ကားကြုံလိုက်သူ

အခု ကျွန်တော် ရောက်နေတာက နယူးမက္ကဆီကိုပြည်နယ် အနောက်ဂါးလော့ပ်ရပ် ၆၆ လမ်းမကြီးရဲ့ဘေးက ကားရပ်နားစခန်းတစ်ခုထဲမှာပါ။ အခုကိစ္စကို ကျွန်တော် ခင်ဗျားတို့ကို ပြောပြလိုက်ရင်ကောင်းမယ်။ ဒါမှကျွန်တော်ရူးမသွားမှာ။ ဒါပေမယ့် သွက်သွက်တော့ ပြောမှဖြစ်မယ်။ အခုက ကျွန်တော်မရူးသေးဘူးလေ။ ကျွန်တော်အကောင်းဘဲ။ နည်းနည်းလေး ကိုယ်ပူချင်တာကလွဲလို့ပေါ့။

ကျွန်တော့်နာမည်က ရော်နယ်လ် အဒမ်။ အသက် ၃၆။ လူလွတ်။ အရပ်မြင့်တယ်။ အသားညိုတယ်။ မုတ်ဆိတ်ကျင်စွယ်နဲ့။ ၁၉၄၀ထုတ် ဖို့ဒ် v8 ကား လိုင်စင်နံပါတ် ၆V-၇၉၈၉ ကိုမောင်းလာတာ။ ကျွန်တော့်ကို ဘရွတ်ကလင်မှာမွေးတယ်။ ကျွန်တော်အကုန်သိပါတယ်။ ကျွန်တော်သိတာက အခုလက်ရှိမှာ ကျွန်တော်သတိကောင်းပါသေးတယ်၊ အသိလည်းရှိပါတယ်။ ရူးသွားတာ ကျွန်တော်မဟုတ်ဘူး။ ရူးသွားတာ အခြားတစ်ခု။ ကျွန်တော် ထိန်းချုပ်ပဲ့ကိုင်လို့မရတဲ့ အခြားတစ်ခုပါ။ ကျွန်တော်မြန်မြန်ပြောမှပါ။ ဘ၀နဲ့ ကျုပ်ကြားက ချိတ်ကွင်းဆက်ကလေးဟာ ဖျတ်ကနဲ ပျက်စီးသွားနိုင်တယ်လေ။ ဒီစကားတွေဟာ ကျွန်တော်ရဲ့နောက်ဆုံးစကားတွေဖြစ်နိုင်သလို ဒီညဟာလည်း ကျွန်တော်ကြယ်တွေကို နောက်ဆုံး တွေ့ခွင့်ရတဲ့ညလည်းဖြစ်နိုင်ပါတယ်။
-------
လွန်ခဲ့တဲ့ ၆ ရက်က ကယ်လီဖိုးနီးယား ကိုပြန်ဖို့ ဘရွတ်ကလင်မှာရှိတဲ့ ကျွန်တော့်အမေကို ကျွန်တော်နှုတ်ဆက်နေခဲ့ချိန်။

‘ငါ့သား ဘုန်းကြီးပါစေ။ အသက်ရှည်ပါစေ။ ကျန်းကျန်းမာမာ ချမ်းချမ်းသာသာရှိပါစေ။’
‘ကျွန်တော်သွားပြီနော် အမေ။’

အမေက အိမ်ပြင်အထိ လိုက်လာတယ်။

‘မိုးတွေရွာနေတယ် အမေရဲ့။ တံခါးနားဘဲ နေခဲ့ပါတော့။ ဟာ ... အမေက ငိုနေတာလား’
‘ဒီခရီးကြောင့်ပါ။ သားကို ကားမမောင်းစေ့ချင်ဘူး’
‘လုပ်ပြန်ပြီ အမေရယ်။ ဒီလိုဘဲ သွားနေကြတာပါပဲ။’
‘အမေသိပါတယ်။ ဒါပေမယ့် ဂရုစိုက်နော်။ သတိနဲ့မောင်းပါ့မယ်လို့အမေ့ကို ပြောသွားစမ်း။ မငိုက်နဲ့။ အမြန်ကြီးမမောင်းနဲ့။ ကားတားစီးတဲ့ လူစိမ်းသူစိမ်းတွေကိုလည်းလျှောက်တင်ခေါ်မသွားနေနဲ့။’
‘လူစိမ်း။ အာ ... စိတ်မပူပါနဲ့အမေရယ်။ ဘာမှမဖြစ်ပါဘူး။ ၈ ရက်ပဲမောင်းရမှာ။ လမ်းတွေကလည်း ကောင်းမှကောင်း။ ဟော့ဒေါ့ဂ် ဆိုင်တွေ ဟမ်ဘာဂါဆိုင်တွေက ဆယ်မိုင်ကို တစ်ဆိုင်လောက်ရှိပါတယ်အမေရဲ့’
-------
ဒီလိုနဲ့ မောင်းချလာခဲ့တာပေါ့။ လွတ်လွတ်လပ်လပ်ပေါ့ပေါ့ပါးပါး။ တစ်ယောက်တည်းဖြစ်နေရတာကိုက မိုးစွေငှက်မြူးလေးတစ်ကောင်လိုလို။ တစ်ယောက်တည်းပါလားရယ်လို့မေ့တောင်နေတယ်။ ဒီလိုနဲ့ အဲဒီမနက် မိုးတွေရွာနေတုန်း ဘရွတ်ကလင်တံတားကို အဖြတ်  ကြိုးတံတားဘောင်ကို မှီရပ်နေတဲ့လူတစ်ယောက်ကို တွေ့လိုက်ရတယ်။ သူ့ကြည့်ရတာ လမ်းကြုံလိုက်လို့ရမယ့်ကားတစ်စီးကိုစောင့်နေပုံပါပဲ။ သူ့ပခုံးပေါ်မှာလည်း မိုးရေတွေစိုလို့။ လက်ထဲမှာလည်း ဈေးပေါပေါခရီးဆောင်အိတ်တစ်လုံးနဲ့။ ပိန်ပိန်ပါးပါး သိပ်မထူးခြားလှတဲ့ ပုံစံမျိုး။ လျှာထိုးဦးထုပ်က မျက်လုံးတွေကိုတောင် အုပ်ကွယ်နေအောင် ငိုက်ထား စိုက်ထားလိုက်သေးတယ်။ သူက တံတားဘေး လူလျှောက်လမ်းပေါ်ကနေ ကားမောင်းလမ်းပေါ် ဆင်းလိုက်တယ်။ အား ... ကျုပ်သာ မရှောင်ရင်တိုက်ပြီ။ တကယ့်ကို တိုက်မိလုလုပဲ။ ဒါပေမယ်. ကားမောင်းရင်းမောင်းရင်းနဲ့ ဒါကို မေ့သွားမှာပါလေ။ ကျွန်တော်အဲဒီလိုထင်ထားပေမယ့်  နောက်တစ်နာရီလောက်ပဲ ကြာလိုက်တယ်၊ ကုန်းကျော်တံတားတစ်ခုကို ဖြတ်နေတုန်း သူ့ကို ထပ်တွေ့လိုက်ရတယ်။ အဲ ... သူမဟုတ်ဘူးဆိုရင်တောင် တော်တော်ကို တူတဲ့ နောက်တစ်ယောက်ပေါ့။ လူကြုံလိုက်လို့ရရင်လိုက်ချင်တဲ့ပုံလို ကျွန်တော့်ကားကို လှမ်းတားနေတယ်။ သူကျွန်တော့်ကို ဘယ်လိုကျော်တက်ပြီး ဘယ်လို ရောက်လာလဲ စဉ်းစားလို့တော့မရဘူး။ ဖြစ်နိုင်တာက အရမ်းမြန်တဲ့ ကုန်ကားတွေထဲက တစ်စင်းကသူ့ကို တင်ခေါ်လာပြီး အဲဒီကုန်ကားက ကျွန်တော့်ကားကိုကျော်တက် ပြီးတော့  သူ့ကို ဒီကုန်းကျော်တံတားမှာ ချထားပေးခဲ့သလားပဲ။ သူကတားပေမယ့် ကျွန်တော်ရပ်မပေးဘဲ မောင်းလာခဲ့တယ်။ ဒါပေမယ့် အဲဒီညမှာဘဲ သူ့ကိုနောက်ထပ်တွေ့တယ်။ ဟာရီစ်ဘာ့ဂ်နဲ့ ပစ်တ်စ်ဘာ့ဂ်ရဲ့ကြား ပင်န်ဆိုင်လ်ဗေးနီးယား လမ်းကြေးတောင်းတဲ့ဂိတ်အသစ်နားမှာပေါ့။ အဲဒီလမ်းက ၂၆၅ မိုင်ရှည်ပြီး လမ်းစည်းကမ်းအရကိုက အရမ်းအမြန်မောင်းရတဲ့နေရာ။ ဥမင်လမ်းတွေကလည်းရှိသေးတယ်။ ကျွန်တော်ကလည်း လှိုဏ်ခေါင်းထဲဝင်မှာမို့ အရှိန်ကို နည်းနည်းအလျှော့မှာ သူ့ကိုတွေ့လိုက်တာ။ ဒီတစ်ခါတော့ လမ်းဘေးမီးတိုင်ရဲ့အောက်မှာမတ်တတ်ရပ်လို့။ သူ့ရဲ့ အိတ်၊ ဦးထုပ်၊ ပခုံးပေါ်ကမိုးရေတွေ။ ကျွန်တော်အားလုံးကို ကောင်းကောင်းမြင်နေရတယ်။ ဒီတစ်ခါတော့သူက လက်ကာပြီး လက်ပြပြီးတော့ကို အရမ်းတားနေပြီ။
သူ့ရဲ့ ‘ဟယ်လို ဟယ်လို’ လို့အော်သံကလည်းခြောက်ခြားစရာ။
ကျွန်တော်အရှိန်ကို စွတ်တင်လိုက်တယ်။ လူကလည်းပြတ်တယ်လေ။ ရပ်ပေးဖို့ ရည်ရွယ်ချက်ကိုမရှိတာ။ ကျွန်တော်က ချန်ထားခဲ့လိုက် သူကကျွန်တော့်ရှေ့ကို ရောက်နေလိုက်ဖြစ်နေတာက တိုက်ဆိုင်တာပဲ ဖြစ်ဖြစ် ဘာပဲဖြစ်ဖြစ် ကျွန်တော်ကြောက်နေပြီလေ။ ဒီလိုနဲ့ နောက်တော့ ဆီဆိုင်တစ်ခုကိုရောက်လာခဲ့ပါတယ်။

‘ကျွန်တော့်ကားကို ဆီအပြည့်ဖြည့်ဗျာ’
‘အိုကေလေ၊ ဒါနဲ့ ညလေးက သာယာတယ်ဗျ နော’
‘အင်း သာယာပါတယ်၊ ဒါနဲ့ မိုးတော့ ရွာမသွားဘူးမဟုတ်လား’
‘တစ်ပတ်လောက်ရှိပြီလေ လုံးဝမရွာတာ’
‘အော် လုံးဝ မရွာဘူးလား ... အင်း ...  ... ဒီတော့အလုပ်ဖြစ်ရဲ့လားဗျ’
‘ဖြစ်ပါတယ်။ ဘယ်လိုရာသီပဲဖြစ်ဖြစ် လူတွေကသွားနေကြတာပဲလေ။ အလုပ်ကိစ္စနဲ့ပေါ့ဗျာ။ ဒီရာသီမျိုးမှာတော့ ဒီလမ်းမှာ အပျော်ခရီးသွားတဲ့သူကတော့ ခပ်ရှားရှားပဲလေ’
‘အင်းပေါ့လေ။ ဒါနဲ့ ကားကြုံလိုက်တားစီးတဲ့သူတွေကော ရှိတတ်သလား’
‘ကားကြုံလိုက်စီးမယ့်လူ၊ ဟုတ်လား။ ဒီလိုအရပ်မျိုးမှာ။ ခင်ဗျားကလည်းဗျာ’
‘ဘာလို့လဲဗျ။ ဘာဖြစ်လို့လဲ။ မတွေ့မိဘူးလား။’
‘စဉ်းစားကြည့်ပါဦးဗျာ။ ဒီလိုလမ်းမျိုးမှာ ကားကြုံတားစီးဖို့ကြိုးစားတယ်ဆိုရင်တော့ အဲဒီလူ ရူးနေလို့ဘဲ။’
‘ဒါဆို ခင်ဗျားပြောပုံက တစ်ခါမှကို မတွေ့ဖူးဘူးပေါ့’
‘တစ်ခါမှကို မတွေ့ဘူးပေါင်ဗျာ။ ဒီလမ်းမကြီးထဲမရောက်ခင် လမ်းကြေးကောက်တဲ့နားက ဆိုရင်တော့ တစ်မျိုးပေါ့။ အဲဒါကျော်ရင်တော့ တမေ့တမောကြီး မောင်းရတော့မှာလေ။ ဒီလောက်ဝေးဝေးကြီးတော့ ဘယ်ကားကမှ မတင်ဘူးလေဗျာ။ ဒီတစ်ကြောက လူပြတ်တယ်။ တောင်တွေတောတွေပဲရှိတာဆိုတော့လေ။ ခင်ဗျားလမ်းမှာ ဘာမှမတွေ့ဘူးမဟုတ်လားဗျ။’
‘မတွေ့ပါဘူး။ မတွေ့ပါဘူး။ မေးကြည့်တာပါ။’
‘အော်၊ အင်း အင်း။ ၁ ဒေါ်လာ နဲ့ ၄၉ ဆင့် ကျပါတယ်။’
-------
တိုက်ဆိုင်တာပဲနေမှာပါလို့တွေးရင်း ကျွန်တော်ဒီကိစ္စကိုပြန်မေ့သွားပါတယ်။ ပစ်တ်စ်ဘာ့ဂ်မှာ ညအိပ်ပြီး ကောင်းကောင်းလည်း အနားရလိုက်တယ်။ ဒါပေမယ့် အကြာကြီးမေ့မနေလိုက်ရပါဘူး။ နောက်တနေ့ မနက်မှာတော့ အိုဟိုင်းအိုပြည်နယ် ဇန်းစ်ဗီးလ်နယ်မြေရဲ့အထွက်မှာ သူ့ကိုထပ်တွေ့လိုက်ရတယ်လေ။ နေသာနေတဲ့ မွန်းလွဲပိုင်းလေးပေါ့။ အေးချမ်းသာယာတဲ့ အိုဟိုင်းအိုကွင်းပြင်မှာ ဆောင်းဦးရာသီမို့ အညိုရောင်ရိုးပြတ်ကွင်းတွေက နေမင်းရဲ့ရွှေရောင်အလင်းတန်းတွေအောက်မှာ လဲလျောင်းအိပ်မက်လို့။ ကျွန်တော်ကလည်းကားကို ဇိမ်နဲ့မောင်းလာတာ။ ရှုခင်းတွေကို ခံစားငေးမောရင်းနဲ့။ လမ်းကဖြုန်းဆို အပိတ်ကြီးနဲ့တားပြီး လမ်းလွှဲထားတာဆိုတာတွေ့လိုက်ရတယ်။ လမ်းပိတ်တားတဲ့တန်းတွေရဲ့ရှေ့မှာက အဲဒီလူလေ။ မတ်တတ်ကြီး။ သူ့ပုံစံက၊ အင်း သူ့ပုံစံကလည်း ကြောက်စရာတော့မရှိပါဘူး။ ဒါပေမယ့် စုတ်စုတ်ပြတ်ပြတ်နဲ့။ ရပ်နေပုံကတော့ ရိုးရိုးပါ။ မတ်တတ်လေးရပ် စောင့်နေသလိုမျိုး။ နွမ်းနွမ်းနယ်နယ်နဲ့။ လက်ထဲမှာတော့ အိတ်စုတ်ကြီးနဲ့။ သူ့ကြည့်ရတာ အစောကြီးကတည်းက စောင့်နေတာလိုပါပဲ။ ကားကိုလှမ်းတားပြီး ကားဆီကိုလျှောက်လာတယ်။

‘ဟယ်လို’

လမ်းကို ကာထားပြီး လမ်းလွှဲထားပေမယ့် လွှဲထားတဲ့လမ်းကို မတွေ့တော့ ကျွန်တော်ကလည်းလမ်းလွှဲကို ရှာဖို့ကားကိုရပ်ရတာပေါ့။ လွှဲလမ်းကလည်း ချက်ချင်းမတွေ့ဘူး။ ကျွန်တော်သိလိုက်ပြီ ဒီလူက သူ့ကို တင်ဖို့ ကျွန်တော်ကားရပ်ပေးတယ်လို့ ထင်သွားတာဗျ။

‘ဟယ်လို’
‘မဟုတ်ဘူးဗျ။ စိတ်မကောင်းပါဘူးဗျာ’
‘ကယ်လီဖိုးနီးယားကိုသွားမလို့လား။’
‘ဒီနေ့တော့ မသွားဘူးဗျ။ လမ်းလည်း မကြုံဘူးဗျ။ နယူးယော့ခ်ကိုသွားမှာ။ တောင်းပန်ပါတယ်။ စိတ်မကောင်းပါဘူးဗျာ’

အဲဒီခဏမှာပဲ လမ်းလွှဲကိုလည်းအတွေ့ ကျွန်တော် ကားကိုမြန်မြန်မောင်းသွားလိုက်တယ်။ ကိုယ့်ကိုယ်ကို အကြောက်လွန်အရူး တစ်ယောက်လိုပဲ ထင်မိတယ်။ ဒါပေမယ့် သူ့ကို ကျွန်တော့်ဘေးထိုင်လို့ ကျွန်တော့်ကားနဲ့တင်ခေါ်သွားဖို့ဆိုတာကတော့ မလွယ်ဘူးလေ။ တပြိုင်တည်းမှာပဲ တစ်သက်နဲ့တစ်ကိုယ် ပြောမပြတတ်အောင် အထီးကျန်လွန်းတယ်လို့ခံစားလိုက်ရတယ်။ နာရီတွေအများကြီးကုန်လွန်သွားတယ်။ လယ်ကွင်းတွေအများကြီးကို ဖြတ်လာခဲ့တယ်။ မြို့တွေတမြို့ပြီးတမြို့ကို ကျော်လာခဲ့တယ်။ နေရဲ့ အလင်းရောင်တွေက အနုအရင့် ပြောင်းလဲသွားတယ်။ ကျွန်တော်သိနေတယ်။ ဒီလူကို ထပ်တွေ့မှာပဲ။ ကျွန်တော်သူ့ကို မြင်ရမှာ ကြောက်တယ်။ ဒါပေမယ့် လမ်းဘေးဝဲယာကိုလည်း ဒီလူ ဘယ်နေရာကများ ပေါ်လာမလဲလို့ လျှောက်ကြည့်နေမိတယ်။

ဒီလိုနဲ့ ညရောက်လာခဲ့ပါတယ်။ လမ်းဘေးမှာ ဆိုင်တစ်ဆိုင်ကိုတွေ့တော့ ရှေ့မှာ သွားရပ်ပြီး ဟွန်းတီးပစ်လိုက်တယ်။

‘ဟေ့ ... ဘာလဲ ... ဘာလိုချင်လို့လဲ’
‘အသားညှပ်မုန့်နဲ့ သောက်စရာတစ်ခုခုလောက်လေ ... ရောင်းတယ်မဟုတ်လား’
‘နေ့ဆိုရင်တော့ရောင်းတယ် ... အခုက မိုးချုပ်နေပြီ’
‘အော် ဒါဆိုလဲ ကော်ဖီလေးတစ်ခွက်လောက်ဗျာ ... ဘလက်ခ်ကော်ဖီလေးတစ်ခွက်လောက်ပါ’
‘ဒီအချိန်ကတော့ မရဘူး ဟေ့လူ ... ကျုပ်မိန်းမက ချက်တဲ့ ပြုတ်တဲ့သူ ... သူက အိပ်နေပြီ’
‘နေပါဦးဗျ ... စောစောလေးကတင် ဒီနားမှာ လူတစ်ယောက်တွေ့လိုက်တယ် ... ခင်ဗျားတို့ ဆိုင်နားတင်လေးပဲ ရပ်နေတာ ... သူ့ကြည့်ရတာ မသင်္ကာစရာကောင်းတယ်’
‘ဟင်နရီ ... အပြင်ကဘယ်သူလဲ’
‘ဘယ်သူမှ မဟုတ်ပါဘူး အမေကြီး ... လူတစ်ယောက်ပါ ... ကော်ဖီတစ်ခွက်လောက်လိုချင်လိုတဲ့ ... အိပ် ... အိပ် ... အိပ်တော့’
‘ကျုပ် နှောင့်ယှက်နေတာ မဟုတ်ပါဘူးဗျာ ... ကျုပ်ကားမောင်းလာရင်း ဒီမသင်္ကာစရာ လူကို တွေ့လိုက်လို့ပါ’
‘သူက ဘာလုပ်နေတာမိုလို့လဲ’
‘အဲ ... ဘာမှတော့လုပ်မနေဘူးပေါ့လေ ...’
‘ဟာ ... ခင်ဗျား မူးနေတာပဲဗျ ... အလကား လုပ်စရာမရှိ ... လူကောင်းသူကောင်းတွေ ပင်ပင်ပန်းပန်း အိပ်နေတုန်းကို လျှောက်နှိုးနေတယ် ... သွား ... ခင်ဗျား သွားတော့’
‘ဟေ့ ... ဒီလူက ခင်ဗျားတို့ကို ဓါးပြတွေဘာတွေ ၀င်တိုက်သွားမယ်နော်’
‘ကျုပ်တို့ ဒီ ဆိုင်အစုတ်ထဲမှာ ဘာမှမရှိဘူး ... ခင်ဗျားသွား ... မသွားရင် ရဲခေါ်လိုက်မယ်’

ကျွန်တော်လည်း ကားထဲဝင်ပြီး ဖြည်းဖြည်းချင်းမောင်းလာခဲ့တယ်။ ဒီကားကို ကျုပ်မုန်းချင်လာပြီ။ နားစရာနေရာလေးတစ်ခု တွေ့လည်းအကောင်းသား။ ခုဟာက ကျုပ်က မစ်ဇူရီပြည်နယ်ရဲ့ အိုဇာ့ခ် တောင်တွေနားမှာ။ နည်းနည်းပါးပါးရှိတဲ့ နားနေစခန်းလေးတွေကလည်း ပိတ်ထားကြတာ။ လမ်းဘေးမှာလည်း ဒီလူကို ကျုပ်ထပ်တွေ့လိုက်သေးတယ်။ နောက်ထပ်လည်းတွေ့ဦးမှာ သိနေတယ်။ နောက်လမ်းလေးအကွေ့မှာတွေ့မလား။ ဒီတစ်ခါတွေ့ရင်တော့ ဒီလူကို ကျုပ်တိုက်သတ်ပစ်တော့မယ်။ ဒါပေမယ့်လည်း နောက်တစ်နေ့ မွန်းလွဲတဲ့အထိ သူ့ကို မတွေ့တော့ပြန်ဘူး။ အိုကလာဟိုးမားအ၀င်က ရထားလမ်းနဲ့ ကားလမ်းဆုံတဲ့နေရာမှာ ရထားလာလို့ ကားရပ်ပြီးစောင့်နေချိန်ကျမှ သူက ရထားလမ်းရဲ့ တခြားဘက်မှာပေါ်လာတယ်။ တယ်လီဖုန်းကြိုးတိုင်ကိုမှီလို့။ လေငြိမ်ပြီး အရမ်းခြောက်သွေ့တဲ့ နေ့ကြီး။ အိုကလာဟိုးမားရဲ့ မြေနီတွေဟာ နေရောင်အောက်မှာ ခြောက်သယောင်းလို့ပေါ့။ ဒါပေမယ့် သူ့ပခုံးမှာတော့ မိုးရေတွေစိုလို့။ ကျုပ်ဆက်သည်းမခံနိုင်တော့ဘူး။ ဘာမှ စဉ်းစားမနေဘဲ မျက်စိစုံမှိတ်ပြီး ရထားလမ်းတွေကို ဖြတ်ပြီး အရှိန်နဲ့သွားဖို့ ကားကို  သူ့ဆီဦးတည်ပြီး တအားစွတ်မောင်းဖို့ပြင်လိုက်တယ်။ သူက တစ်ချက်တောင် မော့မကြည့်ဘူး။ မြေပြင်ကိုပဲ ငေးစိုက်ကြည့်နေတယ်။ အရှိန်ကို ဆောင့်တင်ဖို့ လီဗာကို စွတ်နင်းတယ်။ ကားကို သူ့ဆီခေါင်းတည့်နေအောင် တည်လိုက်တယ်။ ရထားခပ်လှမ်းလှမ်းက လာနေတာကိုလည်း ကြားနေရတယ်။ အို လာပလေ့စေ။ ဒါပေမယ့် ဘာဖြစ်တယ်မသိဘူး။ ကားကသူ့နေရာမှာပဲ။ မရွေ့ဘူး။ ရထားကလည်း အရမ်းကပ်လာနေခဲ့ပြီ။ အသံတွေ ဘဲလ်သံတွေ ဥသြသံတွေ ဆူညံလို့။ သူကတော့ တုတ်တုတ်မလှုပ်ဘူး။ ကျွန်တော်သိပြီ။ သူကျွန်တော့်ကို သေမင်းနိုင်ငံကိုခေါ်တော့မယ်။
ကျွန်တော်သူ့ကိုမှ တိုက်သတ်လို့မရတာ။ ဒီလိုနဲ့ ရထားကဖြတ်မောင်းနေတုန်းမှာပဲ ကားစက်ကို နှိုးလို့ရသွားတယ်။ ဒီတော့ ကျွန်တော် နောက်တစ်ခေါက် ကားကို အရှိန်ယူဖို့ ပြီးရင်သူ့ကို အရှိန်ပြင်းပြင်းနဲ့ တိုက်လိုက်နိုင်ဖို့ နောက်နည်းနည်းဆုတ်လိုက်တယ်။ ဒါပေမယ့် ရထားလည်းဖြတ်ပြီးသွားရော ရထားလမ်းရဲ့ တစ်ဖက်ခြမ်းမှာ သူမရှိတော့ပါဘူး။ ပူလောင်ခြောက်သွေ့တဲ့ နွေနေ့လည်းခင်းရဲ့အလယ်မှာ ကျွန်တော်တစ်ယောက်တည်းဖြစ်နေပါတယ်။
-------
ကျွန်တော် တစ်ခုခု လုပ်ကို လုပ်မှဖြစ်တော့မယ်။ ဒီလူ ဘယ်သူလဲ၊ ကျွန်တော့်ဆီက ဘာလိုချင်လို့လဲ ကျွန်တော်မသိပါဘူး။ ဒါပေမယ့် သေချာတာက ဒီလမ်းပေါ်မှာ နောက်တစ်မိနစ်တောင် ကျွန်တော်တစ်ယောက်တည်းနေလို့ မဖြစ်တော့တာပဲ။

