“ဒါဆိုရင်တော့ ဒါမျိုးနည်းနည်းဆက်သောက်ဖို့အတွက် မင်းတို့ရှတ်လန်းမှာ ကျုပ်ခဏတစ်ဖြုတ်တော့ ဆက်နေဦးမယ်။”
နေထွက်တော့ နော်ဝေသားတစ်သိုက် ကသုတ်ကရက်ထကြပြီး ဆက်ရွက်လွှင့်ဖို့ ထွက်ကြတယ်။ ဖင်း တစ်ယောက်ကတော့ ပျောက်နေလေရဲ့။ အိမ်ရှင်ကောင်မလေးရဲ့ အခန်းကလည်း တံခါးပိတ်လျက်သား။ ခေါင်းဆောင်လူငယ် ဂျော်ကဲ သိပ်စိတ်ဆိုးတာပေါ့။
ဆက်ပြောရရင်တော့ ဖင်းတစ်ယောက် အဲဒီနေ့ကစလို့ ဘယ်တော့မှ ကဗျာမရေးတော့ဘူး။ အိမ်ရှင်ကောင်မလေးလည်း ကလေးတွေ တစ်ယောက်ပြီးတစ်ယောက် မွေးလိုက်တာ ဆယ့်နှစ်ယောက်ရ ဆိုလား။ ဆံတစ်ချောင်းမှ မဖြူ ခင်ဘဲ ဖင်းသေသွားတယ်။ အဲဒီ ရှတ်လန်းမှာပဲ သေတဲ့အထိ နေသွားတယ်ဆိုပါတော့။ သေတဲ့အထိ သောက်လို့ချည်းနေသွားသတဲ့။ သူ့မိန်းမတိုက်မှ သောက်သတဲ့။ ကဗျာလက်စလက်န သိပ်ကောင်းတဲ့ သူတစ်ယောက်ဟာ အဲသလို တကယ့်သာမာန်ဘဝနဲ့ လမ်းဆုံးသွားခဲ့ပါတယ်။ ဂျော်ကဲကတော့ ပြောလေရဲ့။
“အဲဒီ ခွေးမ။ အဲဒီ ခွေးမ ဖင်းကို ပြုစားတာ။”
(ခ)
ဖင်း ရှတ်လန်းမှာ ကျန်ခဲ့ပြီး တခြားသူတွေ ဆက်ထွက်လာခဲ့ပါတယ်။ အဲဒီ နေလည်ခင်းမှာပဲ ကျွန်းသာယာကို ရောက်တယ်။ တောင်စောင်းမှာ သိုးတစ်အုပ်ကို သူတို့ ရွက်သင်္ဘောပေါ်က လှမ်းမြင်တယ်။ သူတို့ထဲမှာ ဖလန်းဆိုတဲ့သူက နော်ဝေမှာတော့ ပန်းပဲဆရာပေါ့။ သူက ပြောတယ်။ ဒါ သိပ်ကောင်းတဲ့ သိုးတွေတဲ့။ သူပြန်ရင် သူ့မိန်းမကလည်း လက်ဆောင်မျှော်နေမှာဆိုတော့ လက်ဆောင်ပေးဖို့ သိုးတစ်အုပ်ဖမ်းမယ်ဆိုလေရဲ့။
ဘယ်သူမှတောင် တားမမီလိုက်ဘူး။ ခုန်ဆင်းပြီး ရေးကူးချသွားတယ်။ သိုးတွေက ချောက်ကမ်းပါးတောင်စောင်း ခပ်စောက်စောက်တွေမှာ မြက်စားနေတာ။ ဖလန်းက ကုတ်ကပ်တက်သွားပြီး နီးရာသိုးတစ်ကောင်ဖမ်းဆွဲတယ်။ နားနေတဲ့ ငှက်တွေလည်း ရုတ်ရုတ်သဲသဲ ထပြန်ကြတာပေါ့။ သူလည်း သိုးတစ်ကောင်ကို ပါလာတဲ့ ပုဆိန်နဲ့ ခုတ်ဖို့ အပြင် တခြားသို့တစ်ကောင်က ကြောက်ကြောက်လန့်လန့်နဲ့ သူ့ပေါင်ခွကြားကို ပြေးကြုံးထည့်လိုက်တာ။
ဂျော်ကဲ မချိတင်ကဲ ရေရွတ်တယ်။ “ဒီကောင် တက်တုန်းကမှကြာသေး။ ပြန်ကျတော့ တစ်ချက်ပဲ။ ပန်းပဲသမားဗျာ သိုးအကြောင်း ဘာတစ်လုံး သိမှာလဲ။”
အဲဒီညကတော့ အဲဒီ ကျွန်းသာယာရဲ့ ချောက်ကမ်းပါးအောက်မှာ သူတို့ ရွက်ချနားကြပါတယ်။
(ဂ)
အရုဏ်တက်တော့ ကျွန်းသာယာက ခွာကြတယ်။ အော့ကနေဘက်ကို သွားရတာ တော်တော်ခက်လာပါတယ်။ အရှေ့ဘက်က အဆန်လေကလည်း ထန် မှုန်မှိုင်းပြီး အေးစိမ့်နေတာပဲ။ မနားတမ်း အသည်းအသန် လှော်နေခတ်နေရတယ်။ အဲဒီ အချိန်မှာပဲ သူတို့ထဲက တစ်ယောက်။ ဆွစ်ဇာလန်မှာ လယ်တွေဘာတွေ ရှိတဲ့ မွန်း။ ဒီကောင်က လှော်တက် ဘေးချပြီး နေနေတယ်။
“လယ်ထဲမှာဆိုရင်တော့ နက်နက်ထွန်ရင် ထွန်သလိုနက်မယ်ဆိုတာ သေချာတယ်။ ခင်ဗျားတို့ အခုဟာက နက်နက်တွန်းလှော်လို့ရော ထိထိရောက်ရောက် ရှိပါတော့မလား”
ကျန်တဲ့သူတွေကတော့ အားသွန်လှော်တုန်းပဲ။
“ပြီးခဲ့တဲ့ တစ်နှစ်နွေက ဂရက်တီယာ သေမလို လဲနေတုန်းကလေ သူ့မျက်နှာကြီးက ဖွေးဆုတ်နေတာပဲ။ ကျုပ်မျက်နှာရော အခု အဲဒီ အရောင်ထွက်နေပြီလား။”
ဂျော်ကဲက “မင်းမျက်နှာကတော့ စိမ်းစိမ်းကြီး။” လို့ပြောရင်း ကျန်တဲ့သူတွေကိုပဲ ညာသံပေးနေရတယ်။ မွန်းက တစ်ချက် ဝင်မလှော်တော့ဘူးကိုး။
နေ့ခင်းအချိန်ပိုင်းရောက်လာတော့ မွန်းကပြောတယ်။ “ကျုပ်က ခုလို နွေလယ်ရာသီတွေဆို အမြဲ ပျော်နေတတ်တဲ့သူပါ။ ဒါပေမယ့် ဒီနှစ် နွေလယ်မီးပုံပွဲမှာတော့ ကျုပ် မီးပုံပတ်လို့ မကနိုင်လောက်တော့ပါဘူး။”
သူကလွဲလို့ အားလုံးကတော့ ကုန်းရုန်းလှော်ခတ်နေဆဲ။ လေကလည်း မြောက်ကို ယိမ်းပြီး အနေတော်လောက် ပျော့ကျသွားတယ်။ ဒီတော့မှ သူတို့ ယုန်တစ်ကောင်ကို ပြုတ်ချက်ချက်ပြီး ဗျစ်ရည်တစ်စည် ဖွင့်လိုက်တယ်။ မွန်းဆီကို အစားအသောက်နဲ့ ဗျစ်ရည် ယူသွားပေးချိန်မှာတော့ မွန်းဟာ လှေလှော်တဲ့ ထိုင်ခုံကိုမှီလို့ အေးစက်တောင့်တင်းနေလေရဲ့။
ဂျော်ကဲကပြောတယ်။
“မွန်း။ မင်း ညစာ တောင် စားမသွားတော့ဘူးပေါ့ကွာ။”
(ဃ)
သိပ်မကြာခင်ဘဲ သူတို့ ပါပါဝက်စထရေးကို ရောက်တယ်။ အဲဒီ ကျွန်းက လယ်မြေကောင်းကောင်းတွေလည်း ရှိတယ်။ ကမ်းရိုးတန်းနားမှာ ဗျစ်ရည်ဆိုင်လည်း ရှိတယ်။ ခေါင်းတုံးထားတဲ့ ဘုန်းကြီး ၁၂ ပါးနေတဲ့ ဘုရားကျောင်းကလေး တစ်ကျောင်းလည်း ရေကန်ကြီးနားမှာ ရှိတယ်။ ကျွန်းသူ ကျွန်းသားတွေက သူတို့ကို ဖော်ဖော်ရွေရွေ ကြို ကြပါတယ်။ ငါးတွေ အသားတွေ ရောင်းတယ်။ ရေ ကောင်းကောင်း ရမယ့် နေရာကိုလည်း ပြပေးတယ်။
ညနေပိုင်း ဝတ်ပြုဖို့အတွက် ဘုရားကျောင်းထဲကို ဘုန်းတော်ကြီး ၁၂ ပါး ဝင်သွားကြတယ်။