ဒီလိုနဲ့ ဆက်မောင်းလာရင်း အမျိုးသမီးငယ်တစ်ယောက်ကို လမ်းဘေးမှာ တွေ့လိုက်တယ်။

‘ဟေ့ ဟေ့ ... ကားကြုံလိုက်မလား’
‘ရှင်က ဘယ်လို ထင်လို့လဲ ... ဘယ်အထိသွားမှာလဲရှင့်’
‘အမ်မရဲလို ... ကျုပ်ခင်ဗျားကို အမ်မရဲလို အထိ ခေါ်သွားနိုင်တယ်’
‘တက်ခ်ဆက်စ် က အမ်မရဲလိုိုလား’
‘ဟုတ်တယ် အဲဒီအထိ’
‘အိုး ... ကောင်းလှချေလား’
‘ကဲ ... တက်ဗျာ’

အမျိုးသမီးက ကားပေါ်တက်လာပြီး ကျွန်တော်လည်းကားကို ဆက်မောင်းလာခဲ့ပါတယ်။

‘ကျွန်မ ဖိနပ်တွေချွတ်ထားချင်တယ် ရမလားရှင် ... ခြေထောက်တွေ နာလွန်းလို့ပါ ... ဟင်း ဟင်း’
‘ရပါတယ် ... ချွတ်ပါ ချွတ်ပါ’
‘ကောင်းလိုက်တာရှင် ... ကားကလည်းကောင်း ... မောင်းတဲ့လူကလည်းနှစ်လိုစရာနဲ့ ... အမ်မရဲလိုို အထိတောင်သွားရမှာ ... အရင်ဆို ရလိုက်မှဖြင့် ကုန်တင်ကားတွေချည်းပဲ’
‘ခဏခဏ ကားကြုံစီးလေ့ရှိသလားဗျ’
‘အင်းပေါ့ ... ဒါပေမယ့် ... ဒီလွင်တီးခေါင်ကြီးမှာ ခုလို အကောင်းစားလမ်းကြုံ လိုက်ရတာမျိုးကတော့ ခပ်ရှားရှားပဲ’
‘အော် ... အင်းပေါ့လေ ... ဒါပေမယ့် ပိုမြန်တဲ့ကားမျိုးရရင်တော့ ပိုမြန်မြန်ရောက်တာပေါ့ ... ဥပမာ တစ်ယောက်ယောက်က ကျုပ်ကားထက်မြန်တဲ့ကားနဲ့ ကားကြုံတင်ခေါ်ရင် ပိုမြန်မြန်ရောက်တာပေါ့’
‘ရှင်ပြောတာကို နားမလည်ဘူး’
‘ဒီလိုလေ ... ဥပမာ ကျွန်တော်ဆိုပါတော့ ... ကျွန်တော်က ၄၅ မိုင်နှုန်းနဲ့မောင်းလာတယ် ... ခင်ဗျားကို လမ်းဘေးမှာတွေ့တယ် ... မတင်ဘူး ... ခင်ဗျားက ကားကြုံရလိုက်တိုင်း ၆၅ မိုင် ... ဒါမှမဟုတ် မိုင် ၇၀ လောက်ကားနဲ့ရတယ် ကျွန်တော်ကို ကျော်တက်သွားလိုက် ... တစ်နေရာကျတော့ ဆင်းပြီး နောက်အကြုံထပ်စောင့်လိုက် ... ဟော ... ကျွန်တော်က ခင်ဗျားကို ထပ်တွေ့လိုက်မယ် ... မတင်ဘူး ...  အဲ ... ဒါပေမယ့် အရမ်းမြန်တဲ့ကားလာမယ် ... ခင်ဗျားကို တင်ခေါ်မယ် ... ’
‘ဟုတ်မှာပေါ့ ... ရချင်လည်းရမယ် ... ရချင်မှလည်းရမယ် ... နေပါဦး ... အဲဒီတော့ ဘာဖြစ်လဲ’
‘အဲ ... ဘာမှ မဖြစ်ပါဘူး ... ကားမောင်းလာရင်း တောရောက်တောင်ရောက် လျှောက်တွေးမိတာမျိုးပါ’
‘အိုး ... ဒီလောက်ကောင်းတဲ့ ကားကိုမောင်းရင်း ဒါမျိုးတွေ တွေးနေတယ် ... ကြံကြံဖန်ဖန်ရှင်’
‘ကဲ ... ဒါဖြင့် ... ခင်ဗျားသာဆို ဘာလုပ်နေမလဲ’
‘အိုး ... ကျွန်မသာ ရှင့်လို ကိုလူချောတစ်ယောက်ဆိုရင် ဇိမ်နဲ့နေမပေါ့ရှင် ... လမ်းဘေးမှာများ လှလှပပ မိန်းကလေးတစ်ယောက်တွေ့ရင် ... အေးအေးဆေးဆေး ... ရပ်ပြီး နားပြီး တင်ခေါ် ... အဲ ... ပြီးရင် ... ဟာ ... အမလေး’
‘မင်းရောသူ့ကို တွေ့လိုက်တယ်လား’
‘ဘာ ... ဘယ်သူ့ကို တွေ့ရမှာလဲ’
‘ဟိုလူလေ ... ခြံစည်းရိုးနားကလူ’
‘ဘယ်သူ့မှ မတွေ့ဘူးရှင့်’
‘ဟိုမှာလေကွာ’
‘အို ... ဘာမှမရှိဘူးရှင့် ... ခြံစည်းရိုးကြီးဘဲ ရှိတယ် ... အမလေး ... ရှင် ခြံစည်းရိုးကို ကားနဲ့တိုက်မလို့လား’
‘အဲဒီမှာ လူရှိပါတယ်ဆိုကွာ ... ပိန်ပိန်နဲ့ မီးခိုရောင်အ၀တ်တွေနဲ့ ... လက်ထဲမှာ ခရီးဆောင်အိတ် တလုံးနဲ့လေ ... ငါ ဒီလူ့ကို တိုက်မလို့’
‘သူ့ကိုတိုက်မလို့ ... ဟုတ်လား ... နေပါဦး ရှင်က လူတယောက်ကို သတ်မလို့ပေါ့ ... ဒီလိုလား’
‘ဒီလူကို ရှင်းမှ ဖြစ်မယ် ... အနည်းဆုံး ဒီလူရှိတယ်ဆိုတာ သေချာမှ ဖြစ်တော့မယ် ... မင်းတကယ်မတွေ့ဘူးလား ... သေချာလား’
‘ဘာမှ မတွေ့ဘူး’
‘ဒါဆို ... စောင့်ကြည့်နေ ... နောက်တခါပေါ်အလာကို ကြည့်နေလိုက် ... လမ်းမကို မျက်ခြေမပျက်စေနဲ့ ... ဒီလူပေါ်လာဦးမှာပဲ ... ဟော ... ဟိုမှာ ဟိုမှာ ...’
‘အိုး ... တော်တော့ရှင် ... ဒီတံခါး ဘယ်လို ဖွင့်ရမလဲ ... ကျွန်မဆင်းတော့မယ်’
‘မင်းတွေ့လိုက်တယ်မဟုတ်လား ... ဒီတစ်ခါတော့ မင်းတွေ့လိုက်တယ်မဟုတ်လား’
‘အို ... ကျွန်မ အခုတစ်ခါလည်း ဘယ်သူ့မှ မတွေ့ဘူး ... ဘယ်တော့မှလည်း တွေ့မှာမဟုတ်ဘူး ... ဒီအချိန်မှာ ကျွန်မသိတာ ... အသက်ဆက်ရှင်နေဖို့ပဲ ... ရှင့်ကား ဆက်စီးနေလို့ကတော့ အသက်ဆက်ရှင်ဖို့ဆိုတာ ဘယ်လိုမှ မဖြစ်နိုင်တော့ဘူး’
‘ဟေး ... ကိုယ်တောင်းပန်ပါတယ် ... ကိုယ် ဘာဖြစ်သွားမှန်း မသိလိုက်ဘူး ... နေပါဦးကွာ’
‘ကျွန်မ တောင်းပန်နေတယ်နော်’
‘အာ ... မင်းသွားလို့ မဖြစ်သေးဘူး ... ဒီမှာ ... မင်း ကယ်လီဖိုးနီးယားကို မသွားချင်ဘူးလား ... ငါအရောက်လိုက်ပို့ပါ့မယ်’
‘သေတာတောင်မလိုက်ဘူးရှင့် ... ကျေးဇူးကြီးပါရဲ့’
‘ဟေး ... ခဏလေးပါ’
‘ဒီမှာ ... ရှင်လိုအပ်နေတာ ... မိန်းမတစ်ယောက်မဟုတ်ဘူး ... အိပ်ဆေးတစ်ခွက်ပဲ ... ခုမှပဲ သိတော့တယ် ... ဆင်းတော့မယ်’
‘ဟေ့ ... မဟုတ်သေးဘူး ... မင်းမသွားရဘူး’
‘အိုး ... ရှင့်လက်တွေကို ဖယ်စမ်း ... ဖယ်လိုက်စမ်း’
‘ဟေ့ ... နေပါဦး ... ပြန်လာခဲ့ပါကွာ’
-------
အမျိုးသမီးဟာ ကျွန်တော့်ကို တစ္ဆေသရဲတကောင်လို စွန့်ခွာပြေးထွက်လို့ ကားပေါ်ကဆင်းသွားပါတယ်။ နှစ်မိနစ် သုံးမိနစ် အတွင်းမှာပဲ ကုန်ကားတစ်စီးက သူမကို တင်ခေါ်သွားခဲ့တော့ ကျွန်တော်တစ်ယောက်တည်း ပြန်ဖြစ်သွားခဲ့ပါတယ်။ ကျွန်တော်ဟာ တက်ခ်စက်စ်ပြည်နယ်ရဲ့ မြက်ခင်းပြင်ကျယ်ကြီးအလယ်မှာ။ အဲဒီကုန်ကားရဲ့နောက်မှာလည်း ဘာကားတစ်စီးမှ ထပ်မလာသေးဘူး။ ဘာလုပ်ရမလဲ။ ဘယ်လို အားတင်းရမလဲ။ နားစရာ တစ်နေရာရလည်းအကောင်းသား။ ဒီကားထဲတင်ပဲ လမ်းဘေးမှာ တရေးတမောအိပ်လိုက်ရင်ရော။ နောက်ခန်းထိုင်ခုံပေါ်က အနွေးအင်္ကျီကိုယူလိုက်မယ်။ ဒီအနွေးအင်္ကျီကိုပဲ စောင်လုပ်ခြုံပြီး -
‘ဟယ်လို’
အဲဒီ အသံကို ကျွန်တော် ကြားလိုက်ရချိန်မှာ သူက ကားဆီကို လာနေပါပြီ။
‘ဟယ်လို’
ကားလက်ကိုင်ခွေပေါ်ကနေ ကျော်ပြီး သူ့ကိုလှမ်းမြင်နေရပြီ။ ကျွန်တော့်ဆီလာနေတာ။
‘ဟယ်လို’
ဒီ့ထက်ပိုနီးလာလို့ မဖြစ်တော့ဘူး။ ကျွန်တော် ကားကို တအားမောင်းချ လာခဲ့ပါတယ်။ သူ့ရဲ့လှမ်းအော်သံကို ကျွန်တော်ကြားလိုက်ရပါသေးတယ်။
‘ဟယ်လို’
-------
အော် တကယ်တော့ သူ့ကို အဲဒီတုန်းကတည်းက စကားပြောကြည့်လိုက်ရမှာ။ ချစရာရှိလည်း အဲဒီတုန်းကတည်းကဘဲ သတ်လိုက် ချလိုက်ရမှာ။ ခုတော့ သူ့ဟာက နေရာတိုင်းမှာ သူက ရောက်နေတာကြီး။ ဆီဖြည့်လည်းပေါ်လာ၊ အအေးဝယ်လည်းပေါ်လာ၊ ကော်ဖီဝယ်လည်းပေါ်လာ၊ မုန့်ဆင်းဝယ်စားလည်းပေါ်လာနဲ့။ ညဘက် ကားကို အရှိန်နည်းနည်းလေး လျှော့လိုက်တာနဲ့ တွေ့တော့တာပဲ။ အမ်မရဲလို ရပ်နားစခန်းအပြင်မှာ မတ်တတ်ကြီး။ နယူးမက္ကဆီကို ပြည်နယ်အ၀င်နားလေးက ရပ်နားစခန်းရဲ့ ရေသောက်စင်ဘေးနားမှာ မတ်တတ်ကြီးပဲ။ နာဗာဟို စခန်း ရောက်တော့ ကားတာယာတွေကို ဆင်းစစ်ဆေးနေတုန်း သူ အပြင်မှာစောင့်နေတာ ကျွန်တော်တွေ့တယ်။ အယ်လ်ဘာကာကီးမှာ ဆီ ၁၀ ဂါလံဝယ်နေတုန်းကလည်း သူ့ကို တွေ့လိုက်တယ်။ ကျွန်တော်တော့ ကားကို မရပ်ရဲတော့ဘူး။ မြန်နိုင်သမျှမြန်မြန် မောင်းနေရတယ်။ ခုမောင်းနေရတဲ့ နေရာကလည်း လပေါ်မှာ မောင်းနေရသလိုပဲ။ ကြီးမား ကျယ်ပြန့်ပြီး ခြောက်သွေ့လွန်းတဲ့ နယူးမက္ကဆီကို ရဲ့ ကုန်းပြင်မြင့်ကြီးပေါ်မှာ။ လမျက်နှာပြင်ပေါ် အမှုမဲ့ အမှတ်မဲ့နဲ့တွားသွားနေတဲ့ ခြင်တစ်ကောင်လို ကျွန်တော်ကားက ပြေးနေတယ်။ အဲ အခုကျတော့ သူက ကျွန်တော့်ကား အရပ်ကိုတောင် စောင့်မနေတော့ဘူး။ ဒီဆုံးစမထင်တဲ့ လမ်းမကြီးပေါ်မှာ ကျွန်တော် မဖြစ်မနေ တစ်နာရီ ၈၅ မိုင်နှုန်းလောက်နဲ့ မောင်းနေရတယ်။ အဲဒီလို မောင်းနေတုန်းကိုပဲ နှစ်မိုင်ကို တစ်ခါလောက် သူ့ကို ကျွန်တော် တွေ့နေရတယ်။ သူသဏ္ဍာန်က အရိပ်မဲ့နေတယ်။ ကျွန်တော့်ရှေ့မှာ ဖျတ်ကနဲ ပေါ်ပေါ်လာတယ်။ တိတ်ဆိတ်ပြီး အသက်မဲ့နေတဲ့ မြေပြင်ပေါ်မှာ သူ့အရင် အသွင်အပြင်အတိုင်းပဲ။ ခြောက်ခန်းနေတဲ့ မြစ်တွေထဲမှာ၊ ရှေးဟောင်းရေခဲမြစ်တွေရဲ့ ပျက်စီးတိုက်စားမှုတွေကြောင့် ဖြစ်ပေါ်လာခဲတဲ့ ကျောက်စောင်ကျောက်တုံးတွေရဲ့ အပေါ်မှာ၊ သန့်ရှင်းပြီး တိမ်ကင်းစင်တဲ့ လေအလျဉ်ထဲမှာ သူဟာ တဖျတ်ဖျတ် ပေါ်လာနေတယ်။
-------
အခု ဒီမနက် နယူးမက္ကဆီကို ဂါးလော့ပ်ရပ်ကို ရောက်လာချိန်မှာတော့ ကျွန်တော့်မှာ အဖော်မရှိ တစ်ယောက်တည်း။

ဒီမှာလည်း ယာဉ်ရပ်နားစခန်းလေး ရှိတယ်။ ဒီလ ဒီရာသီဆိုတော့လည်း အေးစက် တိတ်ဆိတ်ခြောက်ကပ်လို့ပေါ့။ စခန်းထဲက ၀င်သွားလိုက်ပြီး ဖုန်းဆက်လို့ ရမလား သွားမေးလိုက်တယ်။ ကျွန်တော် သိပ်ရင်းနှီးတဲ့ သူတစ်ယောက်နဲ့က စကားပြောမှ ဖြစ်တော့မှာမို့ပါ။ ကျွန်တော်ချစ်တဲ့ လူတစ်ယောက်ကို စကားပြောလိုက်မှပဲ ကျွန်တော် မာန်တင်းနိုင်လိမ့်မယ်။

ဒီလိုနဲ့ ကျွန်တော် အမေ့အိမ်ကို ဖုန်းခေါ်ဖို့ အတွက် စိတ်ကူးလိုက်ပါတယ်။

‘ခေါ်မယ့် နံပါတ်ကို ပြောပါရှင်’
အလိုအလျောက်ဖုန်းပြောအော်ပရေတာရဲ့ အသံကို ကြားလိုက်ရပါတယ်။
‘အဝေးကို ခေါ်မှာပါ’
‘ဟုတ်ကဲ့။ ရပါပြီ။ နံပါတ်ကို ပြောပါ။’
‘နယူးယော့ခ်ကိုပါ။ ကျွန်တော့်နာမည် ရော်နယ်လ် အဒမ် ပါ။ ဘရွတ်ကလင်မှာ ရှိတဲ့ ကျွန်တော့်အိမ်ကို ခေါ်ချင်လို့ပါ။  နံပါတ်က ဘိခ်ျဝုဒ် ၉၉၇၀’
‘ဟုတ်ပြီ။ လိုင်းနံပါတ်က’
‘၃၁၂’
‘အယ်လ်ဘာကာကီး ... နယူမက္ကဆီကို ဂါးလော့ပ် ကပါ။ နယူးယော့ခ်က ဘိခ်ျဝုဒ် ၉၉၇၀ ကိုခေါ်ချင်လို့တဲ့’

ကျွန်တော် ဖတ်ဖူးတာတော့ ချစ်ခြင်းမေတ္တာတရားဟာ မကောင်းဆိုးဝါးတွေကို ဖျောက်ဖျက်ပစ်နိုင်သတဲ့။ ဒီလို မနက်အစောကြီးကတော့ အမေ အိမ်မှာ ကျိန်းသေ ရှိမှာပဲ။ အရပ်မြင့်မြင့် ဆံပင်ဖြူဖွေးဖွေး အိမ်နေရင်း အ၀တ်အစားနဲ့ အမေ တတောက်တောက် အိမ်အလုပ်တွေ လိုက်လုပ်နေမှာကို ကျွန်တော်မြင်ယောင် ကြည့်မိပါတယ်။ ကျွန်တော်ထင်ပါတယ်။ အမေ့ရဲ့ တည်ငြိမ်အေးချမ်းတဲ့ အသံကို ကြားလိုက်ရုံနဲ့တင် ရပါပြီ။

‘ပထမ ၃ မိနစ်စာအတွက် ၃ ဒေါ်လာနဲ့ ၈၅ ပြား ကျမှာကို သင် ပေးရပါမယ်။ အခု တစ်ဒေါ်လာ နဲ့ ဆင့် ၅၀ ထည့်ပါ။ ပြီးရင် ကျန်တဲ့ ပိုက်ဆံကို ဆက်ထည့်ဖို့ ခဏစောင့်ပါ။’

ကျွန်တော်ပိုက်ဆံကို ထည့်လိုက်တယ်။

‘တစ်ဒေါ်လာ နဲ့ ဆင့် ၅၀ ရပါတယ်။ နောက် တစ်ဒေါ်လာ နဲ့ ဆင့် ၅၀ ထည့်ပါ။’

ကျွန်တော်ပိုက်ဆံကို ထပ်ထည့်လိုက်တယ်။

‘နောက်ဆုံး ၈၅ ဆင့် ကိုထည့်ပေးပါ။’

ကျွန်တော်ပိုက်ဆံ ၈၅ ဆင့် ကို ထပ်ထည့်လိုက်တယ်။

‘ဘရွတ်ကလင်နဲ့ ပြောလို့ ရပါပြီ။’
‘ဟဲလို’
‘ဟဲလို ... မစ္စက် အဒမ်ရဲ့ အိမ်ကပါ’
‘ဟဲလို ... အမေလား’
‘ဒါ မစ္စက် အဒမ်ရဲ့ အိမ်ကပါ။ ဘယ်သူနဲ့ စကားပြောချင်ပါသလဲ’
‘အခုစကားပြောနေတာ ဘယ်သူလဲဗျ’
‘ကျွန်မ မစ္စက် ၀ှစ်တ်နေပါ’
‘ဟင် ... ဘယ်လိုဖြစ်တာလဲ ... အဲဒီအိမ်မှာ ဘာ မစ္စက် ၀ှစ်တ်နေ မှာ မရှိပါဘူး ... ဘိခ်ျဝုဒ် ၉၉၇၀ မဟုတ်လား’
‘ဟုတ်ပါတယ် ... မောင်ရင်’
‘ကျွန်တော့် အမေ ဘယ်မှာလဲ။ မစ္စက် အဒမ်လေ’
‘သူမရှိပါဘူး ... ဆေးရုံမှာပါ ... အခုဆက်တာ ဘယ်သူပါလဲ’
‘ဆေးရုံမှာ ... ဟုတ်လား’
‘ဟုတ်ပါတယ် ... ဆေးရုံမှာပါ ... အခုဆက်တာ ဘယ်သူပါလဲ ... မိသားစုဝင် တယောက်ယောက်များပါလား’
‘သူက ဘာလို့ ဆေးရုံတင်လိုက်ရတာလဲ’
‘စိတ် အထိခိုက်လွန်ပြီး ဗုန်းဗုန်းလဲသွားလို့ ဆေးရုံတင်ထားရတာ ၅ ရက်ရှိသွားပြီ မောင်ရင်။ မောင်ရင်က ဘယ်သူလဲ’
‘စိတ်အထိခိုက် လွန်ပြီးတော့ ... ဟုတ်လား ... နေပါဦး ... ကျွန်တော့်အမေက ... ဘယ်ကဘယ်လို ...’
‘အေးကွယ် ... သူ့ရဲ့ သားကြီး ရော်နယ်လ် ဆုံးကတည်းက ဖြစ်သွားတာပဲ’
‘သူ့သားကြီး ရော်နယ်လ် ဆုံးကတည်းက ... ဟုတ်လား ... အာ ... မဟုတ်သေးပါဘူး ... ဒါ နံပါတ်ဘယ်လောက်လဲ’
‘ဒါက ဘိခ်ျဝုဒ် ၉၉၇၀ ပါ။ ဟုတ်ပါတယ်။ ရုတ်တရက် ဖြစ်သွားတာလေ။ လွန်ခဲ့တဲ့ ၆ ရက်က သူ့သား ရော်နယ်လ် အဒမ် ခမျာ ဘရွတ်ကလင် တံတားပေါ်မှာ ကားအက်ဆီးဒင့်နဲ့ ဆုံးသွားတာလေ’
‘လူကြီးမင်းရဲ့ ၃ မိနစ်က ပြည့်သွားပြီ ဖြစ်ပါတယ်ရှင်။ လူကြီးမင်းရဲ့ ၃ မိနစ်က ပြည့်သွားပြီ ဖြစ်ပါတယ်ရှင်။ လူကြီးမင်းရဲ့ ၃ မိနစ်က ပြည့်သွားပြီ ဖြစ်ပါတယ်ရှင်။ လူကြီးမင်းရဲ့ ၃ မိနစ်က ပြည့်သွားပြီ ဖြစ်ပါတယ်ရှင်။ လူကြီးမင်းရဲ့ ၃ မိနစ်က ပြည့်သွားပြီ ဖြစ်ပါတယ်ရှင်။’

ကဲ အခုတော့ တိတ်ဆိတ်ခြောက်ကပ်နေတဲ့ နယူမက္ကဆီကို ဂါးလော့ပ်ရပ်က ကားရပ်နားစခန်းထဲမှာ ကျွန်တော် တစ်ယောက်တည်း။ ကျွန်တော် သေသေချာချာ ပြန်စဉ်းစားနေတာ။ ပြီးတော့ ကျွန်တော် မနည်း အားတင်းထားရတာပါ။ ဒီလိုမှ မဟုတ်ရင် ... အဲဒီလိုမှ မဟုတ်ရင် ကျွန်တော် ... ကျွန်တော် ရူးသွားတော့မှာ။ အပြင်မှာ မှောင်လာပြီ၊ ညရောက်လာပြီ။ ကျယ်လွင့်ပြီး အသက်ဝိညာဉ်ကင်းမဲ့တဲ့ နယူးမက္ကဆီကိုရဲ့ ညပေါ့။ ကောင်းကင်ပေါ်မှာတော့ ကြယ်တွေ သိန်းသန်းချီလို့။ ကျွန်တော့်ရှေ့မှာတော့ မိုင်ထောင်ချီတဲ့ လမ်းမကြီး ရှိနေတယ်။ ကုန်းမြင့်တွေ တောင်စဉ်တွေ မြက်ခင်းတွေ ကန္တာရတွေကို ဖြတ်လို့ပေါ့။ အဲဒီ ကုန်းမြင့်၊ တောင်တန်း၊ မြက်ခင်း၊ လွင်ပြင်တွေရဲ့ တနေရာရာမှာ ကားကြုံလိုက်ဖို့ တချိန်လုံး လိုက်နေခဲ့တဲ့ သူရှိနေပါလိမ့်မယ်။ သူစောင့်နေမှာပါ။ တနေရာမှာ ပေါ့။ ကျွန်တော်သိခွင့်ရလာမယ့် တစ်နေရာရာပေါ့။ ကျွန်တော်သိခွင့်ရလာမယ့် တစ်နေရာရာ။ သူဘယ်သူလဲ ဆိုတာ။ ပြီးတော့ ကျွန်တော်ဘယ်သူလဲ ဆိုတာ။

မှတ်ချက်။ ။ဘာသာပြန်ချက်များ မတိကျပါ။ အမှားများအား သည်းခံပါရန် မေတ္တာရပ်ခံပါသည်။
မူရင်း အသံလွှင့်ချက်(၁၉၄၆) နှင့် စာသားများကို အောက်ပါလိပ်စာတွင် ရရှိနိုင်ပါသည်။
http://www.escape-suspense.com/2007/03/suspense_the_hi.html
http://www.genericradio.com/show.php?id=6845efa745272e3b

ကမ္ပည်း မှတ်တမ်း နဲ့ လူတစ်ယောက်ရဲ့ လမ်းမ

ကမ္ပည်း မှတ်တမ်း နဲ့ လူတစ်ယောက်ရဲ့ လမ်းမ

ခံဝန်ချက် ။ ။

ဒီ ၀တ္ထုတိုကို ကျွန်တော် မန္တလေးမှာ တက္ကသိုလ်တက်နေတဲ့ ၂၀၀၀ ခုနှစ်ပတ်ဝန်းကျင်လောက်က ဖတ်ခဲ့ဖူးတာပါ။ ဒါပေမယ့် ကျောရိုးပဲ မှတ်မိပြီး ၀တ္ထုတိုရဲ့ နာမည်၊ စာရေးသူရဲ့ နာမည်တွေကို မမှတ်မိတော့ပါဘူး။ ဒီဝတ္ထုက ပေးတဲ့ ရသနဲ့ သင်ခန်းစာကို ကြိုက်လွန်းလို့ ကျွန်တော် ရေးတတ်သလို ပြန်ရေးလိုက်တာပါ။ မူရင်းကို ရှာတွေ့ခဲ့ရင်တော့ အဲဒါကို ဖတ်စေချင်တာပါ။ ခုတော့ အဲဒီ မူရင်းက ရှာမတွေ့သေးတော့ ကျွန်တော်မှတ်မိတဲ့ ကျောရိုးကိုပဲ တတ်နိုင်သမျှ အဆင်ပြေအောင် ပြန်ရေးပြီး တင်လိုက်တာပါ။ ဒီတော့ ဒီဝတ္ထုကို ဖတ်ပြီး ဒီဇာတ်လမ်းမျိုး ဖတ်ဖူးသလိုပဲလို့ ထင်ခဲ့ရင် ‘ဟုတ်ပါတယ်။ ကျွန်တော်ကူးချထားတာပါ’ လို့ အရင် ၀န်ခံလိုက်ပါရစေ။

(က) ဧရာဝတီမြစ်ကို ဖြတ်လျက် မန္တလေးဘက်ကမ်းကို ငေးရင်း ကားပေါ်မှာ အားလုံး ငြိမ်ငြိမ်သက်သက် လိုက်ပါလာကြသည်။ သူတို့အားလုံးက မန္တလေးတက္ကသိုလ်မှ ကျောင်းသားများဖြစ်ကြသည်။ တချက်တချက် သူတို့ချင်း စကားပြောသံတိုးတိုးကို ကြားရသည်။ မိန်းကလေးနှစ်ယောက် နဲ့ ယောက်ျားလေး တစ်ယောက်က နောက်ခုံတန်းမှာ ထိုင်ပြီး ရှေ့မှာ ယောက်ျားလေးသုံးယောက် အားလုံးခြောက်ယောက်ဖြစ်သည်။ မောင်းသူ ကျွန်တော့်ဘေးခုံပေါ်မှာတော့ သူတို့ရဲ့ စာအုပ်တစ်ချို့ နှင့် တိုလီမိုလီတွေပါသော စက္ကူသေတ္တာ ခပ်ရွယ်ရွယ်တစ်လုံး။ ထင်ထားခဲ့တာက လူငယ်တစ်သိုက်ဆိုတော့ နည်းနည်းနားညည်းမည်လို့။ သို့သော် ခုတော့ သူတို့က လူငယ်များဖြစ်ကြသော်လည်း တည်တည်ငြိမ်ငြိမ်ရှိလွန်းကြသည်။ စာတမ်းပြုစုဖို့အတွက် မင်းကွန်းကို သွားလေ့လာကြမည်ဆိုသည်။ တစ်ယောက်က ပန်းချီဆရာထင်သည်။ သူ့မှာ ပန်းချီဆွဲပစ္စည်းတွေလည်း ကားနောက်ခန်းထဲမှာ ပါသည်။ တစ်ယောက်ကတော့ ကင်မရာကို လွယ်လျက်သား။ ဒါပေမယ့် အားလုံးက စကားနည်းကြသည်။ ပြောတာတွေကျတော့လည်း ကျွန်တော်သိပ်နားမလည်သော ပညာရပ်ဆိုင်ရာတွေ။

မနက်ခင်းပေမယ့် နေကတော့ အပူရှိန်ခပ်ပြင်းပြင်းပင်။ စစ်ကိုင်းဘက်ကနေ မင်းကွန်းဆီလာသော မြစ်ဘေးလမ်းသည် သိပ်ကောင်းလှသည်တော့ မဟုတ်ပေ။ ဒီတော့ လမ်းက လူသွားလူလာ ရှင်းလှသည်။ သုံးထပ်ကန်ကို ရောက်တော့ ကားကို ရပ်ခိုင်းပြီး အားလုံးဆင်းကြသည်။ ကန်ကို ဓါတ်ပုံရိုက်သူက ရိုက်သည်။ ပတ်ကြည့်သူက ပတ်ကြည့်သည်။ ကျွန်တော်ကတော့ ကားနဲ့ ခပ်လှမ်းလှမ်းမှာ ဆေးလိပ်သွားသောက်နေလိုက်၏။ သူတို့က ကျွန်တော့်ကားကို စငှားကတည်းက 'ဦးလေး၊။ ဆေးလိပ်သောက်တတ်ရင်တော့ ကားနားတုန်း ခပ်လှမ်းလှမ်းမှာ သွား သွား သောက်ပေးပါဗျာ' လို့ ကြိုပြောပြီးသား။ တော်တော်ကြာတော့ အားလုံး ကားဆီ ပြန်လာကြသည်။

'ဦးလေးရေ ... ဆက်သွားကြစို့ဗျာ'

ကျွန်တော်က ဆေးလိပ်ကို လက်စသတ်လိုက်ရင်း ကားဆီ သွက်သွက် ပြန်လျှောက်လာလိုက်သည်။

ပန်းချီဆရာလိုလို လူငယ်က

'ရှေ့ နားကျရင် ပန်းချီ ပြခန်းတစ်ခု ရှိတယ် ဦးလေး၊ အဲဒီမှာ ကျွန်တော်တို့ ခဏဆင်းမယ်။'

ကျွန်တော်က ကားအငှားလိုက်တာ ကြာပြီဆိုပေမယ့် မင်းကွန်းဘက်ကိုတော့ ဒီကားလမ်းက မလာဘူးပါ။ ကိုယ်ကိုယ်တိုင် လာစရာရှိရင်လည်း စက်လှေနဲ့ပဲ လာလိုက်တာများသည်။ သို့သော်လည်း သူတို့ပြောတဲ့ ပြခန်းကတော့ လွဲစရာမရှိ။ မြင်လိုက်တာနဲ့ သိသာသည်။ ပြခန်းထဲမှာလည်း ပန်းချီကားတွေ ရှိသလို အပြင်မှာလည်း တစ်ချို့ ထောင်လျက်။ တစ်ချို့ဆွဲလက်စ။ ကားရပ်ပြီး သူတို့ ထွက်သွားကြချိန်မှာ ကျွန်တော်လည်း ငေါင်တောင်တောင် ကျန်ရစ်ခဲ့သည်။ ယူလာသော ပန်းချီပစ္စည်းတွေလည်း သယ်သွားကြသည်ဆိုတော့ ပေးမှာလား ကိုယ်တိုင်ထိုင်ဆွဲမှာလား မပြောတတ်ချေ။ တအောင့်ပဲလို့ ကျွန်တော်ထင်ထားခဲ့ပေမယ့် တော်တော်ကြာတဲ့ အထိ ပေါ်မလာတော့ ကျွန်တော်ပိုပျင်းလာခဲ့သည်။ အမှတ်မဲ့စွာပဲ ကျွန်တော်ခြေထောက်တွေက ကားအပြင် အဲဒီကမှတဆင့် မလှမ်းမကမ်းက ဘုန်းကြီးကျောင်းဘက်ဆီ။ သူတို့ထွက်လာရင်လည်း အရှင်းကြီးလှမ်းမြင်ရနိုင်သည်ပဲ။ ဘုန်းကြီးကျောင်းတံတိုင်းက အလှူရှင်နာမည်များ။ အမှုမဲ့ အမှတ်မဲ့ ဖတ်ကြည့်နေစဉ်မှာပဲ တွေ့လိုက်တာက

အဘိုး ဦးလှဘော် + အဘွား ဒေါ်သစ်၊ အဘိုး ဦးစံ + အဘွား ဒေါ်ခင်ထား တို့အားအမှူးထား၍

ကုက္ကိုတန်းရွာနေ ဦးမျိုးဝေ + ဒေါ်ခင်လေး နှင့် သား မောင်အောင်မျိုး ကောင်းမှုအလှူ

၁၃၂၂ ခု တန်ဆောင်မုန်းလပြည့်

ကိုယ်နဲ့ နာမည်တူတစ်ယောက်ကို တွေ့တော့ ပျင်းပျင်းရိရိ ရှိနေချိန်မို့ထင်သည်။ ဘာရယ်မဟုတ်စိတ်ဝင်စားမိသည်။ အောင်မျိုးဆိုသောနာမည်က ကိုယ်ကျောင်းနေခဲ့စဉ်ကလည်း ခပ်များများပင်။ နှစ်တိုင်း အောင်မျိုးတစ်၊ အောင်မျိုးနှစ် စသည်ဖြင့် နာမည်အပြောင်းခံရသည်။ အများသောအားဖြင့်က နံပါတ်နှစ်ချည်းပဲ ဖြစ်ရတတ်သမို့ သူငယ်ချင်းတစ်ချို့ပင် ကျွန်တော့်နာမည်ကို အောင်မျိုးနှစ်လို့ ထင်နေကြသေးသည်။ ရေးထိုးထားသော ခုနှစ်သက္ကရာဇ်အရတော်တော်ကြာပြီဆိုပေမယ့် အုတ်တံတိုင်းတွေက ထူသည်မို့ ခိုင်ခိုင်မာမာပင်။ အုတ်တံတိုင်းရဲ့ တစ်နေရာမှာလည်း ကျကျနန အုတ်ခံရေအိုးစင်တစ်ခု။ ရေအိုးစင်က အုတ်တံတိုင်းနဲ့ စာလျှင် နည်းနည်းပိုသစ်သလိုရှိပြီး အင်္ဂတေကိုင်ထားလိုက်တာ ပြောင်လက်လို့နေသည်။ ရေအိုးစင်က အုတ်ခုံကို အပိတ် ထူထူမြင့်မြင့်မို့ ပိုလည်းတင့်တင့်တယ်တယ်ရှိသည်။ အပေါ်မျက်နှာပြင်မှာ နည်းနည်းချိုင့်ကာ သဲခင်းထားပြီး အိုးနှစ်လုံးကို သပ်သပ်ရပ်ရပ်တင်ထားသည်။ ရေလဲထားတာလည်း မကြာသေးဘူးထင်သည်။ အိုးတွေမှာ ရေစက်တွေ စွတ်စိုဆဲ။ ရေခွက်တွေက ကြွေရည်သုတ်ခွက်တွေ။ သန့်သန့်ပြန့်ပြန့်ပင်။ ရေတစ်ခွက်ခပ်သောက်လိုက်ရင်း သာဓုခေါ်လိုက်မိသည်။ ပြီးမှ ဘာရယ်မဟုတ် အုတ်ခုံရဲ့ ဒူးတစ်တိုက်နေရာလောက်မှာ မြှပ်ထားသော စကျင်ပြား ၀ါကျင့်ကျင့်ပေါ်က မှိန်ဖျော့သော အလှူရှင်နာမည်တွေဖတ်ကြည့်လိုက်တော့

ကုက္ကိုတန်းရွာနေ ဦးမျိုးဝေ + ဒေါ်ခင်လေး နှင့် သား မောင်အောင်မျိုး

သားလေး သုံးနှစ်ပြည့် မွေးနေ့ကုသိုလ် အလှူ

၁၃၂၅ ခု သီတင်းကျွတ်လပြည့်

'သြော် ဒါဆို သူက ၁၃၂၂ မှာပဲ မွေးတာပေါ့။ ဟိုတံတိုင်းကို လှူတုန်းက သူက လသားလေးရှိသေးတာပေါ့'

ဘာရယ်မဟုတ် ဆက်စပ်လျှောက်တွေးနေမိရင်း ကိုယ်နဲ့ အသက်ပါတူနေတာကို အံ့သြနေမိသည်။ သီတင်းကျွတ်လပြည့်မွေးတယ်ဆိုရင်တော့ မွေးနေ့ပါတူလိုက်သေးသည်။ တိုက်ဆိုင်လိုက်တာ။ ကျွန်တော့်မိဘတွေကတော့ ဘုတ်မင်းကန်ရွာက။ အိမ်တော့မရောက်ဖြစ်တာ ကြာခဲ့ပြီ။ ဒီတစ်ခါပြန် အလည် ရောက်ဖြစ်ရင်တော့ အမေ့ကို မေးကြည့်လိုက်ဦးမည်။ ကျွန်တော်ငယ်ငယ်တုန်းက ဘာတွေလှူပေးခဲ့ဖူးသလဲလို့။ အမေ့ကတော့ လူကြုံရှိတိုင်း သူ့မြေးတွေကိုရော ချွေးမကိုရော ကျွန်တော့်ကိုရော လာလည်ဖို့ မပြတ်မှာနေကျ။ ကျွန်တော်တို့ကတော့ တစ်နှစ်တစ်ခါလောက် လည်နိုင်ဖို့တောင် တော်တော်အားထုတ်နေရသည်။ ဒါတောင် မန္တလေးနဲ့ ဘုတ်မင်းကန်ဆိုတာ ဘာမှ ဝေးတာမဟုတ်။ အမေကလည်း မန္တလေးတော့ သူ့သမီးတွေလိုက်ပို့မှပဲ လာတတ်သည်။ သူဘာသာသူဆို မလာရဲ။ ကားရှုပ်သည်၊ ဆိုင်ကယ်ရှုပ်သည်ဆိုသည်။ အဖေက လာရဲသော်လည်း သူ့တို့အဖေကို သည်းသော သမီးတွေက တစ်ယောက်တည်း ဘယ်တော့မှ မလွှတ်ချေ။ မောင်အငယ်ဆုံးမို့ သူတို့က ကျွန်တော့်ကိုတော့ သံယောဇဉ်ကြီးကာ မကြာမကြာရောက်လာတတ်ကြသော်လည်း အဖေတို့ အမေတို့ လွှတ်ပါဦး ဆိုရင်တော့

‘ဟယ် ... ဖိုးအောင်ရယ်။ နင့်အိမ်က ကျဉ်းကျဉ်း။ အရပ်က လူရှုပ်ရှုပ်နဲ့။ အဖေတို့ နေရခက်ပါတယ်’

ဆိုသော ဆင်ခြေ တွင်တွင်ပေးကာ လွှတ်ခဲလှသည်။ တစ်ခါတစ်ခါ လွှတ်လည်း လေးငါးရက်ထက်မပို လာပြန်ခေါ်တော့သည်။ အဖေရောက်နေပြီဆိုရင်တော့ ရှေးဟောင်းနှောင်းဖြစ်တွေ နားညည်းအောင် ကြားရတတ်သည်။ အဖေက အမှတ်သညာကောင်းသူမို့ ဘာတွေလှူဘူးတယ်ဆိုတာ ပိုကောင်းကောင်းမှတ်မိနိုင်သည်။ ဒါပေမယ့် မင်းကိုမွေးတော့ ဘာလှူတာ ဘာညာ တစ်ခါမှ ပြောသံတော့ မကြားဖူး။ ရယ်တော့ ရယ်စရာပင်။ ဒီအရွယ်ကြီးရောက်မှ ဘာလို့ သိချင်တာလဲလို့ အဖေ ဘုတောရင်တော့ ဘာပြန်ဖြေမလဲ ကြိုစဉ်းစားထားမှ။

(ခ) မောင်ကျောင်းသားများအုပ်စု ပြန်ထွက်လာတာ တွေ့လိုက်တော့ အတွေးစကို ဖြတ်ရင်း ကားဆီလျှောက်သွားလိုက်သည်။ ပန်းချီပစ္စည်းတွေက ပေးခဲ့ ဒါမှမဟုတ် ထားခဲ့ကြပြီထင်သည်။ ပြန်ပါမလာတော့။ ပန်းချီဆရာလိုလိုကောင်လေးအပြင် ကျန်တဲ့သူတွေကလည်း ပန်းချီကို တော်တော်စိတ်ဝင်စားကြပုံရသည်။ စကားလက်စ မပြတ်နိုင်သေးဘဲ ဝေဖန်ဆွေးနွေးကြဆဲ။ ကားပေါ်အားလုံးရောက်တော့ ကားစက်နှိုးရင်း အပြင်မှာထောင်ထားတဲ့ ပန်းချီကားတွေကို လှမ်းကြည့်လိုက်တော့ နားလည်ရခက်လွန်းသည်ထင်မိပြန်သည်။ သူ့ခေတ်နဲ့ သူအခါပေပဲလား၊ ကိုယ်နားမလည်တဲ့ ပညာရပ်ပေမို့လားမသိ။

‘ရှေ့မှာ လက်ဖက်ရည်ဆိုင်ပါလား ဦးလေး။ နည်းနည်းတောင်ဆာသလိုပဲ။ ခဏရပ်ပြီး တခုခု ဆင်း စားကြရအောင်ဗျာ။ ဦးလေးရော မနက်စာ စားခဲ့လား။’

‘ဦးက နေမထွက်ခင်ကို မနက်စား အများကြီးစားနေကျကွ။ ဒီမလာခင်ကတည်းက ထမင်းကြော် အ၀စားလာခဲ့တာ။’

‘လက်ဖက်ရည်လောက်တော့ ဆင်းသောက်ပါဦး။ ကျွန်တော်တို့ တိုက်ပါ့မယ်။’

ကောင်လေးတွေက ဖော်ဖော်ရွေရွေတော့ တော်တော်ရှိကြသည်။ ယဉ်ယဉ်ကျေးကျေးတွေပင်။

‘ဦးက မန္တလေးသားလား’

ကားရပ်လုရပ်ခင်မှာပင် ကျောင်းသူတစ်ယောက်က လှမ်းမေးသည်။ ကျွန်တော်အဖြေချင်ဆုံး မေးခွန်းကို အမေးခံရတော့လည်း ခလုတ်တိုက်မတတ်ဖြေလိုက်မိသည်။

‘ကျုပ်က ဘုတ်မင်းကန်သားဗျ’

‘သြော် ... နာမည်ကျော်ရွာသားကိုးဗျ’

ဒီလူငယ်တွေလောက်ဆို ဟိုးတချိန်က ဘုတ်မင်းကန်ရွာသူအလှဘွဲ့ ‘မင်းဂံဘုတ် ရွာသူများ အသားတော် ၀င်းလို့ ၀ါဝါညီရွှေ’ ဆိုတာကို မသိလောက်ထင်ခဲ့တာ။ သူတို့က သိကြသည်ပဲ။ ဒီဘက်ခေတ်အဆိုတော်တွေလည်း ပြန်ဆိုကြသည် ထင်ပါရဲ့။ အသက်ရလာတော့လည်း သီချင်းတွေနားမထောင်ဖြစ်တာတောင် ကြာခဲ့ပြီ။ လက်ဖက်ရည်ဆိုင်တွေ၊ ထီသည်တွေ ဖွင့်တာလောက်ပဲ နားထောင်ဖြစ်တော့သည်။ ဟိုး ငယ်ငယ်တုန်းကတော့ သီချင်းတွေထက်ပိုခုံမင်တာ မရှိနိုင်တော့လို့တောင် ထင်ခဲ့ဖူးသည်။ အရွယ်ရလာတော့လည်း ဘယ်လိုက ဘယ်လို ဒါတွေနဲ့ အဆက်ပြတ်သွားမှန်းပင် သတိမထားမိလိုက်။ သူတို့က သူတို့နဲ့ ထိုင်ဖို့ ခေါ်ပေမယ့် ကားသမားထုံးစံ ကိုယ့်ဘာသာကိုယ်ပဲ သက်သက်တစ်ခုံမှာ သွားထိုင်နေလိုက်သည်။

တိုက်ဆိုင်မှုတွေများလွန်းသည်ထင်သည်။ လက်ဖက်ရည်ဆိုင်နဲ့ လမ်းတစ်ဖက်က စေတီငယ်တစ်ခု ဖြစ်သည်။ စေတီငယ်ရဲ့ အ၀င်မုခ်ဦးအမိုးခုံးသည် အင်္ဂတေ ပန်းတမော့လက်ရာတို့ဖြင့် လှပ တင့်တယ်လွန်းလှသည်။ မုခ်ဦးအမိုး ကွေးကွေးဝိုက်ဝိုက်တစ်လျှောက် အလှူရှင်အမည်ကို လှလှပပ ရေးထိုးထားသည်။ ကြည့်ရတာ ကြေးသတ္ထုကဲ့သို့သော သတ္ထုတစ်မျိုးကို မြှပ်၍ စာလုံးဖော်ထားသည်ထင်သည်။ လမ်းတစ်ဖက် ခပ်လှမ်းလှမ်းကပင် ရှင်လင်းတောက်ပစွာ မြင်ရသော လက်ရာပင်။

ကုက္ကိုတန်းရွာနေ ဦးမျိုးဝေ + ဒေါ်ခင်လေး နှင့် သား မောင်အောင်မျိုး ကောင်းမှု

၁၃၃၂ ခု သီတင်းကျွတ်လပြည့်ကျော် ၃ ရက်

ဒါကို လှူတော့ ဒီလူ့အသက်က ၁၀ နှစ်သားရှိပြီ။ ကျွန်တော် လေးတန်းကျလို့ အဖေက မန္တလေးက သူ့အကို ၀မ်းကွဲဆီပို့ပြီး ကျောင်းတက်ခိုင်းခဲ့တဲ့ နှစ်ပေါ့။ အဲဒီ ဦလေးကို ကျွန်တော် တော်တော်ကြောက်ရတာဖြစ်သည်။ ဒီလူက ဆယ်နှစ်သား အရွယ်ရောက်တာတောင် နောက်မှာ နောက်ထပ် ညီ ညီမ ရှိပုံ မရချေ။ အကို အမလည်း မရှိဘူး ထင်သည်။ မိဘတွေ ဒီလူ့ကို ဘယ်လောက် ချစ်ကြပါလိမ့်။ အားနေတော့လည်း လူက တွေးချင်သည်။ ကုက္ကိုတန်းဆိုတာ ဘယ်နားကပါလိမ့်။ မန္တလေးအနီးတစ်ဝိုက်ကတော့ မဟုတ်ဘူးထင်သည်။ ကျွန်တော့်တစ်သက် အနှစ် ၅၀ နီးနီး မန္တလေးနားပဲ နေလာတာ ရောက်ဖူး ကြားဖူးတဲ့ ရွာထဲမှာတော့ ဒီနာမည် မပါ။ ကျွန်တော်တို့ ဘုတ်မင်းကန်လို နာမည်ကြီး မဟုတ်တာ သေချာသည်။

ကျောင်းသားတစ်ယောက်က ကားတံခါးဖွင့်ပေးဖို့ လာပြောတော့ ကျွန်တော် ကားတံခါးလိုက်ဖွင့်ပေးရသည်။ သူက ကားရှေ့ခန်း စက္ကူသေတ္တာထဲက စာရွက်အလွတ်တွေ ဖောင်တိန်တွေနဲ့ စာအုပ်တစ်ချို့ကို နှိုက်ပြီး ‘ရပြီ ဦးလေး’ ဟုပြောသည်။ ကူသယ်ပေးမယ်ပြောတော့လည်း လက်မခံ။ ‘ရပါတယ် ခင်ဗျ’ ဟုသာပြောပြီး သူ့ဘာသာ သယ်သွားသည်။ အိမ်က သားတော်မောင်တွေရော ဘယ်လိုပါလိမ့်။ ဒီလို ယဉ်ယဉ်ကျေးကျေးတွေမှ ဟုတ်ရဲ့လား။ ကျွန်တော့်ထက် မအေကို ပို ကပ်ကြသော သားတော်မောင်တွေဆီ စိတ်က ရောက်သွားပြန်သည်။ ကျောင်းသားတစ်စုကတော့ လက်ဖက်ရည်စားပွဲပေါ်မှာ စာအုပ် စာရွက်ကိုယ်စီနှင့် အကျအနပင် ဘာတွေလဲတော့ မသိ အလုပ်ရှုပ်နေကြသည်။ ကြာကြဦးမည်ထင်ပါရဲ့။ ကားကတော့ ဆီထည့်ပေးပြီး  နေ့တွက်နဲ့ အပြတ်ငှားထားတာမို့ ဘာမှမထူး။ မမောင်းရ ပိုတောင်သက်သာသေးသည်။ ဒါပေမယ့် ကားသမား ကားမမောင်းဘဲ ငုတ်တုတ်ထိုင်နေရတော့ စိတ်တွေက တောင်ရောက်မြောက်ရောက်။ အခွင့်ရတုန်း ဆေးလိပ်တစ်ဖွာ နှစ်ဖွာ ဖွာဦးမှ။