ဂျော်ကဲတို့ နော်ဝေသားတစ်စုကတော့ စားစရာ သောက်စရာတွေ ဝယ်လို့ ခြမ်းလို့ပြီးတာနဲ့ ဗျစ်ဆိုင်ကို သွားကြတယ်။ စည်တစ်လုံးထဲက ဗျစ်ရည်တွေ မကုန်မချင်း သောက်ကြ အော်ကြ ဟစ်ကြ ဆိုကြ မြူးကြပေါ့လေ။ ဆိုင်ရှင်က နောက်ထပ် ဗျစ်စည်တစ်လုံး ဖွင့်တဲ့အချိန်မှာတော့ သူတို့ထဲက သော့ထ် တစ်ယောက် ပျောက်နေတာကို ဂျော်ကဲ သတိထားလိုက်မိတယ်။
ဆွင်းကတော့ “ဒီကောင် ဝက်စထရေးရွာထဲက မိန်းမတွေ သွားမြာတာနေမှာပေါ့” လို့ မှန်းပြောပါတယ်။ ရွာမှာဆိုလည်း သော့ထ်က မြာပွေတဲ့နေရာမှာ နာမည်ကြီး။
ညနေပိုင်း ဘုရားဝတ်ပြုပြီးလို့ တီးလိုက်တဲ့ ခေါင်းလောင်းသံက ဗျစ်ဆိုင်လေးဆီအထိ ရောက်ပါတယ်။
ဗျစ်ဆိုင်ထဲမှာတော့ နောက်တစ်စည် တစ်ဝက်ကျိုးလုမှာ အချင်းချင်းတွေ ထ ဆော်ကုန်တီးကုန်ကြပြီ။ သိပ်တော့ပြသ*နာမရှိပါဘူး။ အကုန်လုံးက လွန်လွန်ကျွံကျွံမူးနေကြတာဆိုတော့ ဒဏ်ရာရလောက်အောင် နာအောင် ကျင်အောင်မလုပ်နိုင်ကြတော့ပါဘူး။ သော့ထ်ကတော့ ပျောက်နေတုန်းပဲ။
ဗော့တ်ကလည်း သူထင်တာပြောတယ်။ “လမ်းမှာ အပြောင်းအလဲလေး စားရသောက်ရအောင် ထောပတ်တွေ ကြက်ဥတွေ လိုက်ခိုးနေတာ နေမှာပေါ့။” နော်ဝေတောင်ပိုင်း တောင်ကုန်းဒေသတွေမှာက အေးလွန်းလို့ ညဆို အကုန်အိမ်ထဲစုနေပြီး မီးဖိုထားရတယ်။ အပြင်မှာ လရောင်က မရှိတတ်ဘူး။ အဲဒီဒေသမှာ သော့ထ်က ခိုးတတ် ဝှက်တတ်တာလည်း နာမည်ကြီးတယ်လေ။
မနေ့က လက်ကျန်အလင်းရောင်နဲ့ မနက်ဖြန်ရဲ့အဦးအစအလင်းရောင်တို့ ဆုံကြတဲ့ အာရုဏ်ကာလတစ်ခုအထိ သူတို့သောက်ကောင်းတုန်း။ ပန်းကလည်းပန်း မူးကလည်းမူးဆိုတော့ ဘာမှ သိပ်ကောင်းကောင်းမသိကြတော့ဘူး။
“ဒီခရီးက ထူးဆန်းတယ်။ တစ်နေရာမှာ တစ်ခါနားတိုင်း တို့အုပ်စုထဲက တစ်ယောက်လျှော့နေတယ်။”
ဂျော်ကဲ အဲသလိုပြောနေတုန်းမှာပဲ ဘုရားကျောင်းဆီက ခေါင်းလောင်းသံကြားရတယ်။ သူ ဆိုင်တံခါးဘက်လျှောက်သွားပြီး ဘုရားကျောင်းဘက်ကို မျှော်ကြည့်လိုက်တယ်။ ဘုရားကျောင်း အဝင်မုခ်ဦးဘက်မှာ မနက်ခင်း ဓမ္မတေးကို ဆိုဖို့ စီတန်းသွားနေတဲ့ ဦးခေါင်းဆောင်းဘုန်းတော်ကြီးပုံရိပ်တွေကို သူ ရေကြည့်လိုက်တော့ တစ်ဆယ့်သုံးယောက် ဖြစ်နေခဲ့ပြီ။
ဗျစ်အရက်စည်နားကို ပြန်လာရင် သူ့အဖော်တွေကို ဂျော်ကဲ ပြောလိုက်တာက
“သော့ထ် တစ်ယောက် သောက်တာ ခိုးတာ မိန်းမပွေတာတွေကို နောင်တရ စိတ်ကုန်သွားတာ ထင်တယ်ကွ။ မနေ့က ငါ သတိထားမိတာ ဘုန်းကြီး ၁၂ ပါးပဲ ရှိတာ။ အခု ၁၃ ပါး ကွ။”
ပြောပြီးတော့ သူ့အဖော် ဗော့တ်နဲ့ ဆွင်းနား လှဲရင်း မနက်ခင်းကြီး သူတို့ အိပ်ပျော်သွားကြပါတယ်။ အခုတော့ သူတို့ သုံးယောက်ပဲ ကျန်တော့တာပေါ့လေ။
ဖင်း ရှတ်လန်းမှာ ကျန်ခဲ့ပြီ။
ဖလန်း ချောက်ထဲကျ သေသွားပြီ။
မွန်းတစ်ယောက်ကတော့ လှေပေါ်မှာ အအေးပတ် သေသွားပြီ။
သော့ထ်ကလည်း သူတို့ကို ထားရစ်ခဲ့ပြီဆိုပါတော့။
(င)
“ဒီတစ်ခါတော့ ဝှိုင်မရောက်မချင်း ငါတို့ မနားတော့ဘူးဟေ့။ တစ်ခါနားရင် ပြသ*နာတစ်ခုတက်တယ်။”
ပင်လယ်ထဲစီးဝင်တဲ့ မြစ်ဝတွေနား။ ကျွန်းသေးသေးလေးတွေ ကြားမှာ သူတို့ ရွက်လွှင့်နေတာပေါ့။ တကယ်တော့ သူတို့ အော့ကနေနယ်ထဲကိုလည်း ရောက်နေပါပြီ။ ဒါပေမယ့် ဝှိုင်ကျွန်း ဘယ်နားမှာဆိုတာ သူတို့ တိတိကျကျမသိဘူး။
အဲဒီ အချိန်မှာပဲ ဆွင်းက ပြောတယ်။
“ဟေ့။ ဟိုကျွန်းလေးပေါ်မှာ လူတစ်ယောက်ကွ။ မျက်နှာဖုံး အစွပ်တွေ အကာတွေနဲ့ ပျားဖွပ်နေတာပဲ။ ငါ ကမ်းပေါ်တက်ပြီး သူ့ကို မေးကြည့်လိုက်မယ်လေ။ ဝှိုင်ကို ဘယ်လို ဆက်သွားရမလဲလို့။”
ဂျော်ကဲက “သတိလည်း ထားဦးနော်။ ငါနဲ့ ဗော့တ် နှစ်ယောက်တည်းဆို ဝှိုင်ကို ဆက်သွားရတာ တော်တော်ကသီမှာကွ။”
ဆွင်းလည်း ရေကိုဖြတ်ကူး ဟိုဘက်ကမ်းကို တက်ပြီး ပျားဖွပ်သမားကို ဝှိုင်သွားဖို့လမ်းပြပါဦး သွားပြောပါတယ်။ ပျားဖွပ်သမားက တော်တော်ယဉ်ကျေးပါတယ်။ မျက်နှာဖုံးတွေ ဘာတွေချွတ်ပြီးမှ ယဉ်ယဉ်ကျေးကျေးပြန်ဖြေတယ်။
“တောင်ဘက်ကို ရွက်လွှင့်သွားလိုက်ဗျ။ အဲဒါဆို ခုလို ကမ်းနားမဟုတ်ဘဲ ကျွန်းတွေ ဘာတွေ မရှိတဲ့ ပင်လယ်သက်သက်ဆီ ရောက်သွားမယ်။ တစ်ဖက်က ကမ်းရိုးတန်းကြီးက ဟော်ဆေးပေါ့။ အဲဒီ ကမ်းရိုးတန်းအတိုင်း တောင်ဆီကိုသာ ဆက်ရွက်လွှင့်။ တော်တော်ဝေးဝေးကြီးကကို ခင်ဗျားတို့ ကြိုမြင်ရပါလိမ့်မယ်။ ပင်လယ်ထဲက တောင်နှစ်လုံးပေါက်နေသလိုမျိုး။ အဲဒါ ဝှိုင်ကျွန်းပဲ။”
“ကျေးဇူးတင်ပါတယ်ဗျာ။ ဒါနဲ့ ပျားရည်တော်တော်ရသလားဗျ။”
“ဒီနှစ်က သိပ်တော့ မကောင်းဘူးဗျ။ ရာသီဥတုမကောင်းသလိုပဲ ပျားတွေလည်း မသာယာကြဘူးလေ။ ဒါပေမယ့် ဘာဖြစ်ဖြစ် မိတ်ဆွေတို့နဲ့ ကြုံတိုင်း အခုတစ်ခါရမယ့် ပျားအုံကိုတော့ လက်ဆောင်ပေးလိုက်ပါရစေ။”
“အားနာလိုက်တာဗျာ။ ဘယ်လို ကျေးဇူးတင်ရမလဲတောင် မသိတော့ဘူး။”
ပျားဖွပ်သမားလည်း ပြောပြောဆိုဆို ပျားအုံဘက်ပြန်လှည့်ပြီး သူ့အလုပ်သူဆက်လုပ်နေပါတယ်။ အဲဒီ အချိန်မှာပဲ ပျားဖွပ်သမားရဲ့ ကုတ်ပိုးက လွတ်နေတဲ့နေရာပေါ်ကို ပျားတစ်ကောင်လာနားတယ်။ ပြီးတော့ သူ့ကို တုပ်ချလိုက်တော့ ပျားဖွပ်သမားလည်း ထ အော်ပါတယ်။ ပျားကောင်ကိုလည်း သပ်ချ ဖယ်ချရင်းပေါ့။