(ဂ) ဆေးလိပ်မီးညှိရင်း မျက်လုံးတွေက မုခ်ဦး အ၀င်က အလှူရှင်နာမည် စာတန်းဆီ ပြန်ရောက်သွားပြန်သည်။ ‘ငါနဲ့ သက်တူ ရွယ်တူဆိုတော့ ဒီကောင် ဘယ်မှာ ကျောင်းတက်တာပါလိမ့်’။ ကျွန်တော်လိုပဲ ရွာသားပေမယ့် မန္တလေးမှာ ကျောင်းလာတက်ဖြစ်တယ်ဆိုတာလည်း ဖြစ်နိုင်သည်ပင်။ ကျွန်တော်က (၁၃) ကျောင်းထွက်။ ကျွန်တော်နဲ့ အတန်းတစ်ခုခုမှာ နာမည်တူခဲ့တဲ့ အောင်မျိုးတစ်ယောက်ယောက်ရော မဖြစ်နိုင်ဘူးလား။ စဉ်းစားမိသလောက်တော့ သိဖူး ခင်ဖူးတဲ့ အောင်မျိုးတွေနဲ့ ကုက္ကိုတန်းဆိုတဲ့ ရွာက တွဲရက်ရှိမနေ။ ငယ်ငယ်တုန်းက အောင်မျိုးတွေကိုလည်း ကောင်းကောင်းမမှတ်မိ။ မှတ်မှတ်ရရ ကျွန်တော်ရဲ့ နောက်ဆုံး ကျောင်းသားဘ၀ ကိုးတန်းတက်တုန်းက အောင်မျိုးကတော့ ကျွန်တော်နဲ့ သိပ်တည့်တာမဟုတ်။ ဒီကောင်က ရွှေတချောင်းသား။ ပြီးတော့ ဒီကောင့်မှာ အကို တစ်ယောက်ရှိပြီး အဲဒီအကိုကလည်း ဆယ်တန်းကျ။ သူတို့ ညီအကိုနှစ်ယောက်လုံး လူဆိုးတွေအဖြစ်နာမည်ကြီးသည်။ သူများသာပြောတာ ကျွန်တော်ကလည်း ခဏခဏ လူကြီးမိဘခေါ်ဖို့ ဖြစ်ရသူဆိုတော့ ဆရာ ဆရာမတွေက အောင်မျိုးဆို ဘယ်အောင်မျိုးဖြစ်ဖြစ် ကြောက်လှသည်ဆိုသည်။

မောင်ကျောင်းသားတွေက ဘာတွေလုပ်ကြသည်မသိ။ မပြီးနိုင်ကြပေ။ ဆွေးနွေးကြဆဲ။ နေ့လည်နားကပ်လာပြီး ဗိုက်ကဆာလာသည်မို့ လက်ဖက်ထမင်းတစ်ပွဲ ကြက်ဥကြော်နဲ့ မှာစားလိုက်သည်။ အားလုံးထကာ ကားဆီလျှောက်သွားချိန်မှာတော့ မွန်းတည့်လုပြီ။ ပိုက်ဆံရှင်းဖို့ စားပွဲထိုးလေး ခေါ်လိုက်တာ ရှင်းပြီးပြီဆိုပဲ။

‘ငါ့တူတို့။ ဦးလေးစားတာ ဘယ်လောက်ကျသွားသလဲ။ ပြန်ယူပါကွ’

‘ဟာ။ ကျွန်တော်တို့ ကျွေးပါရစေ။’

‘မဟုတ်တာ။ ကားခထဲမှာ အဲဒါ အကုန်ပါပြီးသာပါကွ။ ငါ့ဘာသာ ၀ယ်စားရမှာ။’

‘အဲလိုလည်း မဟုတ်ပါဘူး။ ဦးလေးရယ်။ ထားလိုက်ပါ။ ကျွန်တော်တို့ နောက်ရက်တွေလည်း လာဖို့ ရှိဦးမှာ။ အဆင်ပြေရင် ဦးလေးနဲ့ပဲ  လာလိုက်မယ်လေ။ ကိုယ့်တူတွေလို သဘောထားပါဗျ။’

ကျွန်တော်တို့ ကားသမားတွေအတွက်တော့ ပြောရဆိုရ အဆင်ပြေတဲ့ ခရီးသည်ရတာ ကံကောင်းလွန်းသည်ပင်။ ဒီကလေးတွေနဲ့ လာရတာ မဆိုး။ ဈေးကိုလည်း နည်းနည်းမှပင် မစစ်ခဲ့ကြ။ ပိုက်ဆံတတ်နိုင်ကြသည် ထင်ပါရဲ့။ အိမ်က သားတော်မောင်တွေရော တက္ကသိုလ်တက်ကြတာ ဘာတွေများသုံးစရာတွေရှိပြီး ဘယ်လိုတွေ သုံးကြပါလိမ့်။ မှတ်မှတ်ရရ ခုထိ ပိုက်ဆံလုံးခနဲ ပေးရတာမျိုး ကြုံတော့ မကြုံဘူးလှပေ။ သူတို့အမေက ကျွန်တော်မသိအောင် ကြည့်ကျက်လုပ်ပေးနေလေသလားမသိ။ သမီးကတော့ ငယ်သေးလို့ထင်သည်။ တော်တော်လိမ္မာသည်။ မုန်းဖိုးပေးသမျှ စုထားသည်ချည်း။ မုန့်ဝယ်စားပါသမီးရဲ့ လို့ အတင်းပြောရသည်။ ဒါကြောင့်မို့ မိန်းမကရော သားတွေကပါ ကျွန်တော့်ကို သမီးမှ သမီး သည်းသည်းလှုပ်သည် ထင်ကြသည်။ ကျွန်တော်ကလည်း အမှန်လိုပဲမို့ အငြင်းခက်ပါသည်။ ဒါတောင်မှ သမီးနဲ့ မှတ်မှတ်ရရ ဘာမှ အတူမလှူဘူး။ စားဝတ်နေရေးကလည်း ရုန်းကန်နေရလို့ထင်ပါသည်။

လမ်းတစ်လျှောက် စက်ဘီးစီးသူရော လမ်းလျှောက်သူရော များလှသည်မို့ ကားကို ဖြေးဖြေးပဲ မောင်းရသည်။ သည်လိုနဲ့ပဲ နာမည်ကျော် မင်းကွန်းပုထိုးတော်ကြီး ရောက်လာခဲ့ကြသည်။ ဒီမှာတော့ ကျောင်းသားတွေ ကျိန်းသေ ကြာကြပေလိမ့်မည်။

‘ဦးလေးရေ။ သွားစရာရှိရင် အေးအေးဆေးဆေးသွားနေ။ နှစ်နာရီလောက် ကြာဖို့များတယ်။’

‘ရပါတယ်ကွ။ မင်းတို့ ကားထဲက ယူချင်တာရှိရင် ခက်နေပါ့မယ်။’

‘ရပါတယ်။ ဦးလေးလည်း ပျင်းမှာပေါ့။ ဟိုနားဒီနား လျှောက်သွားပါ။’

‘ကောင်းပါပြီကွာ။ ဒါဆိုလည်း ဦးလေး ဒီနားတစ်ဝိုက်မှာပဲ ရှိမယ်။ လူအိုရုံဘက် ဒါမှမဟုတ် ခြင်္သေ့ရုပ်တွေရှိတဲ့ မြစ်ကမ်းခြေဘက်မှာ ရှိမယ်လေ။’

(ဃ) မြစ်ကမ်းခြေမှာ ရှိတဲ့ ခြင်္သေ့ရုပ် အပြိုအပျက်တွေဘက် လျှောက်လာခဲ့ပြီး ဒီနေရာရောက်တိုင်း ဖြစ်နေကျထုံးစံ ဟိုးတစ်ခေတ်တစ်ချိန်က မြန်မာတွေရဲ့ အားထုတ်မှုကို အံ့သြစောကြောနေမိသည်။ နောက်ထပ်ထုံးစံ တစ်ခုကိုလည်း မပျက်မကွက်လုပ်ရသေးသည်။ ခပ်ရွယ်ရွယ် အုတ်ခဲကျိုးစကို ကိုင်ပြီး ခြင်္သေ့ရုပ်ပေါ်ကနေ ကျော်အောင်ပစ်ဖို့ ကြိုးစားတာ။ ငယ်ငယ်က ကျောင်းပြေးပြီး လှေတွေနဲ့ ဒီဘက်ကမ်းအထိ လာခဲ့တာ သတိရသည်။ အခုခေတ်ကလေးတွေကတော့ ဒီလို မရှိကြတော့ဘူးထင်ပါရဲ့။ တကယ်တမ်းတွေးကြည့်ရင် အန္တရာယ် များလွန်းလှသည်။ ငယ်ငယ်တုန်းဆိုတော့လည်း ကြောက်ရကောင်းမှန်းမသိခဲ့။ နန်းတော်ကျွန်းရွာက သူငယ်ချင်းတွေက လှေရှိသည်မို့ မင်းကွန်းကို ကျောင်ပြေးရတာ အဆင်ပြေသည်။ အိမ်တွေက မသိအောင် လျှောက်သွားရတာကိုက အရသာဖြစ်ခဲ့သည်။ ရေနစ်သေနိုင်သည့် အန္တရာယ်ထက် စာသင်ခန်းကို ပို ကြောက်တတ်ခဲ့သည် ဆိုရမည်။

တစ်နာရီ ကျော်ကျော်လောက် ကြာတော့ ကားဆီ ပြန်သွားပြီး အရိပ်အခြေ ကြည့်လိုက်သည်။ ဘယ်သူ့မှ မတွေ့။ ပုထိုးပေါ်တက်နေရင်ပဲဖြစ်ဖြစ် ပုထိုးဟိုဘက်ခြမ်းရောက်နေရင်ပဲဖြစ်ဖြစ် မြင်ရမှာမဟုတ်။ ခေါင်းလောင်းကြီးနဲ့ကလည်း ကပ်လျက်ဆိုတော့ သူတို့ဘာသာ သူတို့များ လမ်းလျှောက်သွားကုန်ကြလေသလား မသိ။ သူတို့က သဘောကောင်းကြသည်ဆိုတော့ တစ်ခုခုပြောမှာမျိုး စိတ်တော့ သိပ်မပူလှ။ သူတို့ နှစ်နာရီလောက်ကြာမယ်ဆိုတာ တကယ်ပဲထင်ပါရဲ့။ ဘာတွေကိုများ နှစ်နာရီ ကြာအောင် ကြည့်ကြမလို့ပါလိမ့်။

ဘိုးဘွားရိပ်သာဘက်လမ်းလျှောက်ရင်း ဆေးလိပ်သောက်ဖို့ ပြင်လိုက်သည်။ အနီးအနားက ဆိုင်တွေ လူတွေကိုလည်း ငေးရင်း ကြည့်ရင်း။ သမီးဖို့ ကစားစရာ တစ်ခုခု ၀ယ်သွားမလားလည်း စဉ်းစားမိသည်။ နည်းနည်းကြာပြီး ကားဆီပြန်လာတော့လည်း ကျောင်းသားအုပ်ကို မတွေ့ရသေး။ ပိုက်ဆံက ကြိုပေးထားတာဆိုတော့ ဒီကိစ္စတော့ ပူစရာမရှိ။ သူတို့တွေ ပုံစံကလည်း မိကောင်းဖခင်သားသမီးဆိုတာ ဒီပုံစံလို့ ပြောရမယ့် ရုပ်ကလေးတွေ။ ကားထဲကပဲ ထိုင်စောင့်တာ ကောင်းပါတယ် စဉ်းစားပြီး ကားထဲ ၀င်ထိုင်နေလိုက်သည်။ ဒီလိုနဲ့ တော်တော် ကြာသွားပြန်သည်။ ပေါ်မလာကြသေး။ ဘာလုပ်ရင်ကောင်းမလဲ။ စဉ်းစားရင်း စဉ်းစားရင်း ခေါင်းထဲ ဖျတ်ကနဲ အကြံတစ်ခု ရသွားသည်။ ဒီနားတစ်ဝိုက်မှာ ဟိုလူတွေမိသားစုက ခဏခဏ လှူတတ်ပုံရသည်ဆိုတော့ ဘိုးဘွားရိပ်သာမှာ ဒါမှမဟုတ် ဒီအနီးအနားမှာရော တစ်ခုခု လှူခဲ့ကြလေမလား။ အလုပ်မရှိ ကြောင်ရေချိုးဆိုတာ ဒါပဲ။

ဘာပဲဖြစ်ဖြစ် အချိန်ဖြုန်းစရာတစ်ခု ရလာတော့ ၀မ်းသားအားရ ဖြစ်သွားသည်။ ဘိုးဘွားရိပ်သာနှင့် အနားတစ်ဝိုက်က အုတ်တံတိုင်းတွေကို ဖတ်ရတာက စိတ်ဝင်စားစရာ ကောင်းလာသည်။ ဒါပေမယ့် ခေါင်းသာ တဖြည်းဖြည်းနောက်လာရော ဘာမှ မတွေ့။ စိတ်ထဲမှာ မဖြစ်နိုင်သလို ထင်မိပြန်သည်။ တဖက်ကလည်း ဒါ မထူးဆန်းဘူး ဖြစ်နိုင်တာပဲလို့ တွေးမိပြန်သည်။ ဒီလိုနဲ့ပဲ လမ်းလျှောက်ရင်း တောင်ဖတ်မြောက်ဖတ်နှင့် ကိုယ့်ကိုယ်ကို သတိထားမိချိန်မှာ ခေါင်းလောင်းကြီးထားတဲ့ အဆောက်အအုံနားရောက်နေခဲ့ပြီ။ ဒီအဆေက်အအုံမှာကတော့ သံပန်းကွက်တွေနဲ့ရော ဆေးရေးတွေနဲ့ပါ အလှူရှင်နာမည်တွေ တစ်ပုံတစ်ပင်။ ကိုယ့်တစ်သက် ဘာတစ်ခုမှ ကမ္ပည်းထိုးမလှူဖူးတာလည်း ခုမှ သတိထားမိသည်။ အလှူဆိုတာ မဖြစ်မနေ ကမ္ပည်းထိုးလှူမှ မဟုတ်ဘဲလို့ ဆင်ခြေလည်းကန်မိသည်။ ဒါပေမယ့်လည်း ခုလို ကမ္ပည်းတွေလိုက်ဖတ်နေမိမှ တစ်ခုခုကို အားကျသလို ခံစားရသည်။ ဖတ်လိုက်တဲ့ အလှူ့ရှင်တွေ တော်တော်များလာပေမယ့် ရှာနေတဲ့ နာမည်တစ်ခုကိုတော့ မတွေ့သေးပေ။ မန္တလေးမြို့နေ ဦးကြင်လှိုင်။ ကျော်ချ။ မတ္တရာမြို့နေ။ ကျော်ချ။ ပဲခူးမြို့ ဆံတော်တွင်းရပ်။ ကျော်လိုက်။ ခေါင်းတွေက နည်းနည်းတောင် နောက်လာပြန်ပြီ။ ခဏနားဦးမှ။

နောက်တစ်ခေါက် ပြန်စဖတ်တဲ့ အချိန်မှာတော့ ရှာဖွေတဲ့ အလုပ်ကို တော်တော် ကျွမ်းလာသည်လို့ထင်သည်။ မြန်မြန်ကျော်ချ တတ်လာပြီး မြန်မြန် ရှာတတ်လာသည်။ ဒါပေမယ့် မတွေ့သေး။ ‘နေပါဦး။ ဒါထက် ဒီလူ မြို့တွေ ဘာတွေ ပြောင်းသွားရင်ရော။ ဒါဆို ကုက္ကိုတန်းနဲ့ ဘယ်စတော့ မလဲ။ သေသေချာချာ ဖတ်မှပါ။’

စိတ်အေးလက်အေးနဲ့ ကျကျနန ပြန်ဖတ်လို့ ထင်သည်။ ကျွန်တော့်စိတ်အထင် သိပ်မကြာလိုက်ခင်မှာပဲ အမိုးမျက်နှာကြက်နားလောက်မှာ တွေ့လိုက်ရတဲ့ စာတန်းက

ကုက္ကိုတန်းရွာနေ ခမည်းတော် ဦးမျိုးဝေ + မယ်တော် ဒေါ်ခင်လေး အမှုးထား၍ အရှင်ဇာဏေယျ  ကောင်းမှု

၁၃၄၁ ခု သီတင်းကျွတ်လပြည့်ကျော် ၂ ရက်

‘သြော် ဒီလူ ဦးဇင်း ၀တ်နဲ့ လှူထားတာထင်ပါရဲ့’ လို့ တွေးမိရင်း ကိုယ့်ရဲ့ ရှာဖွေတွေ့ရှိမှုအတွက် ကျေနပ်သွားသည်။ ဘုန်းကြီးဆိုတော့ ဘွဲ့တော်ကို နေနံသင့် ပေးထာသည်။ အင်္ဂါသား ဆိုတော့ စ၊ ဆ၊ ဇ၊ ဈ၊ ည။ ကျွန်တော်လည်း သူ့လို့ ပဲ အင်္ဂါနေ့ မွေးပေမယ့် အဖေအမေက ဘာကြောင့်လဲမသိ အောင်မျိုးလို့ နာမည်ပေးခဲ့သည်။ အကြောင်းတစ်ခုခုတော့ ရှိမည်ထင်ပါသည်။ ကျန်းမာရေး ဒါမှမဟုတ် ဘ၀မှာ တိုးတက်ကြီးပွားအောင် စသည်ဖြင့် မြန်မာ့ နာမည်ပေးက ဥပဒေသ စုံလှသည်။ ဒီလူက အလှူကို သူ့မွေးနေ့နဲ့ အကိုက် လုပ်တာ ထင်သည်။ ကမ္ပည်းတွေက သီတင်းကျွတ်လပြည့်နားချည်းပင်။ ရက်နည်းနည်း အတိုးအဆုတ်ဖြစ်ကာ လွဲသွားသည် ထင်သည်။ ရှာနေတာကို တွေ့သွားပြီမို့ ဆော့ကစားလို့ ပြီးသွားတဲ့ ကလေးတစ်ယောက်လို ကျေကျေနပ်နပ် ဖြစ်သွားပြီး ဟိုဒီ ဆက်ကြည့်နေမိသည်။ ဒီလူက အပြီးအပိုင်များ သာသနာ့ဘောင် ၀င်သွားလေသလား။ မိဘတွေက သားတစ်ယောက်တည်းဆိုတော့ ပေးဝင်ပါ့မလား။ တီဗွီဇာတ်လမ်းတွဲ တစ်ခုလိုပင် စိတ်ဝင်စားစရာ ဖြစ်လာသည်။

အဲဒီ အချိန်မှာပဲ တိုက်တိုက်ဆိုင်ဆိုင် ခေါင်းလောင်းကြီးထားတဲ့ အဆောက်အအုံနဲ့ မလှမ်းမကမ်းက အင်္ဂတေ ခုံတန်းလျားတစ်ခုရဲ့ ကမ္ပည်းမှာတော့

ကုက္ကိုတန်းရွာနေ ဦးမျိုးဝေ + ဒေါ်ခင်လေး ၊ သား မောင်အောင်မျိုး ကောင်းမှု

၁၃၄၂ ခု သီတင်းကျွတ်လပြည့်နေ့

‘သြော်၊ ဒီလူ သာသနာ့ဘောင် အပြီးဝင်တာ မဟုတ်ဘူးပဲ။ တော်တော် အရွယ်ရောက်တဲ့ အထိလည်း အဲဒီရွာမှာ ရှိနေတုန်းပဲ။ ပြည့်စုံကြတယ် ထင်ပါရဲ့။ လှူနိုင်လိုက်ကြတာ။ ခုံတန်းကြီးကလည်း ကောင်းလိုက်တာ။ ကိုယ့်ဘာသာ တစ်ယောက်တည်း လှူတာဆိုတော့ သူ့မွေးနေ့နဲ့ အချိန်ကိုက် ဖြစ်အောင် ကမ္ပည်းထိုးလိုက်နိုင်တယ် ထင်ပါရဲ့’ စသည်ဖြင့် မရေမရာ အချက်အလက်တွေ ပေါ်မှာ အခြေခံပြီး ကျကျနန အတွေးဆန့်ရင်း စာတန်းကိုလည်း နောက်တစ်ခေါက်ပြန်ဖတ်ရင် ပြုံးနေမိပါသည်။

‘ဘာတွေ သဘောကျနေတာလဲ ဦးလေးရ။ ကျွန်တော်တို့ က ဦးလေး ပျင်းနေပြီ ထင်တာ။’

ကျောင်းသားလေးထဲက နှစ်ယေက်က ကျွန်တော့်အနား ဘယ်အချိန်က ရောက်လာသည်မသိလိုက်။ ကျန်တဲ့ လေးယောက်ကိုတော့ ခေါင်းလောင်းကြီးနားမှာ တွေ့လိုက်သည်။

‘သြော် ဘာမှ မဟုတ်ပါဘူးကွာ။ ဟိုဟာလေ။’

လက်က ဘာရယ်မဟုတ် ခုံတန်းလျားက ကမ္ပည်းကို လက်ညှိုးညွှန်မိသည်။ ကျောင်းသား တစ်ယောက်က ကျွန်တော့်နာမည်ကို ကားလာငှားကတည်းက မေးပြီး သိထားသူမို့ ကမ္ပည်းကို ဖတ်ရင်း

‘သြော်။ ဦးလေးတို့ လှူထားတာလား။’

ခေါင်းကို ခပ်ဖြည်းဖြည်းခါရင်း

‘မဟုတ်ပါဘူးကွာ။ အရမ်းခင်တဲ့ နာမည်တူ သူငယ်ချင်းတစ်ယောက်ပါ။’

‘သြော်’

ဘုရားအရိပ်လာပြီး ညာသလို ဖြစ်လေမလား။ ဒါပေမယ့် ကျွန်တော့် စိတ်ထဲမှာတော့ ကမ္ပည်းစာ လေးခု ဖတ်ပြီးချိန်မှာ အရမ်းရင်းနှီးကြပြီးသားလူတွေလို ခံစားရသည်။ သာဓု သာဓု သာဓုပါ သူငယ်ချင်းရေ။

‘ဦးလေး ကြည့်ချင်သေးတာ လုပ်ချင်သေးတာ ရှိသေးရင် အေးဆေးလုပ်နော်။ ကျွန်တော်တို့ ကားနားက စောင့်မယ်။’

သူတို့က သဘောကောင်းလို့ စောင့်မယ်ဆိုပေမယ့် ကျွန်တော်က ခပ်သွက်သွက်ပဲ သူတို့ နောက်က လိုက်သွားလိုက်သည်။

(င) ဒီလိုနဲ့ပဲ နေစောင်းစပြုလာနေပြီ။ သူတို့ စားဖို့ ရွေးလိုက်တဲ့ ထမင်းဆိုင်က ကောင်းလွန်းသည်။ ဈေးကြီးမည့်ပုံပင်။ တခြားဆိုင်မှာ သွားစားရင်ကောင်းမလား စဉ်းစားနေတုန်းကိုပဲ တစ်ယောက်က

‘ဦးလေး။ ကျွန်တော်တို့ ကျွေးမှာနော်။ အားမနာပါနဲ့ဗျ။ လာပါ။’

သူတို့ရဲ့ လှိုက်လှဲ ဖော်ရွေမှုမှာ ကျွန်တော်စိတ်ချမ်းသာ လက်ချမ်းသာဖြင့် မျောပါသွားသည်။ တစ်စားပွဲစီ စားကြသည်မို့ ရွံ့စရာ အားနားစရာလည်းမလို။ လက်ဖက်ထမင်းက ခံနေတော့ မဆာ့တဆာ ဖြစ်နေတာဆိုးသည်။ လက်ရာကကောင်းတော့ ဆာဆာနဲ့သာ စားလိုက်ရရင်ဟု စားနေရင်း တန်းလန်းကို လောဘကြီးနေမိသေးသည်။ ဒီလို ကားအငှား ခဏခဏ ရလျှင် ကောင်းမည်။ ကျွန်တော့်သားတွေကတော့ သူတို့လောက် သဘောကောင်းနိုင်မည်မထင်။ သဘောကောင်းချင်ရင်တောင် အဲသလောက် အင်အားမရှိဟု ကျွန်တော်သိပါသည်။

စားပွဲချင်းကပ်လျက်မို့ သူတို့ ပြောတဲ့ စကားတွေကို ကြားနေရသည်။ ကျွန်တော့်နာမည် ပါလာတာကိုလည်း သတိထားမိသည်။ သူတို့ကတော့ ရိုးရိုးသားသားပြောနေသည်မို့ထင်သည်။ အသံကိုလည်းပုံမှန်အသံဖြင့် အေးအေးဆေးဆေးပင် ပြောနေကြသည်မို့ ပြတ်ပြတ်သားသားပင် ကြားနေရသည်။ ကျွန်တော် ခုနက ကမ္ပည်းကို ဖတ်နေတဲ့ အကြောင်း ပြောနေကြခြင်းပင်။ ကောင်မလေးတစ်ယောက် ပြောသည်။

‘အဲဒါပြောတာပေါ့ဟဲ့။ ဂုဏ်လိုချင်လို့ သက်သက်ချည်းပဲ ကမ္ပည်းထိုးကြတာ မဟုတ်ဘူးလို့။ ငါတို့ အမှတ်တရ ဓါတ်ပုံ ရိုက်ကြသလိုပေါ့ဟ။ တစ်ခါတစ်လေ အမှတ်တရ ပြန်ကြည့်ရတာ ဘယ်လောက် ကောင်းသလဲ’