ဆွင်းလည်း ပျားကောင်ကို ဝင်ဒေါသထွက်ပြီး လက်ထဲပါတဲ့ ပုဆိန်နဲ့ ပျားအုံကို ဝင်ခုတ်ချလိုက်တယ်။
ဂျော်ကဲနဲ့ ဗော့တ်တို့ လှမ်းမြင်နေရတာပေါ့။ ပျားကောင်တွေ အုပ်လိုက်ကြီး သူတို့ရဲ့ အသိုက်ကို ဖျက်ဆီးတဲ့ အကာအကွယ်မဲ့ ဆွင်းနောက် မဲခဲနေအောင် လိုက်ကြတာ။ ဆွင်းတစ်ယောက် ပုဆိန်ကိုင်ပြီး ပင်လယ်ကမ်းစပ်ဆီ ပြေးတာ။ အော်လိုက်တာလည်း ဆူညံလို့။ ကျောက်တုန်း ချွန်ချွန်တွေနဲ့ အထိုးခံရသလိုပဲ နေမှာပေါ့။
ပင်လယ်အစပ်ရောက်တော့ သူ့ကိုယ်သူ ရေညှိတွေနဲ့ ဖုံးထားလိုက်တယ်။ ဗော့တ်နဲ့ ဂျော်ကဲ သူ့နားရောက်တော့ ဝှိုင်ကို ဘယ်လို သွားရမယ်ဆိုတာကို သူပြောပြလိုက်နိုင်ပါတယ်။ ပြီးတဲ့အချိန်မှာတော့ သူတကိုယ်လုံး ပြာနှမ်းတက်လာပြီး အဲဒီနေရာမှာပဲ ဆွင်းသေဆုံးသွားခဲ့ပါတယ်။
(စ)
ဂျော်ကဲနဲ့ ဗော့တ် ဝှိုင်ကျွန်းပေါ်က သီဘူး ဆိုတဲ့ စိုက်ခင်းကြီးမှာ မြင်းဝင်ဝယ်ပြီး ခရီးဆက်ကြပါတယ်။ တကယ်တော့ သူတို့ သွားမယ့်နေရာက ဒီ ဝှိုင်ကျွန်းကြီးပေါ်က တောင်နှစ်လုံးရဲ့ကြားမှာ ရှိတဲ့ ရက်ခ်ဝစ်ခ်ဆိုတဲ့ စိုက်ခင်းကြီးပါ။ သူတို့ ရောက်သွားကြတော့ ဟိုးတစ်နေရာ ဟိုးတစ်နေရာ လယ်ထဲမှာ အလုပ်လုပ်နေကြတဲ့သူတွေထဲက သူတို့နဲ့နီးတဲ့ လယ်သမားငါးယောက်အုပ်စုဆီ ဦးတည်လျှောက်သွားလိုက်တယ်။ နေသာပြီး နည်းနည်းပူတဲ့နေ့လည်း ဖြစ်တော့ ဒီလူတွေမှာ ချွေးတွေသံတွေနဲ့ပေါ့။
ဂျော်ကဲက မေးလိုက်တယ်။
“ခင်ဗျားတို့ အာကောလ်ကို သိလား။”
“ကျုပ်တို့ရဲ့ အလုပ်သမားခေါင်းဆောင်ပါ။ ဒါပေမယ့် သူက အိပ်ရာထ နောက်ကျတယ်။”
နောက်အလုပ်သမား တစ်ယောက်က
“သူက ညပိုင်း အလုပ်လုပ်တာများတာ။ ကျုပ်တို့က နေ့ပိုင်းလုပ်တဲ့သူတွေ။”
နောက်တစ်ယောက်ကတော့
“မြာအင်မတန် စွံတဲ့သူဗျို့။ သူ့ဆိုရင် မိန်းမတိုင်း ပစ်ကျကြတာပဲ။”
ဒါဆိုရင်တော့ ဂျော်ကဲ သေချာသွားပါပြီ။ သူတို့ ရှာနေတဲ့ကောင်ပဲ။
အလုပ်သမားတွေက သူတို့ကို ခေါ်ပြီး အရိပ်ရတဲ့ စည်းရိုးတစ်ခုနားထိုင်ခိုင်းထားတယ်။ ပေါင်မုန့်တွေ ဗျစ်ရည်တွေနဲ့လည်း ဧည့်ခံထားတယ်။ ဗော့တ်ကလည်း လမ်းမှာ ဖြစ်ခဲ့သမျှ ပြန်စဉ်းစားအောက်မေ့ရင်း ပြောပြနေတယ်။ ဂျော်ကဲကတော့ စကားလည်းသိပ်မပြော ဘာမှလည်း သိပ်မစားဘူး။