သူ့ဥပမာက မြင်လွယ်ပေမယ့် နောက်ကောင်မလေး ၀င်ပြောတာကို ပို သဘောကျသည်။

‘ကိုယ် ပြုခဲ့ ဖူးတဲ့ ကုသိုလ်ကို ပြန်အမှတ်ရပြီ ပီတိပြန်ဖြစ်ရတာ ကုသိုလ်ရတယ်ဟဲ့။’

ကျွန်တော်က အသက်ကြီးပေမယ့် သူပြောတာ ဟုတ်သလား မဟုတ်သလား သိရအောင်က ဘာသာရေးနဲ့ မနီးစပ်လှ။ ခုကြည့်ရတာက ကျွန်တော်က ကျွန်တော့်နာမည်တူရဲ့ ကမ္ပည်းစာကို ဖတ်တာက စလို့ ကမ္ပည်းထိုးလှူခြင်းအကြောင်းစကားစပ်၊ အဲဒီလို လှူတာကို ကောင်လေးတွေက ပကာသန နွယ်တယ်လို့ ဝေဖန်လေသလားမသိ၊ ကောင်မလေးတွေက အကောင်းဖက်က တွေးပြပြောပြပေးနေတာ ဖြစ်နိုင်သည်။ သူတို့ လူငယ်လေးတွေလည်း ဒီလို လေးလေးနက်နက် ကောင်းကောင်းမွန်မွန်တွေ ထိုင်ဆွေးနွေးတတ်ကြသည်ပင်။ ကျွန်တော်ကတော့ ခုအချိန်ထိတောင် ဒီလို ကိစ္စမျိုးတွေ တခုတ်တရ ဘယ်သူနဲ့ မှ မပြောဖြစ်။ အိမ်မှာ တစ်ခုခု လှူကြ တန်းကြစို့လို့ မိန်းမက ဆိုလာရင်တောင် ‘မင်း ကြည့်ကျက်လုပ်ကွာ။ မင်းလုပ်တတ်တာပဲ’ ပြောပြီး နောက်ကပဲ လိုက်ကာ ခိုင်းတာလုပ်ပေးလိုက်တာ များပါသည်။ ငယ်ငယ်ကဆိုရင်တော့ ခု သူတို့လို ဒီလိုအကြောင်းအရာတွေ ဆွေးနွေးဖို့ မပြောနဲ့။ ဆိုးလွန်း ရိုင်းလွန်းလို့ဆိုပြီး စကားဟဟ လာပြောသူတောင် သိပ်မရှိ။ မိန်းမရတော့ ကိုယ့်မိဘတွေကပင် ကိုယ့်မိန်းမကို အသနားပိုကြရှာသည်။ သားနှစ်ယောက် ရပြီး တော်တော်ကြာမှ သမီးတစ်ယေက်မွေးလာတော့ ‘ဒီသမီးတစ်ယောက်ရမှ ဒီကောင် လိမ္မာလာတာ’ ဆိုပြီး သမီးလေးကို အမွှမ်းတင်ကြသည်။ ကိုယ့်ကိုယ်ကို ဆန်းစစ်ကြည့်တော့လည်း ဟုတ်သလိုလို ထင်မိသည်။ သမီးကြောင့်ပင် ကျွန်တော် ပြောင်းလဲပစ်ခဲ့ စွန့်လွှတ်ပစ်ခဲ့တဲ့ အကျင့်တွေ အများကြီး ရှိပါသည်။ ကိုယ်ကိုယ်တိုင်တောင် မသိလိုက်ပါ။ ဘေးလူတွေက ထောက်ပြ ပြောပြကြမှပဲ ဘာတွေလုပ်ခဲ့မိမှန်း ကိုယ့်ကိုယ်ကို သိတော့သည်။ ထမင်းစားပြီးတော့ ဆိုင်ကအထွက်မှာတော့

‘ဦးလေးရေ။ ရှေ့နားကျရင် ဘုန်းကြီးကျောင်း တစ်ကျောင်း ၀င်ဦးမယ်။’

မြသိန်းတန်ကို အရင်သွားမယ် ထင်ထားသော်လည်း သူတို့က ဘုန်းကြီးကျောင်းကို အရင်ဝင်မည်ဆိုသဖြင့် ဘုန်းကြီးကျောင်းကို အရင်သွားကြသည်။ လမ်မကြီးဘေးကနေ လမ်းသွယ်တစ်ခုထဲကို တော်တော်ချိုးဝင်သွားရသည်။ ကျောင်းကြီးက အိုလှပြီ ဖြစ်သော်လည်း ခိုင်ခံ့ ၀ံ့ထည်လှသည်။ ကျောင်းဝင်းတစ်ခုလုံး အရိပ်ရအပင်ကြီးများဖြင့် အေးချမ်းတိတ်ဆိတ်နေသည်။ စက္ကူသေတ္တာထဲက ဘာတွေလဲတော့မသိ ကျွတ်ကျွတ်အိတ်နဲ့ ထည့်ထားတာတွေကို သယ်ကာ အားလုံး ကျောင်းပေါ်တက်ကြတော့ ကားနားမှာပဲ ဝေ့လည်လည်ချန်နေခဲ့လိုက်သည်။ ကျောင်းက ရဟန်းသိပ်များများစားစား ရှိဟန်မတူ။ တစ်ချိန်ကတော့ ပို စည်ကားခဲ့ပုံရသည် ထင်မိသည်။ ကျောင်းဝင်းထဲမှာလည်း အဆောက်အအုံလေးတွေ ဟိုးနားတစ်လုံး ဒီနားတစ်လုံး။ ကျောင်းပေါ်က ဘုရားရှိခိုးသံကြားတော့ ကားနဲ့ ခပ်လှမ်းလှမ်းမှာ ဆေးလိပ်သောက်ရင်း နားစွင့်နေမိပြန်သည်။ ဘုန်းကြီးကတိုင်ပေးသံ ကျောင်းသားများကနောက်က လိုက်ဆိုသံကိုကြားရတော့ ကြာဦးမယ်ထင်ပါရဲ့ ဟုတွေးမိသည်။ ခြေလှမ်းများကလည်း ဘာရယ်မဟုတ် ခပ်လှမ်းလှမ်းပိတောက်ပင်ကြီးရဲ့ အောက်က ဇရပ်ကလေးဆီ ဦးတည်လိုက်မိသည်။ သွပ်မိုး ပျဉ်ခင်း ဇရပ်ကလေးက မျက်နှာဝလေးပင် နောက်ကိုငါးပင် ဖြစ်ပြီး တောင့်တေင့်တင်းတင်း ခိုင်ခိုင်မာမာနဲ့ ကျယ်ကျယ်ဝန်းဝန်း လင်းလင်းချင်းချင်း။ ပိတောက်ရွက်တွေကတော့ တဝေ့ဝေ့တောက်လျှောက်ကြွေကျနေသည်မို့ မြေပြင်ပေါ်မှာ များလွန်းလှသည်။ လေသင့်လျှင် ရွေ့ပါသွားကြရင်းကပင် ချိုးချိုးချွတ်ချွတ် မြည်နေသေးသည်။ ဇရပ်က လူတစ်ရပ်လွတ်အောင်လဲမမြင့် နိမ်လည်း မနိမ့်လှပေ။ ဇရပ်အောက်မှာတော့ မှန်မှန်လှည်းကျင်းသည်ထင်သည်။ သစ်တချို့ ပုံထားပြီး အားလုံး သပ်သပ်ရပ်ရပ်ပင်။ ခွေးတစ်ချို့ အိပ်နေကြသည်ကို တွေ့တော့ ကြောက်မိသော်လည်း သူတို့က ခေါင်းပင်ထောင်မကြည့်ပေ။ ဘုန်းကြီကျောင်းနေကြသည့် ခွေးတွေဆိုတော့ လူဝင်လူထွက် ယဉ်ပါးပုံပင်။ ဇရပ်ကို တက်သည့်လှေကားက ငါးထစ်ပဲရှိသည်။ အနိမ့်ဆုံးအထစ်က အုတ်ပြင်ကျယ်ကျယ်နဲ့ ဖိနပ်ချွတ်လို့ ရအောင်လုပ်ထားသည်။ ဘုန်းကြီးကျောင်းဝင်းထဲဆိုတော့ လူတွေအနေနဲ့က ဘယ်သူမှ ဖိနပ်စီးကြမှာ မဟုတ်ပေမယ့် ဘုန်းကြီးရဟန်းတွေ အကြောင်းရှိလို့ ကြွလာရင်တော့ အဆင်ပြေပေလိမ့်မည်။ ပထမ လှေကားထစ်ပေါ်ခြေချရင်း မသိစိတ်က တခုခု လှုံ့ဆော်သလို ခံစားရကာ ခေါင်းကို မော့အကြည့်မှာပဲ ဇရပ်ရဲ့ နဖူးစည်းကမ္ပည်းစာတမ်းက သူ့ကို အံ့သြသွားစေခဲ့သည်။ တော်တော် လှူနိုင်တဲ့ မိသားစုပါပဲ။

ကုက္ကိုတန်းရွာနေ ဦးမျိုးဝေ + ဒေါ်ခင်လေး ၊ သား မောင်အောင်မျိုး ကောင်းမှု

၁၃၄၇ ခု သီတင်းကျွတ်လပြည့်နေ့

၁၃၄၇ ဆိုတော့ ဒီလူ့အသက် အစိတ်ရှိပြီ။ ဒီအချိန်ထိ ဒီလူက အိမ်ထောင်မကျခဲ့လေသလား။ ကျွန်တော်ဆို အဲဒီအရွယ်မှာ သားနှစ်ယောက်တောင်ရနေပြီ။ ဒီလူ တယ်ညံ့တာပဲ လို့ စိတ်ထဲကပဲ ခပ်တိုးတိုးလှောင်လိုက်ရင်း တစ်ဦးတည်းသော သားဆိုတော့ မိဘတွေကများ ချုပ်ချယ်လွန်းခဲ့လေသလား။ သူကိုယ်တိုင်က မစွံခဲ့သူလား။ မိဘနဲ့ ချစ်သူကြား အသည်းကွဲခဲ့ရသူလား။ ကျွန်တော့်မှာတော့ အချစ်ရေးနဲ့ ပတ်သက်ပြီး သိပ်ကဗျာမဆန်ခဲ့။ အသက်နှစ်ဆယ်မပြည့်သေးတဲ့ ကျွန်တော်နဲ့ အဲဒီအချိန်က ကျွန်တော့် ကောင်မလေးတို့ အလည်လွန်နောက်ကျခြင်းက ‘နင် ငါ့နောက်လိုက်ခဲ့ဟာ’ လို့ ခေါ်ဖြစ်တဲ့ဆီရောက်ပြီး အိမ်ထောင်ကျခဲ့သည်လို့ တိုတို လွယ်လွယ်ပြောလို့တောင် ရပါသည်။ ကျွန်တော့်အိမ်နားက ဒေါက်တာ သောင်းလှ သားလို ယောက်ျားမဟုတ် မိန်းမမဟုတ်ကောင် ဖြစ်နေတာတော့ မဟုတ်ဘူးထင်ပါရဲ့။ ဒေါက်တာ သောင်းလှသားကို ကြည့်ကြည့်ပြီး ကျွန်တော်သားအလတ်ကောင် ငယ်ငယ်ရွယ်ရွယ်တစ်ခုလပ် ဖြစ်သွားတာကိုတောင် တော်ပါသေးရဲ့လို့ ကျွန်တော့်မှာ ကျိတ်ကျေနပ်နေရသည်။ လိမ္မာတယ် လိမ္မာတယ်ဆိုပြီး အဲသလို ပေါက်ကရမလုပ်တာ တော်ဦးမည်။ ဒေါက်တာ သောင်းလှကတော့ ဆရာဝန်မို့ထင်သည်။ သူ့သားကို သူက အေးအေးဆေးဆေး လက်ခံနိုင်ပုံပင်။ ဦးမျိုးဝေ ဒေါ်ခင်လေးတို့ကတော့ ရွာကဆိုတော့ ကျွန်တော့်လိုပဲ နေပါလိမ့်မည်။ သားအလတ်ကောင် တစ်ခုလပ်ဆိုမှ ဒီ အောင်မျိုးလည်း တစ်ခုလပ်ဖြစ်နေနိုင်သားပင်။ တစ်ခုလပ်ဆို မိဘကလည်း ကမ္ပည်းမှာ မိန်းမနာမည် ဘယ်ထည့်မလဲ။ မုဆိုးဖို ဆိုရင်မှ မိန်းမနာမည် ထည့်ချင်ထည့်ဦးမည်။ သဘာဝကိုကလည်း ကျွန်တော်တောင် ကျွန်တော့်သားတစ်ခုလပ်ဆိုတာ တစ်ခါတစ်ခါ မေ့မေ့နေသည်။ ကိုယ့်သားကိုယ် လူပျိုပဲထင်နေမိသည်။ ‘ဒါပေမယ့် ဒီလူကတော့ မုဆိုးဖိုတွေ တစ်ခုလပ်တွေ ချောက်တောက်တောက်တွေ အဲသလို ဟုတ်ချင်မှလည်း ဟုတ်မှာပေါ့။ ပြည့်စုံချမ်းသာပုံရတော့ တက္ကသိုလ်တွေဘာတွေ တက်တယ်ထင်ပါရဲ့။ အဲသလို လူတွေက အိမ်ထောင်ပြုတာနောက်ကျတတ်ကြတာပဲ’ ဟု ကိုယ့်ကိုယ်ကို ပြောလိုက်ရင်း ရှေ့သွားဖြစ်မယ့်နေရာတွေကျရင် ကမ္ပည်းတွေကို ဂရုတစိုက် ဖတ်ဖို့ သေချာနေတော့သည်။ မိန်းမတွေ ဘာတွေ ရပြီး သူအဖေအမေတွေလိုပဲ သားသမီးတွေ ဘာတွေနဲ့ လှူထားတာတွေဘာတွေ လာလောက်သည်။ ဘမျိုးဘိုးတူခဲ့ရင်ပေါ့လေ။ ကျွန်တော်မတွေ့လိုက်ပဲ လမ်းမှာ ကျော်သွားခဲ့တာတွေ ထဲမှာရော မပါဘူး ပြောနိုင်မလား။

(စ) ကျောင်းသားအုပ်စု ဘုန်းကြီးကျောင်းပေါ်က ဆင်းလာတော့ ကားထဲ အရင်ဦးအောင် ၀င်ထိုင်စောင့်နေလိုက်သည်။ ခုတောင် နေ တော်တော် ကျနေပြီ။ အချိန်က သိပ်ကျန်တာ မဟုတ်။ ရနိုင်သမျှ ကမ္ပည်းတွေ များများ ဖတ်ဖြစ်ချင်သေးသည်။ ကိုယ့်ကိုယ်ကိုလည်း စိတ်ထဲက ကျိတ်ပြုံးမိသည်။ ကျွန်တော်ပုံစံက သိသိသာသာ လောလောလောလောဖြစ်နေသည်ထင်သည်။

‘ဦးလေး အိမ်အပြန်နောက်ကျမှာ စိုးလို့လား။ မြသိန်းတန် သွားပြီးရင် ပြီးပါပြီ ဦးလေးရဲ့။ အဲဒီမှာကလည်း ခဏပါပဲ။’

‘ဟာ။ မဟုတ်တာ မောင်ကျောင်းသားတို့ရာ။ အေးအေးဆေးဆေးလုပ်ပါ။ ဦးလေးက မင်းတို့ မြသိန်းတန်မှာ အေးအေးဆေးဆေး နေရအောင်လို့ပါ။’

မြသိန်းတန်ဘုရားဘက်ရောက်လာတော့ နေရောင်အကျမှာ မင်းကွန်းသည် အလှကြီးလှနေသည်။ ဘုရားခြေရင်းမှာ ကားရပ်ရပ်ချင်း အားလုံး ဆင်းကြသည်။ သူတို့တွေ ပန်းတွေဘာတွေ ၀ယ်နေတုန်း ကျွန်တော် ဘာကြောင့်ရယ်မသိ ဆန္ဒစောကာ ဘုရားပေါ် အရင်တက်လာခဲ့လိုက်သည်။ ဘုရားပေါ်တက် ဘုရားဝတ်ပြုပြီးတာနဲ့ လုပ်ငန်းစပြီ။ မန္တလေးမြို့နေ ဦးထွန်းခင်။ မဟုတ်သေးဘူး။ နောက်တစ်ခု။ ရန်ကုန်မြို့ မြောက်ဥက္ကလာပ။ ဒါလည်း မဟုတ်သေးဘူး။ အဆင့်တွေများလှသော ဘုရားပုရ၀ုဏ်အတွင်းမှာ ဘာရယ်မဟုတ် ရှာပုံတော်မင်းသာကြီး ဖြစ်နေသည်။ ကျွန်တော်တစ်သက်မှာလည်း စိတ်ဝင်စားဖို့ အကောင်းဆုံး အလုပ်တစ်ခုလို ထင်လာမိသည်။ ဆိုးသည်မဟုတ် ကောင်းသည်မဟုတ် ဆင်းရဲသည်မဟုတ် ချမ်းသာသည်မဟုတ် သမားရိုးကျ နေ့တွေကို ကျွန်တော်ဖြတ်သန်းခဲ့တာ များလွန်းလို့ ထင်ပါရဲ့။

ဒီလိုနဲ့ မတွေ့မတွေ့နဲပဲ ဘုရားခြေရင်း တံတိုင်းတွေက ကမ္ပည်းတွေကို လိုက်ဖတ်တော့မှ တွေ့လိုက်ရတာက

ကုက္ကိုတန်းရွာနေ ဦးမျိုးဝေ + ဒေါ်ခင်လေး ၊ သား မောင်အောင်မျိုး ကောင်းမှု

၁၃၃၀ ခု တပေါင်းလပြည့်ကျော် ၈ ရက်

ဒါကကျတော့ ဒီလူ ကလေးတုန်းက လှူခဲ့တာပဲဟု တစ်ယောက်တည်း တွက်ချက် မှန်းဆကြည့်နေမိသည်။ ဒီတစ်ခုကျတော့ သူ့မွေးနေ့နဲ့ ချိန်လှူတာမျိုးလည်း မဟုတ်။ ဘာပဲဖြစ်ဖြစ် ဒီလူက တော်တော်တော့ ကံကောင်းတာပင်။ ဘယ်လောက် ပြည့်စုံသလဲ မပြောနိုင်ပေမယ့် အတိုင်းအတာ တစ်ခုအထိပြည့်စုံပုံရတယ်လို့တော့ထင်မိသည်။ ကျွန်တော့်ကားကို ငှားစီးလာကြတဲ့သူငယ်တွေလို ယဉ်ယဉ်ကျေးကျေးလူတစ်ယောက် ဖြစ်မည်လို့လည်း သေချာနေမိသည်။

‘ငါလည်း ပိုက်ဆံလေး ဘာလေး စုပြီး တစ်ခုခု မှတ်မှတ်ရရလေး လှူဦးမှပါ’။ စိတ်ထဲမှာ တီးတိုးရေရွတ်ရင်း ဘာရယ် မဟုတ် ၀မ်းနည်း အားငယ်သလို ခံစားရသည်။ အသက်ကြီးလာလေ လူဆိုတာ အတွေးပိုများလေပဲ ထင်သည်။ အောက်ခြေ ဘုရားပတ်လမ်းမှာ လျှောက်လာရင်း နည်းနည်းလေးပင်သွားတဲ့ စိတ်ကြောင့်ပဲ လမ်းလျှောက်တာကလည်း နှေးသွားသည်။ လက်နှစ်ဖက်ကို နောက်ပစ်ထားရင်း တစ်ခုခုကို ၀မ်းနည်းသလို ခံစားလာရသည်။ ထူးဆန်းသော အဲဒီခံစားချက်က ပိုပိုတိုးလာသလိုပင်။ ကျွန်တော်မျက်နှာက ညိုမှောင်နေခဲ့သည် ထင်သည်။ ဘာဖြစ်လို့လဲဆိုတော့ သူတို့က ကျွန်တော့်ကို စိတ်မကောင်းသလို လှမ်းကြည့်နေကြသည်။ ကိုယ့်ကို ကြည့်နေကြပါလားလို့ သတိဝင်မှ သေသေချာချာ ပြန်ကြည့်လိုက်တော့ ကျွန်တော့်ကျောင်းသားအုပ်။ သူတို့ အားလုံးက ခပ်လတ်လတ်အရွယ် ခေါင်းလောင်းလေးနံဘေးမှာ ရပ်နေကြသည်။ သူတို့က ကျွန်တော့်ကို ဝေေ၀မှိုင်းမှိုင်း ဘာလို့ ငေးကြည့်နေကြပါလိမ့်။ ကျွန်တော် မျက်နှာကို ကြိုးစားအားတင်းပြင်လိုက်ပြီး သူတို့ရပ်နေတဲ့ နေရာဆီ ဆက်လျှောက်လာခဲ့သည်။ စိတ်ထဲမှာလည်း ကိုယ့်ကိုယ်ကို ငါတော်တော် ကြောင်တာပဲဟု အထပ်ထပ်ပြောနေမိသည်။ သူတို့ကြည့်ရတာ ဒီနားမှာ ရပ်နေတာ ကြာပြီထင်သည်။ ကျွန်တော် သူတို့အနား နီးလာတော့ အားလုံးက ခေါင်းလောင်းဆီ ကျွန်တော်လာလို့ ရစေချင်ပုံဖြင့် လူရှဲပေးလိုက်ကြသည်။ ဒါက ထူးဆန်းပါသည်။ ဒါပေမယ့် ကျွန်တော့်စိတ်မှာ ထူးဆန်းနေသည်ဟု ခံစားလို့မရ။

‘ကျွန်တော်တို့ ကားပေါ်က စောင့်မယ် ဦလေး။ ဦးလေး အေးအေးဆေးဆေး လုပ်စရာရှိတာလုပ်ပါ။ ပြီးရင် ကျွန်တော်တို့ ပြန်ရုံပဲလေ။ အေးအေးဆေးဆေးနေနော် ဦးလေး။ အားမနာနဲ့နော်။’

ကျောင်းသားတစ်ယောက်က ဦးဆောင်ပြောပါသည်။ တစ်ခုခုတော့ လွဲနေသလိုပင်။ သူတို့ မျက်လုံးတွေထဲမှာ ကျွန်တော်မြင်ရတဲ့ ကျွန်တော့် အတွက် ကရုဏာသည် လိုတာထက် ပိုနေသလိုပင်။ ဒါမှမဟုတ် သူတို့ဘာသာ တစ်ခုခုကို ၀မ်းနည်းနေကြတာလည်း ဖြစ်နိုင်ပါသည်။ သူတို့အားလုံး ထွက်သွားချိန်မှာ ကျွန်တော်နဲ့ ခေါင်းလောင်းသည် မျက်နှာချင်းဆိုင် နှစ်ယောက်တည်းကျန်ခဲ့သူ လူသားနှစ်ယေက်လို ဖြစ်သွားသည်။ ခေါင်းလောင်းကို ခေါင်းလောင်းထိုးချင်သူတွေ အဆင်ပြေလောက်တဲ့ အမြင့်မှာ ချိတ်ဆွဲထားပြီး သစ်သား ထိုးတံကိုလည်း အရန်သင့် ထားထားပေးထားသည်။

ဘာပဲပြောပြော ခုလက်ရှိခဏမှာတော့ ခုနလေးတင် ဘုရားပေါ်တက် ဘုရားရှိခိုးရင်း ပိုက်ဆံနည်းနည်း လှူခဲ့ပြီမို့ ကျွန်တော့်မှာ ခေါင်းလောင်းထိုး ဝေငှစရာတော့ ရှိနေခဲ့ပါပြီ။ ခေါင်းလောင်းထိုးတံကို ကောက်ကိုင်လိုက်ပြီး ခေါင်းလောင်းထိုးဖို့လက်ကို အမြှောက် ကျွန်တော်ရဲ့ မျက်လုံးတွေက ခေါင်းလောင်းရဲ့ အပေါ်နား ပတ်လည်က ကမ္ပည်းလေးကို ဖတ်မိလျက်သား ဖြစ်နေခဲ့သည်။

ကုက္ကိုတန်းရွာနေ ဦးမျိုးဝေ + ဒေါ်ခင်လေး တို့က ကွယ်လွန်သူ သား မောင်အောင်မျိုး အားရည်စူး၍

ကျွန်တော့်မျက်လုံးတွေ ချက်ချင်းေ၀၀ါးသွားခဲ့တာ ကျွန်တော်သိလိုက်သည်။ မြသိန်းတန် ဘုရားဆီမှ ခေါင်းလောင်းဆည်းလည်းလိုလို အသံတွေက ရုတ်ချည်း ပီပြင်ကြည်လင်လာသလို ခံစားရသည်။ ရက်စွဲ။ ရက်စွဲ။ ကျွန်တော် ဖတ်ကြည့်နိုင်ဖို့ ကြိုစားသည်။ ဒါပေမယ့် ကျွန်တော်သဲသဲကွဲကွဲ မမြင်ရ။ ကျွန်တော်မျက်တောင်ခတ်လိုက်ရင်တော့ မြင်ရကောင်း မြင်ရသွားနိုင်သည်။ ဒါပေမယ့် ကျွန်တော် မျက်တောင်ခတ်လိုက်ဖို့ အားမထုတ်ချင်ခဲ့။ ခေါင်းလောင်းလေး ဘယ်လောက် အိုမင်းနေသလဲဆိုတာကို ကြည့်ရုံနဲ့တင် ဒီရက်စွဲကို ကျွန်တော် ရင်ထဲမှာ မှန်းဆလို့ရနေသည်။ မြင်ရတော့ရော ဘာထူးမှာလဲ။ ပြီးတော့ လှည့်မကြည့်ဘဲနဲ့ ကျွန်တော့်နောက်မှာ ခေါင်းလောင်းထိုးဖို့ တစ်ယောက်ယောက်စောင့်နေတာကိုလည်း ကျွန်တော်သိသည်။ ဒီတော့ အချိန်မဆိုင်းဘဲ ကျွန်တော်လက်တွေကို လှုပ်ရှားလိုက်ပါသည်။

ခေါင်းလောင်းထိုးတံက ခေါင်းလောင်မျက်နှာပြင်ကို ထိခတ်သွားတိုင်း ကျွန်တော့် နှလုံးသားနဲ့ အဇ္ဈတ္တကို တစ်ခုခုက လာပုတ်ခတ်တာ ခံစားရသည်။ လေထဲမှာ ပျံ့သွားသော ခေါင်းလောင်းသံသည် ချိုသာလွန်းလှသည်။ သို့သော် ရှိုက်သံဆန်လှသည်။ မြသိန်းတန် ဘုရားရဲ့ နေ၀င်ချိန်သည် တိမ်ရောင်စုံတို့ ဖြင့် တောက်တောက်ပပ လှနေခဲ့သည်။ ငှက်သံ ခေါင်းလောင်းသံတွေနဲ့ လှုပ်လှုပ်ခတ်ခတ်ရှိလှသည်။ ဒီအချိန်ဆို ဘုတ်မင်းကန်မှာလည်း နေညိုရော့မည်ဟု တွေးရင်း ကျွန်တော်လွမ်းဆွတ်မိပါသည်။

အေးဘုံနဲ့ အမေ

အေးဘုံနဲ့ အမေ

(က)

ဒီနှစ်ပိုင်းတွေမှာ အချိန်တိုင်းနီးနီး သတိရမိတဲ့ အမေ့ကို ဒီရက်ပိုင်းမှာတော့ အေးဘုံ ဆိုးဆိုးဝါးဝါး ပိုလို့ကို သတိရမိတော့သည်။ ခလုတ်ထိတဲ့ အဖြစ်တွေကလည်း ရှိခဲ့ပြီလေ။ မနက်ဖြန်ဆိုရင် တန်ခူးလပြည့်။ ရွှေမောဓောဘုရားမှာ ဆွမ်းကြီးလောင်းပွဲရှိသည်။ ပဲခူးမြို့ရဲ့ အစည်ကားဆုံး ဘာသာရေးပွဲတွေထဲက တစ်ပွဲ။ ထုံးစံအတိုင်း အမေလာမှာပင်။ အေးဘုံတို့ မှတ်မိတတ်စအရွယ် ငယ်ငယ်ကတည်းက အမေမသွားဖြစ်တဲ့ နှစ်လို့ တစ်ခါမှ မတွေ့ဖူး။ ဒီနှစ်တော့ အေးဘုံလည်း ပြန်သွားမည်။ မရောက်ဖြစ်တာ ဆယ်နှစ်တောင်ရှိပြီပဲ။ ဒီတော့ အေးဘုံနဲ့အမေ မတွေ့ဖြစ်တာလည်း ဆယ်နှစ်ကျော်ရှိပြီပေါ့လေ။

(ခ)

ပဲခူးရွှေမောဓောဘုရားပွဲက တန်းခူးလပြည့်နေ့။ လဆန်းရှစ်ရက်ကတည်းက ဇာတ်ပွဲတွေက စဝင်ပြီ ကပြီ။ အများသောအားဖြင့် ဆယ်ရက် ကကြတာများသည်။ ဈေးဆိုင်တွေကတော့ တစ်လလောက်အလိုတည်းကကို စ ရောင်းနေပြီ။ ပွဲတော်ပြီးလည်း တော်တော် နဲ့ မသိမ်းကြသေးဘဲ တစ်လကိုးသတင်း မိုးမဝင်မချင်းရောင်းတတ်ကြသည်။ အေးဘုံတို့ညီအမတစ်တွေက ပွဲတွေစဝင်ပြီဆိုကတည်းက ရွာမှာ နေမရချင်တော့။ အေးဘုံကတော်သေးသည်။ အငယ်မ သုံးယောက်က ပိုဆိုးသည်။ အမေ့ကိုတော့ လော လို့မရမှန်း သူတို့အားလုံးသိကြသည်။ အမေက လပြည့်နေ့ ဆွမ်းကြီးလောင်းပွဲနဲ့မှ အကိုက်သွားတာ။ ရွာကလှည်းတွေအားလုံးကလည်း လဆန်း ၁၃ ရက် ၁၄ ရက် ကျမှထွက်ကြတာ။ စားနပ်ရိက္ခာအပြည့်နဲ့ ချီတက်လာတဲ့ လှည်းတန်းကြီးကို လမ်းတလျှောက်က ရွာတွေကလည်း နှစ်တိုင်းမပျက် အထူးအဆန်းလိုကြည့်ကြသည်။ ပဲခူးနဲ့ အေးဘုံတို့ ကရင်တိုက်ရွာနဲ့က ၉မိုင်လောက် ဝေးသည်မို့ သုံးလေးနာရီလောက် လှည်းစီးကြရသည်။ အေးဘုံတို့ ညီအမတစ်တွေကတော့ ပွဲကြည့်ဖို့ စိတ်နဲ့ ဖုန်တလုံးလုံးကြားမှာကို ပျော်မဆုံး။ သို့သော်လည်း နှစ်တိုင်းလိုပင် အေးဘုံက လဆန်း ၁၃ ရက် ၁၄ ရက်နေ့တွေ ပွဲ မကြည့်ရတတ်ပါ။ အမေက လပြည့်နေ့ဆွမ်းကြီးလောင်းပွဲကို မပျက်မကွက်သွားချင်သလို အေးဘုံကလည်း အဖော်လိုက်ပေးချင်ပါသည်။ တစ်နှစ်လုံး အမေစုထားတဲ့ အကြွေတွေ အနုတ်တွေကို ဒီပွဲမှာ လောင်းလှူတတ်သလို တစ်ခါတစ်လေလည်း ဆန်တို့ ပဲတို့ သယ်လာပြီးလောင်းတာလည်းရှိ ကြက်သွန်နီတို့ ဘာတို့ ပဲခူးဈေးကြီးထဲက ပြေးဝယ်ပြီး လောင်းလှူတာလည်းရှိသည်။ ဒီတော့ လပြည့်ည ဒါမှမဟုတ် လပြည့်ကျော်တစ်ရက်နေ့ညတွေကျမှ ပွဲကြည့်နိုင်သည်။ ဒီလို အကြောင်းတွေကြောင့်ပဲ အမေကလည်း သမီးအကြီးအေးဘုံကို သမီးလိုတစ်မျိုး တိုင်ပင်ဖော်လိုတစ်မျိုး အားကိုးတတ်သည်။ အမေက ပွဲမကြိုက်ပေမယ့် အေးဘုံတို့ ညီအမတတွေချည်းမလွှတ်ဘဲ သူပါ အိပ်ရေးပျက်ခံ ပွဲအတူလိုက်ကြည့်တတ်သည်။

'ဘုရားပွဲတော်တော့လာပြီး ပွဲလေးပဲကြည့်ပြီးပြန်ရင် ငရဲကြီးတယ်အေ့' လို့ အမေကပြောရင် မှားတာမှန်တာထက် အေးဘုံက အဲသလို မဖြစ်ရအောင် ဂရုစိုက်သည်။ အဲဒီအကျင့်က အေးဘုံ အိမ်ထောင်ကျတော့လည်း ပါလာသည်။ သားရော ယောက်ျားရော ပါအောင်ခေါ် ဆွမ်းကြီးလောင်းပွဲအမီ ရောက်အောင်လာ ဝတ်မပျက် နှစ်စဉ် လောင်းလှူဖြစ်သည်။ နောက်ရက်တွေကျမှ သားကြိုက်သော နန်းဝင်းတို့ မန္တလေးသိန်းဇော်တို့ပွဲတွေ လိုက်ပြရသည်။ တစ်ရွာသားနဲ့ အိမ်ထောင်ကျသော အမေ့အချစ်ဆုံးသမီး အေးဘုံနဲ့ အမေနဲ့ကလည်း ဒီဆွမ်းကြီးလောင်းပွဲတော်ကျမှ ပြန်တွေ့ကြ စကားလက်ဆုံကျကြရသည်။

(ဂ)

အေးဘုံ အိမ်ထောင်ကျတော့ အမေ့ခမျာ ရင်ထုမနာ ဖြစ်ရှာသည်။ စိတ်မကောင်းပေမယ့် အေးဘုံလည်း ဘာမှ မတတ်နိုင်ခဲ့။ အမေက ကိုစိန်ဝင်းကို သဘောမကျပေမယ့် လာတောင်းရမ်းတော့လည်း ‘ကျုပ်သမီး သဘောပါပဲအေ’ ဆိုကာ အေးအေးဆေးဆေးပဲ ပေးစားရှာပါသည်။ ဒါပေမယ့် သူ့သမီးတွေထဲမှာ အချောဆုံး အလှဆုံး အလိမ္မာဆုံးလို့ သူထင်ထားတဲ့ အေးဘုံအတွက်တော့ မျှော်လင့်ချက်ကြီးခဲ့သူမို့ တနုံ့နုံ့နဲ့ဖြေမရပုံပင်။ အေးဘုံကလည်း ဘာပဲဖြစ်ဖြစ် ရွာမှာတော့ အချောအလှစာရင်းထဲ တကယ်ပါသည်။ လိမ္မာသည်လို့လည်း လူကြီးသူမအများက သဘောကျကြသည်။ အားနည်းချက်ဆိုလို့ ချို့ချို့တဲ့တဲ့ မုဆိုးမရဲ့ သမီးဖြစ်နေတာပဲရှိသည်။ ဒီတော့ ပိုးသူ ပန်းသူ မများသည့်တိုင် အထိုက်အလျောက်တော့ ရှိပါသည်။ အမေကလည်း သူ့သမီးကို ချမ်းချမ်းသာသာ လူတစ်ယောက်ယောက်နဲ့ အိမ်ထောင်ကျစေချင်သည်။ ဒီတော့ ပိုးပန်းနေသူတွေထဲက ပြည့်စုံသူတစ်ယောက်ယောက်ကို ရွေးစေ့ချင်ရှာသည်။ ဒါပေမယ့် အေးဘုံက စိတ်ကူးယဉ်သည်ပဲဆိုဆို မြို့မှာ ဘုရားပွဲသွားရင်း ကြည့်ဖူးတဲ့ ရုပ်ရှင်တွေ ပွဲတွေထဲကလိုမျိုး ကိုယ့်ကို တန်ဖိုးထားပြီး ချစ်မယ့်သူမျိုး လိုချင်သည်။ ကိုယ့်ကိုယ် ပိုးသူ ပန်းသူတွေက ကိုယ့်ကို ချို့တဲ့သူမို့ ရမလားလို့ လက်တည့်စမ်းကြည့်ချင်သူတွေလို့ ထင်စရာတွေ့တာနဲ့ ဟင်ခနဲ လှည့်ပင်မကြည့်တော့။ ဒီလိုနဲ့ပဲ အပျိုကြီးတစ်ပိုင်း ဖြစ်လာတော့ အမေက သတိပေးပြီ။

အမေက သမီးတွေကို ယောက်ျားရပြီး ငြိမ်းငြိမ်းနေစေချင်ရှာသည်။ သူ့တုန်းကတော့ ငယ်ငယ်ကနေ တောက်လျှောက် ဘယ်လောက်ပဲ ဒေါင်းတည်မောင်းတည် ရုန်းကန်ခဲ့ပေမယ့် သမီးတွေကိုတော့ စည်းနဲ့ ကမ်းနဲ့ နေဖို့ကလွဲပြီး ညှာရှာသည်။ စားဝတ်နေရေးအရ သမီးတွေကို အလုပ်ကြမ်းခိုင်းရပေမယ့် ရင်အုပ်မကွာတော့ တတ်နိုင်သမျှထားရှာသည်။ တစ်နှစ်ပဲ။ အဲသည်တစ်နှစ်ကတော့ အေးဘုံတို့ရွာတွေဘက်မှာ တစ်နှစ် စိုက်ခင်းတွေ ပိုးတွေကျလိုက် တစ်နှစ်လယ်တွေရေနစ်လိုက်နဲ့ တော်တော်ကသီခဲ့တဲ့ နှစ်တွေရဲ့အလွန် တစ်နှစ်။ နလံထူကာစ နှစ်ဆိုပါတော့။ ကြွေးတင်မြေတင်ဖြစ်သွားကြရှာတဲ့ လယ်ရှင်တွေက တတ်နိုင်သလောက် ကိုယ့်ဘာသာ ကုန်းရုန်းလုပ်ကြတော့ အေးဘုံတို့ လက်လုပ်လက်စားလုပ်သူတွေ အလုပ်တော်တော်ရှားပါးခဲ့ပြီး တော်တော်လှမ်းလှမ်းက အခြေအနေကိုယ့်လောက်မဆိုးတဲ့ ရွာတွေအထိ သွားအလုပ်လုပ်ကြရသည်။ ဒီတော့ အိမ်မှာ အငယ်မသုံးယေက်ကို အမေ့ရဲ့ ငယ်ပေါင်းကြီးဖက် ဒေါ်ဒေါ်ကျော့တို့ ဒေါ်ဒေါ်သော့တို့လက်ထဲ အပ်ခဲ့ပြီး အေးဘုံနဲ့ အမေ နည်းနည်း အခြေအနေပိုကောင်းတဲ့ သနပ်ပင်မြို့ဘက်က ရွာလေးတစ်ရွာမှာ တစ်မိုးတွင်းလုံး ကောက်သွားစိုက်ကြသည်။ လယ်ရှင်တွေက နေစရာပေး ထမင်းကျွေးတာဆိုတော့ ကောက်စိုက်ခ အသားတင်ကျန်သည်။ အေးဘုံကတော့ အဲလိုတွေ ဖြစ်လာလို့ပဲ ကိုစိန်ဝင်းနဲ့ ဖူးစာဆုံတာလို့တွေးမိသည်။

ကိုစိန်ဝင်းက မပြည့်စုံလှပေမယ့် လယ်လေးနွားလေးတော့ရှိသည်။ အမေတစ်ခု သားတစ်ခုကနေ အဲဒီမိုးမကျခင်လေးပဲ သူ့အမေဆုံးသွားရှာသည်ဟုလည်း အေးဘုံသိရသည်။ အလုပ်လောဘကြီးသူမို့ပဲလား ဒါမှမဟုတ် သူ့အမေ မရှိတော့ အားနေရင် စိတ်မကောင်းစရာတွေ တွေးမိမှာပဲစိုးသလားမသိ၊ အေးဘုံတို့ ကောက်စိုက်ပေးရတဲ့ လယ်ကြီးရှင်တွေအိမ်မှာလည်း သူအားရင် အားသလို နေ့စားအလုပ် လာလာလုပ်သည်။  တခြားကောက်စိုက်မတွေကတော့ စကြနောက်ကြသည်။ 'အေးဘုံရေ။ ရွှေစွန်ညိုဘာလို့ ဝဲလဲဆိုတာ ကျုပ်တို့တော့ သိတယ်တော်ရေ' တဲ့။ ခမျာကတော့ ဘာမှ မပြောရဲရှာ။ မလှမ်းမကမ်းကနေ ငေးတာ ခိုးကြည့်တာ ခဏခဏဆိုတော့ အေးဘုံလည်း ရိပ်မိပါသည်။ အမေကတော့ သူ့ရှေ့မှာ ဒီကိစ္စကို စကြနောက်ကြလျှင် 'အဲဒီသောက်ကျိုး ညည်းတို့ယူပါလားအေ့' လို့ စိတ်ဆိုးမာန်ဆိုး ပြောတော့သည်။ ကိုစိန်ဝင်းက ငယ်ငယ်ကလေးကတည်းက ခြေတစ်ဖက်မသန်ရှာသူပင်။ ဒါပေမယ့် နောက်ဆုံးမှာတော့ မရဲတရဲ စွန့်စားပြောလာသူ ကိုစိန်ဝင်းကို အေးဘုံက ကရုဏာပိုိမိသည်။ ကိုစိန်ဝင်းက ဇွဲလည်းကောင်းရှာသည်။ အမေက အခွင့်ရရင်ရသလို မညှာမတာစောင်းမြောင်းပြောလည်း မျက်နှာတစ်ချက်မပျက်ချေ။ အမေကတော့ ရအောင်တားမယ်လို့ စိတ်ကူးခဲ့ပုံရပါသည်။ သားအမိနှစ်ယောက်တည်းရှိတာနဲ့ 'ညည်းအေ။ ညည်းရုပ်ညည်းရည်နဲ့ ဒီအကျိုးကောင်တော့ မယူပါနဲ့သမီးရယ်' ဆိုရင် အေးဘုံခမျာ ဘာမှာ ပြန်မပြောနိုင်ပဲ ကိုစိန်ဝင်းကိုသာ ကရုဏာပိုမိသည်။ နောက်ဆုံးကောက်စိုက်လို့ အကုန်ပြီးတော့ 'မအေးဘုံတို့ အမေဆီ ကျွန်တော်လာတောင်းပါရစေ' လို့ တည်တည်ကြည်ကြည်ဆိုလာသူ ကိုစိန်ဝင်းကို အေးဘုံလည်း 'ရှင်ကတိအတိုင်း ဝါကျွတ်တာနဲ့ လာတောင်းပေတော့' လို့ ခွင့်ပြုခဲ့သည်။ အမေက ဆင်းရဲတာထက် ဒုက္ခိတဖြစ်နေတာကို သဘောမကျတာ ပိုသည်ထင်သည်။ ဒါပေမယ့် အေးဘုံက 'ယူပါရစေ အမေရယ် သူ့ခမျာ သမီးကို တကယ်မေတ္တာရှိတာပါ' လို့ ငိုယိုပြောလာတော့လည်းနောက်ဆုံး လက်ခံသဘောတူပေးခဲ့ရှာပါသည်။

(ဃ)

ယောင်နောက်ဆံထုံးပါ အေးဘုံလိုက်နေတဲ့ ကိုစိန်ဝင်းတို့ရွာနဲ့ အေးဘုံတို့ရွာက ပဲခူးတနယ်တည်းပေမယ့် တောင်နဲ့ မြောက်မို့ သွားချည်လာချည်လုပ်ရလောက်အောင် နီးတာတော့ မဟုတ်။ အေးဘုံတို့လည်း ကောက်သွားစိုက်မှပင် ကိုစိန်ဝင်းတို့ရွာကို ရောက်ဖူးပြီး အရင်ကဆို ရွာနာမည်ကိုတောင် မကြားဖူးခဲ့ချေ။ ရွာနာမည်က ကမာဘာတဲ့။ ပဲခူးကနေ သနပ်ပင်ကိုသွား အဲဒီကမှ စက်လှေနဲ့ ပဲခူး-စစ်တောင်းတူးမြောင်းအတိုင်း တမေ့တမော စက်လှေစီးရသည်။ ဒါတောင် ဂလိုင်ရွာစက်လှေဆိပ်မှာဆင်းဆင်း ကိုးသိုက်ရွာစက်လှေဆိပ်မှာဆင်းဆင်း တူးမြောင်းကနေ နှစ်မိုင်ကျော်လမ်းလျှောက်ရသေးသည်။ ဒီတော့ အေးဘုံလည်း အိမ်ထောင်ကျပြီးကတည်းက အမေနဲ့ သိပ်မတွေ့နိုင်တော့။ ဒီတော့ နွေရာသီ တန်ခူးလ ရွှေမောဓော ဘုရားပွဲကျလျှင်တော့ ဆွမ်းကြီးလောင်းပွဲကို အမေလည်းလာ၊ အေးဘုံလည်းလာ၊ ဒီတော့မှ ဆုံဖြစ်ကြသည်။ ကြားထဲမှာလည်း အေးဘုံက ရွာကို တခါတလေ အလည်သွားသည်ရှိပေမယ့် အမေကတော့ လုံးလုံးလျားလျားကို အေးဘုံဆီမလာနိုင်ရှာ။ ကိုစိန်ဝင်းကိုလည်း ပဲခူးသုံးလေးခေါက်သွားရင် တစ်ခေါက်လောက်တော့ အမေ့ရွာအထိ ဆက်သွားဖို့ တစ်ခုခုနဲ့ သွားကန်တော့ဖို့ အေးဘုံက လွှတ်သည်။ ဒီလို့နဲ့ ပဲ သူလည်း ရုန်းကန် ကိုယ်လည်းရုန်းကန်ရသော ဘဝတွေမို့ သားအမိတစ်တွေ တစ်နှစ် တစ်ခါတွေ့ နှစ်ခါတွေ့နဲ့ပဲ နှစ်တွေ ကုန်သွားကြတော့သည်။

အေးဘုံအောက် အငယ်တွေကတော့ ကိုယ့်တစ်ရွာတည်းသားတွေနဲ့ပဲ အိမ်ထောင်ကျတော့ ရွာနဲ့ မခွဲမခွာနေချင်သော အမေ့အတွက် အံကိုက်ကျပါသည်။ သမီးသုံးယောက်အနားရှိနေတော့ ဟင်းသုံးခွက်နေ့တိုင်းမဟုတ်တောင် ဟင်းတစ်ခွက်တော့ နေ့တိုင်းရှိတတ်သည်။ ဒါပေမယ့် အမေက ဘယ်သမီးနဲ့မှ အတူလိုက်မနေ။ မုဆိုးမဘဝနဲ့ ရုန်းကန်ရင်း သမီးတွေနဲ့ ငယ်ငယ်ကတည်းကအတူနေခဲ့တဲ့အိမ်ကလေး အဖေခေါင်းချသွားခဲ့တဲ့အိမ်ကလေးကို တစ်ဖဝါးမခွာ။ 'ညည်းတို့ချင်းတည့်တောင် သားမက်ချင်းတည့်ဖို့က မပြောနိုင်ဘူးအေ။ ကျုပ်အိမ်နဲ့ ကျုပ်ဆိုတော့ ဘယ်သူလာလာ အဆင်ပြေတယ်' ဆိုကာ တစ်ယောက်တည်းနေသည်။ အလတ်မ ဘုတ်ဆုံက အမေ့ခြေရင်းက ခြံကွက်မှာပဲ အိမ်ဆောက်ကာ ပြောင်းနေသည်။ ညညဆိုလည်း သူ့သားတွေကို အမေ့ဆီလွှတ် အအိပ်ခိုင်းသည်တဲ့။ အေးဘုံအဖို့ကတော့ အမေအဆင်ပြေသည်ကို သိရ၍ နောက်ကြောင်းအေးလှပါသည်။ အမေ့အနေနဲ့ ဒီလို အနေနီးတဲ့ မြေးတွေကို အချစ်ပိုသည်ကိုလည်း အေးဘုံက နားလည်ပေးနိုင်ပါသည်။ ဒီတော့ တစ်နှစ်မှာ တစ်ခါ ရွှေမောဓောဘုရား ဆွမ်းကြီးလောင်းပွဲမှာ ပြန်တွေ့ကြရင်း ကြားထဲမှာလည်း တစ်ခေါက်တစ်ကျင်းဆိုသလို အေးဘုံက ရွာအထိလာလည်ရင်းနဲ့ အမေနဲ့အေးဘုံတို့အဖို့တော့ ထူးထူးခြားခြားသတိရတာ အောက်မေ့တာထက် စားဝတ်နေရေး ရုန်းကန်ရတာက ပိုပါသည်။ အဲသည်တစ်နွေ၊ လွန်ခဲ့တဲ့ ဆယ်နှစ်က အဲသည်တစ်နွေ မတိုင်ခင်အထိဆိုပါတော့။

(င)

အေးဘုံအိမ်ထောင်ကျတော့ သုံးဆယ်ကျော်စ။ အိမ်ထောင်သက် သုံးနှစ်ကျော်လာတဲ့ အထိ ကလေးမရသေး။ အေးဘုံ သားကိုမွေးတော့ သုံးဆယ့်ခြောက်တောင် တော်တော်ကျော်ပြီ။ သားသမီးမှ ရပါတော့မလား စိုးရိမ်ထား ထင်ထားလိုက်ရကာ ရလိုက်တာမို့ အေးဘုံရော ကိုစိန်ဝင်းရော သားကို မျိုထားမလောက်ချစ်ကြသည်။ အေးဘုံကို နည်းနည်းလေးမှ အငြိုအငြင်မခံသော ကိုစိန်ဝင်းက ကလေးငိုလွန်းရင်တော့ မျက်နှာညိုချင်ပြီ။ စိတ်ကောက်ချင်သလို အလိုမကျသလိုမျိုးဖြစ်ချင်ပြီ။ အေးဘုံကလည်း သူက သားကိုချစ်လို့ ဒီလိုဖြစ်တာဆိုတော့ ပိုတောင် သဘောကျမိသေးသည်။ နှစ်ယောက်သား သားကို ထားစရာနေရာမရှိသလိုမျိုး သည်းကြသည်မို့ အရပ်ထဲက လူကြီးသူမတွေက သတိပေးယူရသည်။

အမေကတော့ အေးဘုံရဲ့သားလေးထက် တစ်ရွာတည်းအတူနေတဲ့ မြေးတွေကို အနေလည်းပိုနီးသည်မို့ အချစ်ပိုသည်ဟု အေးဘုံထင်ပါသည်။ နောက်ပိုဆိုးတာက သားလေးက မျက်လုံးလေးတွေက ငယ်ငယ်တည်းက ပေကလက်ပေကလက်နဲ့မို့ အကြည့်ရခက်သည်ဟုထင်သည်။ အေးဘုံအဖို့ကတော့ သားလေးမျက်လုံးပေကလက်ပေကလက် လုပ်သည်ကပင် ချစ်စရာတစ်မျိုးကောင်းသည်ထင်သည်။ အသားဖွေးဖွေး မျက်တောင်စင်းစင်းရှည်ရှည်တွေနဲ့ မျက်လုံးလေး ပေကလက်ပေကလက်လုပ်နေလျှင် အေးဘုံမှာ သားကို ကြည့်မဝ။ ပြီးတော့ ငယ်ငယ်ကတည်းက သားက မအေကို တအားချစ်သည်။ အလိုလိုက်ကြသည်ချင်းအတူတူ ဖအေ့ထက် မအေ့ကိုပိုတာသည်။ အလိုလိုက်လွန်းသည်မို့ တစ်ခုခုလုပ်တော့မည်ဆိုရင် 'သား၊ မလုပ်နဲ့လေ' ဆိုလည်း ရှေ့တိုးလိုက်ရမှ။ ဒါပေမယ့် အေးဘုံရှေ့ဆိုရင်တော့ သူ့မျက်လုံးမှေးမှေးလေးတွေကြားကနေ ချောင်းကြည့်သေးသည်။ အေးဘုံက ခပ်တည်တည်လုပ်နေလျှင် ရှေ့ဆက်မတိုးတော့ဘဲ အေးဘုံလည်ပင်းကို သိုင်းဖက်ကာ ချွဲတတ်သည်။ ဒီတော့ အေးဘုံအတွက်ကား သားသည်အသည်း သားသည်အသက်ပမာ ဖြစ်တော့သည်။