ပြောစရာစကားကုန်တော့ ဒီလယ်မြေတွေကို ဘယ်သူပိုင်တာလဲလို့ ဗော့တ်ကမေးလိုက်တယ်။ လယ်သမားတွေက မြေပိုင်ရှင်နာမည်က ဂျွန်လို့ ပြောတယ်။ သူတို့ အလုပ်ရှင်က အင်မတန်ကောင်းကြောင်းတွေ အမွှန်းတင်ပြောပြကြတယ်။
အဲဒီ အချိန်မှာပဲ လယ်ထဲကို လူတစ်ယောက်ရောက်လာတယ်။ အလုပ်သမားတွေကို အလုပ်ဆက်လုပ်ကြဖို့ လိုက်အော်နေတယ်။ သူတို့နားရောက်တော့ ဗော့တ်နဲ့ ဂျော်ကဲကို မသင်္ကာသလိုကြည့်နေတယ်။ သူတို့ နှစ်ယောက်ကလည်း ခုနှစ်ရက်တစ်ပတ်လောက် ရွက်လွှင့်လာရတာဆိုတော့ ခပ်စုတ်စုတ်ဖြစ်နေတာကိုး။
ဂျော်ကဲက လှမ်းမေးလိုက်တယ်။
“ခင်ဗျားလား။ အာကောလ် ဒဂ်ဆန်ဆိုတာ။”
ဟိုလူကလည်း စိတ်မပါ လက်မပါ ဖြေချင်သလို မဖြေချင်သလို သမ်းလိုက် ဝေလိုက်ရင်း
“ဟုတ်တယ်။ ကျုပ်ပဲ။ ဘာလို့လဲ။”
“အေး။ ကျုပ်နာမည် ဂျော်ကဲ။ ဘာဂျမ်ရွာက။ အင်ဂီရစ်ကိုတော့ ခင်ဗျားသိမှာပေါ့။ အဲဒါ ကျုပ်ညီမပဲ။ ဒီ ဂျွန်လထဲမှာပဲ သူ သားလေးတစ်ယေက်မွေးတယ်။ အဲဒါ ခင်ဗျား ကလေး။”
အာကောလ်က ဘာမှ ပြန်မပြောဘူး။ အပျင်းတောင် တစ်ချက်ဆန့်လိုက်သေးတယ်။ ပြီးတော့ ဟက်ခနဲ တစ်ချက် ရယ်လိုက်တယ်။ ဂျော်ကဲလည်း ပြောစရာရှိတာ ဆက်ပြောရတယ်။
“ဒီတော့ ကျုပ်ပြောချင်တာက ခင်ဗျားကလေး။ ခင်ဗျားမှာ တာဝန်ရှိတယ်။ ဒီတော့ ဒီကလေးစရိတ် ကလေးတာဝန်ကို ခင်ဗျားယူမလား မယူဘူးလား။ ဒါ ကျုပ်သိချင်တယ်။”
“ဒါ ကျုပ် ကိုယ်ရေးကိုယ်တာ ကိစ္စဗျ။ ခင်ဗျားတို့လို ဘယ်ကပေါက်ချလာမှန်းမသိတဲ့ လူနှစ်ယောက်နဲ့ ပြောဆိုနေစရာ အကြောင်းမရှိဘူး။ ပြီးတော့ ကျုပ်တစ်သက်လုံး ကျုပ်နဲ့ရတဲ့ ကလေးမို့ ကလေးစရိတ်ခံတယ်ဆိုတာ ထုံးစံမရှိခဲ့ဘူး။ ခင်ဗျားနှမနဲ့ကျမှ ထူးပြီး စရိတ်ခံစရာလား။ ဒီလောက်အဝေးကြီးက မိန်းမနဲ့ ကလေးကိုများ။”
ဂျော်ကဲ ဒေါသတွေနဲ့ တဆတ်ဆတ်တုန်လာပါတယ်။ အာကောလ်ကတော့ အေးဆေးဆက်ပြောနေတယ်။
“ပြီးတော့ ခင်ဗျားတို့ ပုံစံတွေနဲ့ အင်ဂီရစ်နဲ့ စပ်ဆက်ကြည့်လို့ကို မရဘူး။ အင်ဂီရစ်က သိပ်ချစ်စရာကောင်းတဲ့ မိန်းမ။ ပြီးတော့ သိပ်နိပ်တဲ့ မိန်းမဗျ။ ဟားဟား။ ဒါပေမယ့် ကျုပ်အခုလည်း မအားရပါဘူးဗျာ။ သိပ်နိပ်တဲ့ မိန်းမတွေက နေရာတိုင်းမှာ ရှိနေသကိုး။.ဒီတော့ ညက ကျုပ်အိပ်ရေးပျက်ထားတယ်။ ခင်ဗျားတို့ လစ်တော့။ ကျုပ်လည်း သွားလိုက်ဦးမယ်။”
“ဟေ့ကောင်။ မင်း ငါ့ညီမရဲ့ ကလေးအဖေ တာဝန်ကို ယူမှာလား မယူဘူးလား။”