သားလေးကိုမွေးပြီးသည့်နောက်ပိုင်း အေးဘုံ အမေ့ကိုလည်း ပိုချစ်မိပါသည်။ အမေ့မေတ္တာကို ပိုနားလည်လာသလို ခံစားရသည်။ နှစ်တိုင်းလည်း ဖြစ်နိုင်ရင် အမေ့ရွာအထိသွားလည်နိုင်အောင် ကြိုးစားရသည်။ ပဲခူးဘုရားပွဲမှာတွေ့ကတည်းက မိုးမကျခင် ဘယ်ရက်တော့ လာခဲ့ဦးမယ်ဆိုတာ ပြောထားလိုက်သည်။ အမေကလည်း မျှော်ရှာသည်။ ဒေါ်ဒေါ်ကျော့တို့ ဒေါ်ဒေါ်သော့တို့က 'ညည်းလည်း လာဦးမှပါအေ။ ညည်းအမေက အနေဝေးတဲ့သမီးမို့ထင်ရဲ့ ဒီက ဘုတ်ဆုံတို့ ဝိုင်းစိန်တို့ထက် ညည်းကို တော်တော်ချစ်ရှာ မျှော်ရှာတယ်အေ့။ ဒါပေမယ့် ကောင်မက မကြမ်းထော်ဆိုတော့ ပါးစပ်က ဖွင့်မပြောဘူးပေါ့အေ' လို့ အမေ့ကွယ်ရာမှာ အေးဘုံကို ပြောပြတတ်ကြသည်။

(စ)

သားလေးမျက်လုံးက တစ်နှစ်ထက်တစ်နှစ် ပိုဆိုးလာခဲ့သည်ထင်သည်။ ကြားထဲမှာလည်း ဆေးမြီးတို ဆရာတွေနဲ့တော့ ဟိုကု ဒီကု ကုကြည့်သည်ပင်။ ဒါပေမယ့် သားလေးကို ‘သား အမေ့ကို မြင်လား’ မေးရင် ‘မြင်တယ်အမေ’ ဆိုတော့ စိတ်ချလက်ချနေမိပြန်သည်။ သားလေး ကျောင်းထားရမယ့်အရွယ်ရောက်တော့ သားကို ကျောင်းပို့လိုက်သည်။ ဆရာမတွေက ကလေးကို အိမ်တိုင်ရာရောက် လာပြန်ပို့ပေးရင် 'အမရေ။ ကလေးက မျက်စိသိပ်ကောင်းဘူးထင်တယ်နော်။ ကျောက်သင်ပုန်းမှာ တော်တော်ကြီးကြီးရေးပြတာကို မမြင်တော့ လိုက်မကူးနိုင်ဘူး။ ကလေးကို ပဲခူးမှာ ဆေးခန်းသွားပြကြည့်ပါလား။' ဆိုလာမှပင် ခြေမကိုင်မိ လက်မကိုင်မိ ဖြစ်ရတော့သည်။ ရှိသမျှကုတ်ခြစ်ပြီး သားလေးကို ကုဖို့ ကြိုးစားရသည်။ ရှိတာလေးတွေ ရောင်းရသည်။ ပိုက်ဆံလည်း အရင်ထက် ချွေတာရင်း စုတန်သလောက် စုနိုင်အောင် ကြိုးစာရသည်။ အရင်ကထက်လည်း အလုပ်ကို ပို ပင်ပင်ပန်းပန်းလုပ်ရသည်။ သားလေးက သက်သာလာသလိုလို ရှိပေမယ့် ကျောင်းတက်ဖို့တော့ မဖြစ်နိုင်သေး။ ဘယ်တတ်နိုင်မလဲ။ အေးဘုံတို့လည်း နှစ်တန်းနဲ့ ကျောင်းထွက်ခဲ့တာပဲ။

ဒီလိုနဲ့ပဲ သားကို ရအောင် တတ်နိုင်သလောက် ကုရင်း နည်းနည်း အရွယ်ရောက်မှ စာသင်ပေးလည်းရတာပဲလို့ ဖြေတွေးရသည်။ လင်မယားနှစ်ယောက်လုံး သားကို အရင်ထက်ပို မျက်နှာ အရိပ်ကြည့်နေမိကြသည်။ သားကလည်း အံ့သြစရာကောင်းလောက်အောင်ပင်။ အရွယ်လေး ကြီးလာလေ သိတတ်လိမ္မာလေ၊ အလိုလိုက်လေ လိမ္မာလေ ဆိုရမလိုပင်။ သူတတ်နိုင်သမျှ ဖအေကို ကူသည်၊ မအေကို ကူသည်။ အနီးအနား သူမြင်သလောက်လေးကို ကြိုးစားပန်းစားကြည့်ရင်း မီးဖိုချောင်ဆိုလည်းကူလုပ်ပေးသည်။ လယ်ထဲလိုက်ပြီးလည်း ဖအေကို သူတတ်နိုင်သလောက် နွားကြည့်ပေး နွားချေးကျုံးပေးစသည်ဖြင့် အရွယ်နဲ့မမျှ ကူညီရှာသည်။ သားကို ကြည့်ရသည်မှာ စာလို သေးသေးလေးတွေကို မမြင်ရပေမယ့် ဝါးတားတားတော့ အားလုံးမြင်ရပုံပင်။ လမ်းဖြောင့်ဖြောင့်လျှောက်နိုင်သလို အဝေးကြီးကတည်းက ဖအေ မအေကို သိသည်။ တခြားကလေးတွေ ကျောင်းသွားချိန်မှာ သူ့မှာ ကျောင်းမသွားရတော့ ဖအေမအေကို သူကတပြန်အားနာနေသလိုမျိုး အလိုက်တသိ ပြောစရာမလိုအောင် သူလုပ်တတ်သမျှ ဝင်ကူတော့သည်။ ဒီတော့ ဖအေနဲ့ မအေက တစ်ခါ အသနားပိုကာ အလိုလိုက်ကြပြန်သည်။ ဒီလိုနဲ့ပဲ မုန့်လုံးစက္ကူကပ်သလို အလိုလိုက်လိုက် လိမ္မာလိုက် အသနားပိုလိုက်နဲ့ပဲ သူတို့ မိသားစုလေးမှာ သား မျက်စိကိစ္စက တစ်ခါတစ်ခါ မေ့မေ့ပျောက်ပျောက်ပင်ဖြစ်သွားခဲ့သည်။ မူလတန်းပြီးအောင်ကျောင်းတက်တဲ့ ကျောင်းသားတောင် သိပ်များများစားစား မရှိသော သူတို့ရပ် သူတို့ရွာမှာတော့ သားအဖြစ်ကို စာမတတ်ရှာဘူး နောက်မှ စာသင်ပေးရမယ်ဆိုတာထက် ပိုမခံစားမိချေ။ တစ်ခါတစ်ခါ တစ်ခုခုကို မြင်ရအောင် အတင်းကြိုးစားကြည့်နေရရှာတဲ့သားကို တွေ့လိုက်တိုင်းတော့ အေးဘုံရင်ထဲမှာ ဘယ်လိုမှ မရိုးသွားနိုင်တဲ့ အောင်ကျိန်းနာကျင်ခြင်းနဲ့အတူ သားအပေါ်မှာ ချစ်တဲ့ အချစ်တို့က အလျော့မရှိ အကျမရှိတဲ့ ဒီရေတစ်မျိုးလို တိုးရပြန်သည်။

(ဆ)

ဒီလိုနဲ့ပဲ သားခြောက်နှစ်ကျော်မှပင် သားမျက်စိကို ကျကျနနပြဖို့ ကုတ်ကုတ်ခြစ်ခြစ် စုထားတဲ့ ပိုက်ဆံလေး ကျစ်ကျစ်ပါအောင် ကိုင်ရင်း ပဲခူးတက်ကြရသည်။ ရွာမှာ တာဝန်ကျတဲ့ ဆရာမလေးကလည်း သူ့တပည့်တစ်ရက်ဖြစ်လိုက်တဲ့ သားကို ကရုဏာပိုရှာပါသည်။ ပဲခူးကို အဖော်လိုက်ပေး ဆေးရုံကို လိုက်ပို့ပေးနဲ့ အစစ အကူအညီပေး လုပ်ပေးရှာသည်။ အဲဒီတုန်းက ရွှေမောဓောဘုရားပွဲတော်မတိုင်ခင်ပေါ့။ အေးဘုံတွက်ထားတာက သားကို ဆေးခန်းပြ၊ ပြီးရင် ရွာသွား အမေ့ကို သတင်းကောင်းပါး၊ ပြီးမှ ဘုရားပွဲရက် အတူတူ ပြန်လာကြရင်း ရွာပြန်မည်ပေါ့။ သားလေးမျက်စိသာကောင်းသွားရင် အမေလည်း သားကို ပိုချစ်မည်၊ ခုအတိုင်းတော့ အမေက သားကို သိပ်မချစ်လှလို့ အေးဘုံထင်နေမိသည်။ ဒါပေမယ့် အေးဘုံစိတ်ကူးသလို ဖြစ်မလာခဲ့ပါ။ ဆရာဝန်မကြီးက အေးဘုံတို့ကို အဖော်လိုက်လာပေးတဲ့ ဆရာမလေးနဲ့ တော်တော်ကြာကြာစကားတွေ ပြောသည်။ အေးဘုံတို့ကိုလည်း ရှင်းပြပါသည်။ ဒါပေမယ့် သူတို့ ရှင်းပြတဲ့ ရှည်ရှည်လျားလျားတွေကို အေးဘုံတို့ လင်မယားက သိပ်တော့ နားမလည်။ ဒါပေမယ့် သူတို့ရဲ့ ကရုဏာသက်တဲ့ အကြည့်ကို အေးဘုံတို့ ခံစားမိပါသည်။ အေးဘုံနားလည်သလောက်ကတော့ ကောင်းနိုင်ခြေ မရှိဘူးဆိုပါတော့။ ခေါင်းထဲမှာ အကျိတ်လေးတွေ မွေးရာပါသည်ဆိုလား။ ဘာပဲဖြစ်ဖြစ် ဆိုလိုရင်းကတော့ သားလေးကံနည်းရှာသည်။ သူ့အကြောင်းပြောနေတဲ့လူတွေနားမှာ ကလေးသဘာဝ ဘာမှ မသိဘဲ မျက်လုံးလေး ကလည်ကလည် ဖြစ်နေတာကိုကြည့်ရင်း အေးဘုံ ရင်ထဲမချိ။

ဆေးရုံကထွက်လာကြတော့ ကိုစိန်ဝင်းကို အမေ့ရွာလိုက်ပို့ခိုင်းသည်။ အေးဘုံ အမေ့ကို ဖက်ငိုလိုက်ချင်တာပဲ သိသည်။ ကျန်တာတွေအကုန် ဝေဝေဝါး။ အေးဘုံ ဘာမှ မမှတ်မိချင်တော့။ ကိုစိန်ဝင်းကလည်း ရွာလိုက်ပို့ပြီး အမေ့ကိုတော့ တိုးတိုးနဲ့ ဘာတွေမှန်းမသိ ပြောပြီး ပြန်သွားသည်။ အေးဘုံအမေ့ကို ဖက်မငိုဖြစ်ခဲ့ပါ။ အမေ့အိမ်မှာပဲ သားနဲ့အတူ ကျန်နေရစ်ရင်း ကူရင်းနဲ့ပဲ စိတ်ပြေလက်ပျောက်နေနေမိတော့သည်။ လူကတော့ တငိုင်ငိုင် တတွေတွေ ဖြစ်နေသည် ထင်ပါသည်။ အမေက အေးဘုံကို အရိပ်လိုကြည့်နေရင်း ဗွီဒီယိုလေး ကားကောင်းရင် သူလည်း ကြိုက်တာမဟုတ်ဘဲ သွားကြည့်ရအောင် အဖော်စပ်တတ်သည်။ အေးဘုံအကြိုက် ချဉ်ပေါင်ခါးရွက်ကို ပုစွန်လေး ငရုတ်သီးလေးနဲ့ ကြော်ကျွေးရှာသည်။ ဘုရားပွဲရက်တွေ ရောက်ဖို့ သိပ်မလိုခင်မှာပဲ အေးဘုံ ညီမ အငယ်ဆုံး ရွှေလုံးက ဆွမ်းကျွေးအလှူလုပ်ပါသည်။ သူတို့ကလည်း အမေ့ခြံနဲ့ မျက်စောင်းထိုးခြံမှာပဲ နေတာမို့ ညီအမတတွေ ကူးချည်သန်းချည် ကူဟယ်ချက်ဟယ် လုပ်ရတာ ခရီးတော့ တွင်ပါသည်။

ရွှေလုံးတို့ ခြံနောက်ဖေးမှာ ကုက္ကိုပင်တွေက အရိပ်ကောင်းသည်မို့ အဲသည်နေရာမှာပဲ ခုံဝိုင်းတွေချ မီးဖိုတွေတည်ပြီး ချက်စရာရှိတာ ချက်ကြသည်။ အေးဘုံလည်း ကူရင်း ဝိုင်းလုပ်ရင်း ပန်းကန်ခွက်ယောက်တွေ လိုတာနဲ့ ရွာဦးကျောင်းက ငှားရအောင် ဝိုင်းစိန်နဲ့ နှစ်ယောက်သား တောင်းတစ်တောင်းစီ ရွက်ပြီး ခြံနောက်ဘေး လှည်းလမ်းအတိုင်း ထွက်ခဲ့ကြသည်။ သားလေးကလည်း မအေမျက်နှာမကောင်းလို့လား မသိ။ အေးဘုံအနားကမခွာ။ မွန်းက တိမ်းကာစသာ ရှိသေးသည်မို့ လှည်းလမ်းချောင်တစ်လျှောက် ဖုန်တွေကပူပူ။ ဘုန်းကြီးကျောင်းမှာ ဘုန်းဘုန်းဆီက လိုတဲ့ပန်းကန်ခွက်ယောက်တွေ ငှားပြီး တောင်းနဲ့ရွက်ကာ  ညီအမ နှစ်ယောက်သား လှည်းလမ်းအတိုင်းပဲ သုတ်သုတ်လျှောက်လာခဲ့ကြသည်။ ကြီးကြီးမားမား အိုးတွေ ဘာတွေကတော့ ယောက်ျားလေးတွေ လွှတ်ရမည်။ နေပူချည်းထဲ မအေလက်ကို ကိုင်ပြီး တကောက်ကောက်လိုက်လာတဲ့သားကို ဖျားမှာနာမှာလည်း စိတ်ပူရသေးသည်။ နေပူကြီးထဲမို့ မလိုက်စေ့ချင်ပေမယ့် သူ့ ညီအကိုမောင်နှမ ဝမ်းကွဲတွေနဲ့လည်း သိပ်မရင်းနှီးတဲ့သားလေးကို အတင်းလည်း မချန်ရစ်ချင်။ ကလေးဆိုတော့ မအေအနားကပ်နေရရင် ဝမ်းနည်းရမှန်း ပူပင်ရမှန်းမသိ။ သားလေး ပျော်နေလို့လည်း အေးဘုံ နေသာတာ။ မဟုတ်ရင် ပိုတောင်ဆိုးဦးမည်။ ဒါတောင် အေးဘုံ မရွှင်နိုင် မပျနိုင်ဖြစ်တာက သိသာသည် ထင်ပါသည်။ တတွတ်တွတ် စကားများလှတဲ့ ဝိုင်းစိန်တောင် အေးဘုံကို ဘာမှ သိပ်မပြော။ နေပူပူမှာ လှည်းလမ်းအတိုင်း ညီအမ နှစ်ယောက်သား သုတ်သုတ်ပဲ လျှောက်နေကြသည်။

ဒီလိုနဲ့ ရွှေလုံးတို့ ခြံထဲကို နောက်ဖေးခြံပေါက်ကနေ သုံးယောက်သား တိတ်တိတ်ဆိတ်ဆိတ်ပဲ လျှောက်ဝင်လာလိုက်ကြသည်။ အမြဲ စကားကျယ်ကျယ် ပြောတတ်တဲ့ အမေနဲ့ ဒေါ်ဒေါ်သော့တို့ ညီအမ စကားပြောနေကြတာကို ခပ်လှမ်းလှမ်းကတည်းက ကြားရပါသည်။ အမေကတော့ အေးဘုံတို့ လာရာဘက်ကို ကျောပေးရင်း ဆောင့်ကြောင့်ထိုင်ကာ တည်လက်စ မီးဖိုကို မီးထိုးနေသည်။ ဒေါ်ဒေါ်သော့၊ ဒေါ်ဒေါ်ကျော့နဲ့ ရွာတောင်ပိုင်းက မနီမတို့က စားပွဲဝိုင်းခုံပုမှာ ကြက်သွန်တွေ ခွာနေ လှီးနေကြသည်။

‘ညည်းသမီးတွေကတော့ အကုန် ကံကောင်းပါ့ စောညွန့်ရယ်။ ဝိုင်းစိန်ဆိုလည်း ယောက်ျားက ပိုက်ဆံအရှာကောင်း။ ဘုတ်ဆုံဆိုလည်း ယောက်ျားများ နိုင်ထားလိုက်တာ။’

ဒေါ်ဒေါ်သော့စကားကို စကားနည်းတဲ့ မနီမက ခေါင်းတဆတ်ဆတ်ညိမ့်သည်။ ဒေါ်ဒေါ်ကျော့ကတော့

‘ငါထင်ထားတာက ဒီ မိရွှေလုံးတော့ ကံဆိုးပြီလို့အေ။ ရုပ်ကလေးကြည့်ပြီး ကစော်သမားကို ရွေးတာကိုးအေ့။ ဖအေမအေကတော့ ပိုက်ဆံရှိပါရဲ့။ ဒီသားတစ်ယောက်တော့ မဆုံးမတဲ့ အပြင် သူတို့ကိုယ်တိုင်က မြှောက်မြှောက်ပေးနေတော့ ညည်းသမီးတော့ လင်ဆိုးမယား ဖြစ်ပြီပေါ့လို့အေ။ သူကိုယ်တိုင်ကလည်း အငယ်ဆုံးဆိုတော့ ဖရိုဖရဲ မဟုတ်လား။ ယောက်ျားလည်း ဆုံးမနိုင်မယ့်သူ မဟုတ်ပါဘူးဆိုပြီး။ ကံများကောင်းချင်တော့ စိုးနိုင်ဆိုတဲ့ကောင်လေးက မိန်းမလည်း ရပြီးရော အချိုးပြောင်းသွားလိုက်တာများအေ။’

အမေကတော့ မီးဖိုကိုပဲ အာရုံစိုက်နေပုံပင်။ ဘာမှကို ပြန်မပြော။

‘ကံတရားတွေပေါ့အေရယ်’

ကျောခိုင်းထားတာမို့ လှမ်းလည်း နည်းနည်း လှမ်းနေသေးတာမို့ အမေ့မျက်နှာကို မမြင်ရပေမယ့် အမေ့မျက်နှာမကောင်းလို့ ထင်ပါရဲ့။ ဒေါ်ဒေါ်သော့လေသံက လေပြေထိုးသံလိုပင်။ ဒါပေမယ့် ဒေါ်ဒေါ်သော့ စကားမှ မဆုံးခင် အမေ့ရဲ့ ဘုဆတ်ဆတ်အသံက ခပ်ကျယ်ကျယ်ထွက်လာသည်။

‘လုပ်စရာရှိတာလုပ်ကြပါကောင်မတွေရယ်။ ညည်းတို့ အဲဒါတွေပြောရင် ငါ အေးဘုံအကြောင်းကို ပို စဉ်းစားမိပြီး ရင်နာလွန်းလို့ပါ။ ငါ့သမီးတွေ ကံကောင်းကြတယ်ဆိုတာ သင်းတော့ မပါပါဘူးအေရယ်။ ရလိုက်တဲ့ ယောက်ျားက သောက်ကျိုး။ ရလာတဲ့ ကလေးကျတော့လည်း ခု သောက်ကန်းဖြစ်မှာတော်ရေ့။’

အမေ့စကားအဆုံးမှာ အမေ့ရဲ့ နောက် ခြေ လေးငါးလှမ်းစာ အကွာကို ရောက်နေပြီဖြစ်တဲ့အေးဘုံ ခြေစုံရပ် ငေးကြောင်နေမိသည်။ အမေရဲ့ ရင်နာနာ ရေရွတ်သံက အေးဘုံကို ပိုရင်နာစေသည်။ ပြီးတော့ သားလေး။ အေးဘုံရဲ့ လက်ကို ပိုပြီးတင်းတင်းဆုပ်ကိုင်လိုက်တဲ့ သားလေး။ ဒီစကားကို အတိုင်းအတာ တစ်ခုအထိတော့ နားလည်သည်ထင်ပါရဲ့။ အေးဘုံရဲ့ လက်ကို သူ့လက်သေးသေးလေးတွေနဲ့ ကျစ်ကျစ်ပါအောင်ဆုပ်ထားရင် မောကြည့်နေတဲ့ မျက်လုံးတွေ။ ‘ကျွန်တော်က စိတ်ပျက်စရာကောင်းသလား။ ကျွန်တော့်ကို စိတ်ပျက်လားအမေ။ မလိုချင်ဘူးလားအမေရယ်’ လို့ မေးနေတယ်လို့ အေးဘုံ ထင်မိတဲ့ ပေကလက် ပေကလက် မျက်လုံးမွဲမွဲလေးတွေ။ အေးဘုံရင်ထဲ မချိလိုက်တာ အမေရယ်။

ကုန်းရုန်း လှီးချွတ်နေကြတဲ့ ဒေါ်ဒေါ်သော့တို့ တစ်သိုက်ကလည်း ခေါင်းထောင်မှ အေးဘုံတို့ကို တွေ့သလို ကြောင်အမ်းနေသည်။ ဝိုင်းစိန်က သူ့ခေါင်းပေါ်ကတောင်းကို ကသုတ်ကရက် မနိုင်မနင်း ဇွတ်ချလိုက်သည်မို့ ပန်းကန်ချင်းရိုက်သံတွေ မြည်သွားသည်။ ‘အမေတို့ကလည်း စကားချည်း များနေလို့ နေမှာပေါ့။ ဘာမှလည်း မပြီးကြသေးဘူး။’ အသံကျယ်ကျယ်နဲ့ တောင်အော်မြောက်အော် အော်ရင် အေးဘုံခေါင်းပေါ်က တောင်းကို လာဆွဲယူချသည်။ အေးဘုံကတော့ ကြောင်ငေးနေတုန်း။

အမေက နောက်ပြန်လှည့်ပြီး အေးဘုံကို ခပ်ငိုင်ငိုင်ကြည့်ပေမယ့် ဘာမှတော့ မူမပျက်။ မှန်တယ်ထင်လို့ သူပြောချင်လွန်းတာတစ်ခုခုကို ဖွင့်ပြောချလိုက်ရသူတစ်ယောက် ပြောချလိုက်အပြီးမှာမှ လူမိသလိုမျိုး။

‘ညည်းတို့ မနက်ကတည်းက ဘာမှ မယ်မယ်ရရ မစားရသေးဘူးမဟုတ်လား။ အိမ်ပေါ်သွားစားကြချေ။ ရွှေလုံး ခုနက ညည်းတို့ကို ထမင်းကျွေးမလို့ လာရှာနေတယ်။’

အမေက မူမပျက် ခပ်အေးအေးပြောနေပေမယ့် အေးဘုံ ခဏတော့ မလှုပ်။ ဘေးကို ငဲ့စောင်းကြည့်လိုက်တော့ သားလေးရဲ့ ငိုမဲ့မဲ့မျက်နှာ။ အေးဘုံ သားလက်ကို မြဲမြဲကိုင်ရင်း အမေ့အိမ်ဘက်ကိုပဲ ထွက်လာခဲ့ပြီး ပါလာတဲ့ အဝတ်အစားလေးတွေ ကောက်ထည့်နေမိသည်။ နောက်ဘယ်လိုက ဘယ်လို ဖြစ်သည်ဆိုတာတွေ အစီအစဉ်ကျကျ အေးဘုံ မမှတ်မိတော့။ ရွာထဲက လှည်းတစ်စီး ပဲခူးသွား ဈေးဝယ်မယ်ဆိုတော့ အေးဘုံနဲ့သား လှည်းကြုံလိုက်ဖို့ နေပူပူထဲက လှည်းပေါ်မှာ။ ဘယ်သူက ပြောလိုက်သည်မသိ။ လှည်းဆင်ပြီးလို့ လူတွေတက်ထိုင်ပြီး ထွက်ခါနီးမှာမှ  အမေသုတ်သုတ်နဲ့ ပေါက်ချလာတော့ လှည်းသမားက နွားဇက်ကြိုးတင်းကာ စောင့်နေပေးရသည်။

‘အေးဘုံ။ ညည်း အရူးလားအေ။ ကိုယ့်ညီမ အလှူရှိတာကို။ ဒါက ဘာဖြစ်တာတုန်း။ ကောက်ခါ ငင်ခါ။’