အာကောလ်က အသမ်းမပျက် လှည့်ထွက်သွားတယ်။
ဂျော်ကဲရဲ့ ဆောင်ဓါးဟာ အာကောလ်ရဲ့ လည်မျိုတည့်တည့်ဆီ ကွက်တိ။ တစ်ချက်ပဲ။ အာကောလ် မြေကြီးပေါ်လဲကျပြီး ဆန့်သွားတယ်။
(ဆ)
လယ်ထဲ အနှံ့ ဟိုနေရာ ဒီနေရာက အလုပ်သမားတွေ အကုန်လုံး ထလာကြတယ်။ ကောက်ရိုးထုံးတွေကြား အိပ်နေနားနေတဲ့ အလုပ်သမားတွေရောပဲ။ လက်ထဲမှာလည်း ခက်ရင်းခွတွေ ကောက်ဆွတွေ ကိုင်လို့။
“ဟိုကောင်တွေ ရှိရင် ဘယ်လောက် ကောင်းလိုက်မလဲ။” ဂျော်ကဲ သူ့အဖော်တွေကို တ မိပါတယ်။
ဂျော်ကဲကြံ့ကြံ့ခံ ကာကွယ်တယ်။ ဗော့တ်ကတော့ ခက်ရင်းခွစာမိပြီး နေရာတင်ပဲ ပွဲချင်းပြီးသွားပြန်ပြီ။ ရန်ပွဲကို ထိန်းပေးခဲ့တဲ့ လယ်ပိုင်ရှင် ဂျွန်ဆိုတဲ့သူ ရောက်လာချိန်အထိ ဂျော်ကဲ ခံချနိုင်ခဲ့တယ် ဆိုပါတော့။ ဒါပေမယ့် ဒဏ်ရာတွေကတော့ တော်တော်ပြင်းတယ်။ တစ်ပတ်လောက် အိပ်ရာထဲလဲ ကုယူလိုက်ရတယ်။
ဂျော်ကဲကို ပြုစုဖို့ လယ်သူမလေး သုံးယောက်ထားပေးတယ်။ ရေပူရေချမ်းကမ်းလို့ ဆေးလိမ်းစရာရှိလိမ်းပေး ပြုစုပေးပေါ့လေ။ နောက်ဆုံးပတ်တီးခွာတဲ့နေ့မှာတော့ ဂျွန်ရောက်လာတယ်။
“ကျုပ်ဆီက အလုပ်သမားခေါင်း အာကောလ်အကြောင်း ကျုပ်သိပါရဲ့။ မိန်းမပွေတဲ့အတတ်မှာတော့ ဟောဒီ ကျုပ်တို့အော့ကနေ နယ်စားလောက် ခင်ဗျားတို့ နော်ဝေဘုရင်လောက်နဲ့တော့ သူ့အရှူ ပ်ထုပ်က ရှင်းမရဘူး။ ဒါပေမယ့် ဘာပဲဖြစ်ဖြစ် သူက ကျုပ်အတွက်တော့ အင်မတန် တန်ဖိုးရှိတဲ့ ဝန်ထမ်းပါ။ ဒီတော့ကာ ကမ်းကပ်ထားတဲ့ ခင်ဗျားသင်္ဘောကို ကျုပ်အတွက် နစ်နာကြေးအနေနဲ့ ကျုပ် သိမ်းရလိမ့်မယ်။ ခင်ဗျားလည်း ကောက်ဆွနဲ့ အထိုးခံ အခုတ်ခံထိထားလိုက်တာ အခု ဒုက္ခိတနီးနီး ဖြစ်နေပြီ။ ခင်ဗျား ဝှိုင်မှာ ပျော်သလောက်နေနိုင်တယ်။ ဒီဘက်တောင်စောင်းမှာ ခြံလွတ်ကလေးရှိတယ်။ နို့စားနွားမတစ်ကောင် ခိုင်းနွားတစ်ကောင်လောက်နဲ့ သိုးလေးဘာလေး မွေးလို့ရမယ်။ ခင်ဗျား အေးအေးဆေးဆေး နိုင်သလောက် ထွန်ယက်လုပ်ကိုင် စားသောက်နေပေါ့။ ဒါ ဘုရားကြိုက်မယ့် အလုပ်ပဲ။”
ဂျော်ကဲ လက်ခံလိုက်ပါတယ်။ အဲဒီ တောင်စောင်းလေးမှာ သူအခြေချနေလိုက်တယ်။ အော့ကနေနယ်မှာတော့ သူ့ကို “ဖိုးကောက်ဆွ” လို့ ခေါ်ကြတယ်။ တကိုယ်လုံး ကောက်ဆွ ဒဏ်ရာတွေ ပွနေတာကိုး။ လုပ်ရင်းကိုင်ရင်း တစ်နှစ်တစ်နှစ် သီးနှံသိမ်းတိုင်း စုနိုင်သလောက်လေး သူစုတယ်။ တနေ့နေ့များ နော်ဝေကို ပြန်နိုင်လေမလားလို့ပေါ့။ ဒီလိုနဲ့ နှစ်တွေ များခဲ့ပြီ။ ဖိုးကောက်ဆွတစ်ယောက် တောင်စောင်းက စိုက်ခင်းလေးထဲမှာပါပဲ။
(ဇ)
သူမသေခင် တစ်နွေမှာတော့ ဂျော်ကဲ ပါပါဝက်စထရေးကို တံငါလှေတစ်စင်းနဲ့ လိုက်သွားလိုက်သေးတယ်။ အဲဒီက ဘုရားကျောင်းကို သွားပြီး သော့ထ် ရှိမလား သွားစုံစမ်းတယ်။ ဘုန်းကြီးဖြစ်နေတဲ့ သော့ထ်က သူ့ကို ဝမ်းသာအားရ ထွက်တွေ့တယ်။ အခုတော့ အဘိုးကြီးနှစ်ယောက်ပေါ့လေ။ ဆံပင်တွေလည်း ကျွတ်လို့ကုန်ပြီ။ သွားတွေလည်း ကျိုးလို့ မရှိတော့ဘူးပေါ့။ ဘုရားကျောင်းရဲ့ ခမ်းနားကွေးညွတ်နေတဲ့ အဝင်တံခါးအောက်မှာ တစ်ယောက်ကိုတစ်ယောက် ပွေ့ဖက်ထားကြရင်း။ ဝေးနေကြတဲ့ သတင်းမကြားရတာကြာနေတဲ့ လုလင်သူငယ်ချင်းနှစ်ယောက် ပြန်တွေ့ကြသလိုမျိုး။
ဂျော်ကဲက သူ့ခါးမှာချိတ်ထားတဲ့ ပိုက်ဆံအိတ်ကို ဖြုတ်ပြီး ငွေဒင်္ဂါး ငါးစ သော့ထ်လက်ထဲ ထည့်လိုက်တယ်။
“တနေ့ အိမ်ပြန်နိုင်နိုးနိုးနဲ့ အနှစ်လေးဆယ်ကျော် စုထားတဲ့ ငွေလေးတွေပေါ့ကွာ။ ဒီအချိန်မှတော့ မထူးတော့ပါဘူး။ ဘာဂျမ်မှာ ငါတို့ကို သိတဲ့သူ ဘယ်သူ ရှိဦးမလဲ။ ပြန်ဖို့ စိတ်ကူးနေမယ့်အစား အရှည်လျားဆုံး နောက်ဆုံးခရီးအတွက် ပြင်တာပဲ ကောင်းပါရဲ့။ ဖင်း ပြီးတော့ ဖလန်း၊ မွန်း၊ နောက် ဆွင်းနဲ့ ဗော့တ်။ သူတို့လည်း အခုတော့ တစ်ယောက်မှ မရှိကြတော့ဘူးလေ။ ဒီငွေငါးစနဲ့ သူတို့ ငါးယောက်အတွက် ဘုရားကျောင်းမှာ လူတွေကို ကျွေးမွေးကုသိုလ်ပြုပေးလို့ ရမလား။”
“စိတ်ချပါ။ သူငယ်ချင်း။ သူတို့တွေအတွက် လုပ်ပေးရမှာပေါ့။ မင်း အတွက်ကိုလည်း မစိုးရိမ်နဲ့။ ဟုတ်ပြီလား။”
သော့ထ်က ဂျော်ကဲကို တစ်ချက်ပွေ့ဖက်ပြီး “ငါ့သူငယ်ချင်းကို ဘုရားသခင် စောင့်ရှောက်ပါစေ။”
ဂျော်ကဲ နှုတ်ဆက်လှည့်ပြန်ခဲ့ပြီ။ သူရင်ထဲမှာ အခုတော့ အေးသွားပြီ။ ဘော်ငွေစလို ဖြူ ဆုတ်နေတဲ့ ကောက်ဆွဒဏ်ရာတွေ။ ဒီ ဒဏ်ရာတွေကြောင့် သူ့စိတ်ထဲမှာ ရှိခဲ့ဖူးတဲ့ အနှေင့်အယှက်တွေက အခုတော့ လွင့်ပြယ်သွားကြပါပြီ။
လှေဆိပ်ကို ပြန်နေရင်း လမ်းတစ်ဝက်ရောက်မှ ဂျော်ကဲ ဘုရားကျောင်းဆီ လှည့်ပြန်လာခဲ့ပါတယ်။ သော့ထ်ကို နောက်ထပ် ငွေဒင်္ဂါးတစ်ပြားထပ်ပေးလိုက်တယ်။
“ဒါက အာကောလ် ဒဂ်ဆန်အတွက်ကွာ။”
သူတို့နှစ်ယောက် တစ်ယောက်ကိုတစ်ယောက် ပြုံးကြည့်နေကြတယ်။ သူတို့အပြုံးကြောင့် သူတို့ မျက်လုံးတွေမှာတော့ အရေးအကြောင်း အရစ်ရစ် ထလို့ပေါ့။