အေးဘုံကတော့ အမေ့ကို ဘာမှ ပြန်မပြောမိပဲ ရင်နာနာ ငေးကြည့်နေမိပါသည်။ သားလေးကလည်း အေးဘုံကို ပျောက်သွားမှာစိုးသလို မော့ကြည့်နေတာ အေးဘုံသိနေသည်။

‘သားအမိချင်းအေ။ ညည်းက ဒါကို စိတ်ဆိုးသလား ကောင်မရဲ့။’

တစ်ချိန်လုံး တိတ်နေမိတဲ့ အေးဘုံ ‘ဆိုးတယ် အမေ’ ဆိုတာကိုတော့ ငိုသံ ပလုံးပထွေးနဲ့ ပြန်ပြောခဲ့သေးသည်။ လှည်းကလည်း စထွက်ပြီ။ အေးဘုံကြည့်ရတာလည်း ပြောရမယ့် ပုံမပေါ်တော့ အမေက ‘ဘုရားပွဲရက်မှ တွေ့မယ်အေ။ အဲဒီရက်တော့ ပဲခူးကို ညည်းတို့ လာခဲ့ဦး။ စိန်ဝင်းကိုလည်း ဘုရားပွဲလာခိုင်း။ ကုန်းရုန်းပြီး အလုပ်ချည်းပဲ လုပ်မနေကြနဲ့။ လူတွေလည်း လူရုပ်မပေါ်တော့ဘူး။’

ပြောပြောပြီးချင်းပဲ အမေ့လှည့်ထွက်သွားသည်။ လမ်းလျှောက်သွားရင်း ခေါင်းပေါ်ဆောင်းလာတဲ့ သဘက်ကို ဖြုတ်လို့ မျက်နှာကို သုတ်ကာ ခပ်သုတ်သုတ်ထွက်သွားတဲ့ အမေ့ကို အေးဘုံ ငေးကြည့်နေမိသည်။ အမေမျက်ရည်သုတ်နေသလား။ အမေငိုနေသလား။ အမေ့မျက်လုံးတွေ နီနေသလိုပဲ။ အေးဘုံကတော့ တစ်ချိန်လုံး အောင့်ထားခဲ့ရသည်မို့ ရွာနဲ့ လှမ်းလှမ်းရောက်ခါမှ နေပူကြီးထဲကရွာကို နောက်ပြန်လှည့်ကြည့်ရင်း နောက်ဘယ်တော့မှ ပြန်မရောက်တော့မှာလို ဝမ်းနည်းလာမိပြီး ရှိုက်ရှိုက်ငိုမိတော့သည်။

(ဇ)

ကမာဘာပြန်ရောက်တော့ ကိုစိန်ဝင်းကို အေးဘုံ ဘာမှ ပြန်မပြော။ အေးဘုံ မျက်နှာမကောင်းတာကို သိပေမယ့် ကိုစိန်ဝင်းကလည်း ဘာမှမမေး။ ဘုရားပွဲပြီးမှ ပြန်လာမယ်ပြောပြီး စောပြန်လာတယ်ဆိုတော့ သားကိစ္စနဲ့ပတ်သက်ပြီး စိတ်ပြေလက်ပျောက်မဖြစ်တာနဲ့ပဲ ပြန်လာလေသလား ထင်ပုံရသည်။ ကိုစိန်ဝင်းနဲ့ အိမ်ထောင်ကျခဲ့တာကို အေးဘုံ တစ်ခါမှ နောင်တမရဖူးချေ။ သူ့ခမျာ ကိုယ့်မျက်နှာ အရိပ်လို ကြည့်နေတတ်သူ၊ ဘယ်ကိစ္စမှာပဲဖြစ်ဖြစ် ကိုယ့်သဘော၊ အနွံအတာခံစရာရှိ သူပဲ အနွံအတာခံသည်။ အသောက်အစား မရှိ။ အလောင်းအစား မရှိ။ သူ့ခြေထောက်မသန်တာကတော့ အေးဘုံအဖို့ အသနားပိုမိတာသာရှိသည်။

သားကို ပိုင်ဆိုင်လိုက်ရတဲ့ ဘဝကိုတော့ အေးဘုံက ဘာနဲ့မှ မလဲနိုင်ပါ။ ဒီသားသာ အေးဘုံဘဝ အေးဘုံအသက်လို ခံစားရသည်မို့ ဒီသားမရှိခင် အေးဘုံ ဘယ်လို အသက်ရှင်ခဲ့သလဲဆိုတာ တစ်ခါတစ်ခါ စဉ်းစားလို့ပင်မတတ်ချေ။

ဒါပေမယ့် အေးဘုံ အမေ့ကို နားလည်ပါသည်။ စိတ်ဆိုးမိတာက တစ်ပိုင်းပေါ့လေ။ သားအချစ် မြေးအနှစ်တဲ့။ သားသမီးကို ချစ်တာထက် မြေးကိုဆို (ပိုအချစ်လွန်တတ်ကြတော့ ချစ်တာတောင်မကဘဲ နှစ်ရာပင်ရောက်အောင်) ပိုတိုးလို့ချစ်ကြသည်လို့ ဆိုလိုတဲ့ လူကြီးသူမ ပြောစကား အေးဘုံ ကြားဖူးပါသည်။ အမေကတော့ သမီးဖြစ်တဲ့ အေးဘုံကို ချစ်လွန်းတော့ ရှေးထုံးစကားပုံကို ပယ်လို့ သူ့မြေးသူ ချစ်တောင် မချစ်နိုင်တော့ဘူးထင်ပါရဲ့။ အခုတော့ အမေ့နှုတ်ထွက်စကားက အေးဘုံအသည်းကို သံရည်ပူလောင်သလို ဖြစ်ခဲ့ပြီ။

ဘုရားပွဲလည်း အေးဘုံမသွား။ ကိုစိန်ဝင်းက ‘ဘုရားပွဲ မသွားဘူးလားဟ’ ပဲမေးပြီး မသွားဘူးဆိုတော့လည်း ခပ်မဆိတ်သာနေသည်။ မိုးကျလာတော့ ပဲခူးတစ်ခေါက်တက်ရင်း အမေ့ရွာဘက်အထိသွားပြီး အကျိုးအကြောင်း ကြားလာခဲ့ပုံရသည်။ အေးဘုံကို မိဘနဲ့ သားသမီးဆိုတာ ဒီလိုပေါ့ဟာ ဘာညာနဲ့ တတ်သလောက် မှတ်သလောက် ရွှေပြည်အေးတရားဟောနေသေးသည်။ အေးဘုံကတော့ ဘာမှ ပြန်မပြော။ ဒီကိစ္စနဲ့ ပတ်သက်ပြီး တစ်ခုခု ပြန်ပြောဖို့ အေးဘုံ အရန်သင့် ဖြစ်မနေသေး။

ကိုစိန်ဝင်းက ဒီကိစ္စကို ဆောင်းပါးရိပ်ခြည် မကြာမကြာ လေပြည်ထိုးပေမယ့် အေးဘုံ မလှုပ်တော့လည်း နောက်တော့ သူပါ မေ့မေ့လျော့လျော့နေလာတော့သည်။

(စ်)

အေးဘုံ အစကတော့ ရွာမသွားဘဲ အကြာကြီးနေလိုက်မယ်ဆိုတာမျိုး စိတ်ကူးမရှိပါ။ အမေ့ကို စိတ်ခုပေမယ့်လည်း အမေဘာလို့ ဒီကိစ္စကို ဒီလောက်ခံစားရသလဲဆိုတာ အေးဘုံသိပါသည်။ ဒါပေမယ့် အေးဘုံ အမေ့ရွာကို မသွားချင်သေး။ အမေနဲ့ မတွေ့ချင်သေး။ တကယ့်ကို ဖင်လှည့်ခေါင်းလှည့်နှင့်ပင် တစ်နှစ်ပြီးတစ်နှစ်ကုန်သွားခဲ့တာပင်။

ပထမတော့ ကိုစိန်ဝင်းက တိုက်တွန်းသေးသည်။ သူလည်း အမေ့ရွာကို သွားပြီး အမေ့ကို သွားခေါ်သေးသည် ထင်သည်။ အမေကလည်း သူ့ခံစားချက်နဲ့သူ ရှိပေလိမ့်မည်။ မလိုက်လာ။ အေးဘုံကို စိတ်ဆိုးလို့ အမေလိုက်မလာတာ ဒါမှမဟုတ် မာန်မာနခံနေလို့လိုက်မလာတာ မဟုတ်မှန်းအေးဘုံသိသည်။ မအေလေ။ မအေဆိုတာ သားသမီးကို မာနဒီလောက် ထားပါ့မလား။ ဒါပေမယ့် အမေစိတ်တော့ ကောင်းမှာ မဟုတ်တာကိုလည်း အေးဘုံသိပါသည်။ သိတာက သိတာတခြား။ ရွာကို ပြန်မလည်ချင်တာ အမေနဲ့ တွေ့ဖို့ အဆင်သင့် မဖြစ်သေးတာက တခြားပင်။

ကြာလာတော့ ကိုစိန်ဝင်းလည်း ဘာမှ သိပ်မပြောတော့။ တစ်နှစ်တော့ ဝိုင်းစိန်နဲ့ ရွှေလုံးလာကြသေးသည်။ ဘုတ်ဆုံကတော့ အေးဘုံကို စိတ်ဆိုးနေသတဲ့။ အမေချစ်တာကို သိသိရက်နဲ့ ဒီလိုလုပ်ရမလားပေါ့လေ။ သူတို့က ညည်း လာခဲ့ဦးဆိုတော့ အေးဘုံကလည်း ငါလာခဲ့ပါဦးမယ်ပြောပြီး သူတို့လည်းပြန် အေးဘုံကလည်း နေ့ရွှေ့ ညရွှေ့ထပ်ရွှေ့။ ရုန်းဟယ် ကန်ဟယ်နဲ့ပဲ နှစ်တစ်ပတ်ကလည်သွားပြန်ပါရော။ အေးဘုံ အမေ့ကို ကြောက်သွားတာ ထင်ပါရဲ့။

ရွှေမောဓောဘုရားပွဲလည်း မရောက်ဖြစ်တော့။ နောက်နှစ်တွေမှာ အေးဘုံတို့မိသားစု ပဲခူးချောင်းဖျား ရိုးမတောထဲမှာ တစ်နွေလုံး မီးသွေးဖုတ်တဲ့ အလုပ် စလုပ်ဖြစ်ကြတော့ ပိုဆိုးတော့သည်။ မိုးကျမှ ရွာပြန်နား။ လယ်လေး ချောင်းလေးလုပ်။ ဆောင်းပေါက်ပြီဆို ကိုစိန်ဝင်းက ချောင်းဖျားသွား အလုပ်လုပ်။ အေးဘုံက စာရင်းငှားတွေနဲ့ ဆောင်းသီးနှံ ပဲတို့ မြေပဲတို့စိုက်ရင်း ချောင်းဖျားနဲ့ ကမာဘာ ကူးချည်သန်းချည်။ ပိုက်ဆံကတော့ တကယ်စုဖြစ်ကြသည်။ သားလေးမျက်စိကလည်း တကယ်ပိုဆိုးလာတော့သည်။ ဘယ်ရွေ့ ဘယ်မျှပိုက်ဆံနဲ့ ဘယ်လို စက်ကုရင် သားလေးပြန်ကောင်းလာမှာလဲ။ ဘယ်လိုလုပ်ရင် ရမလဲ။ ဒီအတွေးတွေနဲ့ပဲ အေးဘုံ ညည အိပ်မပျော်။ မတွေ့ရတာ ကြာတဲ့ အမေ့ကိုလည်း တကယ်သတိရမိသည်။ အေးဘုံ အိပ်မက်ထဲမှာတော့ သားလေးမျက်စိပြန်ကောင်းပြီး ရွာကို သွားလည်တော့ အမေက အေးဘုံတို့ သားအမိကို ဆီးကြိုဖက်ငိုတာ လိုက်တာ။ အဲသလို အိပ်မက်ကနေ နိုးလာတဲ့ မနက်ခင်းတွေဆိုရင်တော့ အေးဘုံ ရွှင်ရွှင်ပျပျရှိတတ်သည်။

(ည)

ကိုးနှစ်ဆယ်နှစ်ဆိုတဲ့ ကာလဟာ အဲသလောက်မြန်မြန်ကုန်သွားမယ်လို့ အေးဘုံ မထင်ခဲ့မိ။ ခုတော့ ဆယ်နှစ်တောင်ကျော်ခဲ့ပြီ။ ကိုယ့်အတွေးနဲ့ ကိုယ်၊ ကိုယ့်ဇောနဲ့ကိုယ် အလုပ်ရှုပ်နေတဲ့ နေ့တွေလိုပေါ့လေ။ သတိရလို့ ကြည့်မိမှပဲ နေတောင်ညိုပြီဆိုတာမျိုး။ အမေ့နဲ့ မတွေ့ဖြစ်ကြတဲ့ ဆယ်နှစ်ကို အမေရော ဘယ်လို ဖြတ်သန်းခဲ့ပါလိမ့်။ အမေ ကျန်းမာရေးတော့ ကောင်းမှာပါ။ တစ်ခုခုဆို ဝိုင်းစိန်တို့ အေးဘုံကို လာမပြောဘဲတော့ နေမှာမဟုတ်။ သူတို့တွေရော နေမှ ကောင်းကြရဲ့လား။ ပြီးခဲ့တဲ့ တစ်နှစ်ခြားကတော့ ရွှေလုံးနဲ့ ပဲခူးဈေးထဲ တွေ့ကြသေးသည်။ ရွှေလုံးသားလေးတောင် တော်တော်ကြီးနေပြီ။ ပြီးတော့ ကလေးလေးက အမေနဲ့ တူလိုက်တာ။

သြော် နောက်ဆုံးတော့ အေးဘုံ အမေနဲ့ ပြန်တွေ့ဖို့ လာခဲ့ပြီပေါ့လေ။ ကမာဘာကလူတွေကိုပဲ အဖော်လုပ်ပြီး ရွှေမောဓောဘုရားပွဲကို အေးဘုံ တစ်ယောက်တည်း လာခဲ့ရသည်။ သူတို့တည်းမယ့်ဘုန်းကြီးကျောင်းကလည်း ဘုရားနားတင်ဆိုတော့ အခန့်သင့်ပါသည်။ လပြည့်နေ ဆွမ်းကြီးလောင်းပွဲကျမှ ဘုရားပေါ်မှာ ရွာကလူတစ်ယောက်ယောက်တွေ့ရင် ရပြီ။ ကိုယ့်ရွာသားတွေ ဘယ်နားမှာလဲ သိရရင် အမေ့ကို ရှာလို့ ရပါပြီ။ အမေ အေးဘုံကို ဘာတွေပြောမလဲ။ အေးဘုံကတော့ အမေ့ကို ပြောစရာ စကားတစ်ခွန်းကို စိတ်ထဲ အခါခါ စီနေမိသည်။ ဘုတ်ဆုံကတော့ အေးဘုံကို မဲ့ရွဲ့လို့ ‘ခလုတ်ထိမှ ညည်း အမိတ တာပေါ့အေ’ လို့ ပြောမှာမလွဲ။ အေးဘုံကလည်း မငြင်းပါဘူး။

ဒီလိုနဲ့ပဲ အေးဘုံ အစောင့်ကြီးစောင့်လိုက်ရတဲ့ တန်ခူးလပြည့်နေ့ကို ရောက်လို့ ဆွမ်းကြီးလောင်းပွဲ စခါနီးပြီ။ လောင်းမယ့် လှူမယ့်သူတွေ နေရာတွေ ယူပြီးကြပြီ။ အေးဘုံ လူတွေကြားထဲ ဟိုပြေးဒီလွှားနဲ့ အမေ့ကို ရှာသည်။ အေးဘုံဝတ်ထားတာက တစ်နှစ် အမေ့ကို ဘုတ်ဆုံတို့က ကန်တော့တဲ့ ပါတိတ်ထမီပြာပြာ အပွင့်စိတ်စိတ်။ အမေက ‘အဆင်က နုလွန်းတယ်။ ဝတ်ရဲပါဘူးအေ’ ဆိုပြီး အေးဘုံကို ပေးလိုက်တာ။ အဲဒါကိုမှ အမေ့အကြိုက် နံ့သာရောင် လက်စက အင်္ကျီနဲ့။ သတိတရနဲ့ကို ဝတ်လာခဲ့တာလေ။

လူတွေက များတော့ အေးဘုံခေါင်းတွေတောင် နောက်လာသည်။ ရွာကလူလည်း ဘယ်သူမှ မတွေ့သေး။ အမေကတော့ ထုံးစံမပျက်လာကို လာမှာပါ။ အေးဘုံ မမှတ်မိလောက်အောင်တော့ အမေ အိုစာ မသွားလောက် သေးပါဘူး။

ဟော တွေ့ပါပြီ။ နောက်နား ခပ်စောင်းစောင်း ခပ်လှမ်းလှမ်းကကြည့်တာတောင် အမေ တော်တော် အရွယ်ကျသွားတာပဲ။ ဆွမ်းကြီးလောင်းဖို့ တန်းစီရပ်နေတဲ့ လူတွေထဲမှာ။ ထုံးစံအတိုင်း သဘက်အညိုလေး ခေါင်းပေါ်တင်လို့။ လက်ထဲမှာ ပိုက်ဆံအရွက်သေးတွေထည့်ထားတာထင်ရတဲ့ စတီးလင်ဗန်းတစ်ချပ်နဲ့။ ဘေးနားကသူတွေကလည်း အသက်ကြီးကြီး အမျိုးသမီးတွေပေမယ့် သူတို့ကို အေးဘုံမသိ။ ဘယ်သူမှ အဖော်မပါဘူးထင်ပါရဲ။ အမေ့နောက်နား လက်တစ်ကမ်းအကွာကနေပဲ အမေ့ကို အေးဘုံ ငေးကြည့်နေမိပြီး ဘာဆက်လုပ်ရမှန်းမသိ။ အမေ့ဘေးနားက အမျိုးသမီးကြီးတွေကတောင် သတိထားမိပြီး အေးဘုံကို ကွက်ကြည့်ကွက်ကြည့်လုပ်နေကြသည်။ အမျိုးသမီးကြီးတစ်ယောက်က ‘ကလေးမ။ ဆွမ်းကြီးလောင်းမလို့လား။ ဒီကြားထဲပဲလာလိုက်။ လာ လာ။’

အမျိုးသမီးကြီး စကားအဆုံးမှာ အမေကလည်း အမှုမဲ အမှတ်မဲ့ ပုံစံမျိုး ငဲ့ကြည့်သည်။ ပြီးတော့ ချက်ချင်း ပြန်လှည့်သွားသည်။ အမေ အေးဘုံကို တွေ့ရက်နဲ့ စိတ်ဆိုးမပြေနိုင်သေးဘူး ထင်ပါရဲ့။ အေးဘုံ အတွေးမှ မဆုံးခင် အမေခန္ဓာကိုယ် ဆတ်ခနဲ ဖြစ်သွားတာ အေးဘုံသတိထားလိုက်မိသည်။ အမေက အေးဘုံရှိရာဘက်ကို နောက်တစ်ခါ ပြန်လှည့်ကြည့်သည်။ ပြီးတော့ မျက်မှောင်က အားရပါးရ ကျုံ့ပြီး စိုက်ကြည့်သည်။ ပြီးတော့ ‘အေးဘုံ။ အေးဘုံ။ ညည်းအေးဘုံမဟုတ်လား။’

တန်ခူးလ နွေခေါင်ခေါင် နေ့လည်ကြီးကို ချက်ချင်း ညို့မှောင်အေးစိမ့်သွားသလိုပင်။ မိုးရွာမလို့ ထင်ပါရဲ့။ အေးဘုံရင်ထဲ လှပ်ခနဲ။ အမေ။

အေးဘုံရှိရာ အမေက ခပ်ဖြည်းဖြည်း လျှောက်လာရင်း ဘေးဘီကို ကြည့်သည်။ ‘ဟဲ့။ ညည်းတစ်ယောက်တည်းလား။ စိန်ဝင်းတို့ရော။’

သြော် အမေက သားကိုတောင်မမေး။ အေးဘုံ စိတ်ထဲ အခါခါစီထားခဲ့တာမို့ အေးဘုံ ပြောစရာစကားတွေက အစီအစဉ်တကျပဲ အေးစက်စက်ထွက်လာခဲ့သည်။

‘ပြီးခဲ့တဲလက ချောင်းဖျားမှာ မီသွေးဖိုပြိုလို့ အမေ့သားမက်ရော အမေ့မြေးရော ဆုံးပြီအမေရဲ့။’

အမေက အေးဘုံကို ငေးကြောင်ကြည့်နေသည်။ ဘာမှ မပြော။ တကယ်တော့ ပတ်ဝန်းကျင်ကြီး တစ်ခုလုံးကိုက တိတ်ဆိတ်သွားတာပါ။ အဲလို တိတ်ဆိတ်နေပြီးမှ အမေ့ရဲ့ဆို့ဆို့နင့်နင့် အသံကို အေးဘုံ နားကလား နှလုံးသားကလားမသိ အကျယ်ကြီးကြားလိုက်ရသည်။

‘အေးဘုံ။ ညည်း။ ညည်းအေ။ ကိုယ့်အမေကို ဒီလောက် စိတ်မှတ်ကြီးရသလား။ ဒီလောက်တောင် စိတ်နာရသလား သမီးရယ်။’

အဆုံသတ်မှာ အမေ့အသံက အဖျားခတ်တုန်ယင်သွားသည်။ မဟုတ်ဘူး အမေ။ အေးဘုံ အမေ့ကို စိတ်မနာဘူး။ အတေးအမှတ်လည်း မရှိပါဘူးအမေရယ်။ တကယ်တော့ အေးဘုံ၊ အေးဘုံ။ အေးဘုံ ရင်ထဲမှာ အော်နေပေမယ့် အသံကထွက်မလာ။ အေးဘုံအမြင်တွေ မျက်ရည်တွေကြောင့် ဝေဝါးမသွားခင် အမေ့မျက်လုံးထဲက မျက်ရည်တွေကို အေးဘုံ မြင်ဖြစ်အောင် မြင်လိုက်သည်။ အေးဘုံဆီ ကမ်းလိုက်တဲ့ အမေ့လက်တွေ။ အေးဘုံလည်း အမေ့ဆီလက်ကမ်းလိုက်သည်။ ဒါပေမယ့် အမေ့လက်ကို အေဘုံမမိလိုက် မမီလိုက်။ ရွှေမောဓော ဘုရားနောက်က ကောင်းကင်ကြီး အေးဘုံနဲ့ ပိုဝေးသွားသည်။ အေးဘုံကို မြေမျိုပြီထင်ပါရဲ့ အမေရယ်။

(ဋ)

ဗြုန်းစားကြီး မှောင်မကျသွားခင်မှာ အေးဘုံလက်ကို အမေ ဆုပ်ကိုင်လိုက်တာ အေးဘုံသိသည်။ ပြီးတော့ အေးဘုံကပဲ အမေ့ဆီလဲကျသလား၊ အမေကပဲ အေးဘုံရှိရာ လဲကျသလားမသိ။ အေးဘုံရင်ခွင်ထဲမှာ အမေ၊ အမေ့ရင်ခွင်ထဲမှာ အေးဘုံ ရောက်တာလဲ သိလိုက်သည်။ အမေ့လက်တွေကပဲ အေးစက်နေတာလား အေးဘုံလက်တွေကပဲ အေးစက်နေတာလားတော့မသိ။ အေးစက်စက် အတွေ့ကိုလည်း အေးဘုံသိလိုက်သည်။

အမှောင်က ပိုသိပ်သည်းသွားသည်။ ဒါပေမယ့် ထူးဆန်းစွာပင် အမေ့ကို အေးဘုံ မြင်နေရသည်။ ဒီတစ်ခါ မြင်လိုက်ရတဲ့ အမေကတော့ ခုနကတွေ့လိုက်တဲ့ အမေ့လို အိုစာမနေ။ ဟိုးအေးဘုံတို့ ငယ်ငယ်ကလို တောက်တောက်ပပ တက်တက်ကြွကြွအပြုံးတွေနဲ့။

ပြီးတော့ မတွေ့တာ ဘာမှ မကြာသေးတဲ့ သမီးတစ်ယောက် အိမ်ရောက်လာသလိုပဲ အေးဘုံကို ပြုံးပြုံးကြီး ကြိုနေသည်။ ‘ညည်းအေ။ နေနိုင်လိုက်တာ’ လို့တော့ အပြုံးမပျက်ပြောသေးသည်။ အေးဘုံကလည်း တစ်လနှစ်လလောက် အိမ်မပြန်ဖြစ်တဲ့သမီးတစ်ယောက်လို ‘အလုပ်တွေ များနေလို့ပါအမေရဲ့။ ကျွန်မလည်း အမေ့ သတိရနေတာပါ’။ အမေက ဘာမှ ဆက်မပြောတော့ပဲ ပြုံးကြည့်နေသည်။ အမေ့ရင်ထဲ့မှာ ဘာတွေ ပြောနေမလဲ အေးဘုံ သိချင်လှသည်။ ဒါပေမယ့် မကြားရ။ အေးဘုံရင်ထဲ တတွတ်တွတ်ရွတ်နေတဲ့ စကားသံတွေကြောင့်ပဲ အမေ့ရင်ထဲက စကားသံတွေကို မကြားရ။ အေးဘုံရင်ထဲမှာ အခါခါ ရေရွတ်နေမိတာကတော့ ‘အေးဘုံ ထင်သားပဲအမေရယ်။ ဒီလိုမှန်းသိရင် အစောကြီးကတည်းက အေးဘုံ အမေ့ဆီလာခဲ့ပါတယ်။ အမေလည်း သိနေမှာပါ’။

အမေ့ကို အားရပါးရ အေးဘုံ ဖက်ထားလိုက်သည်။ အမေကလည်း အေးဘုံကို အားရပါးရ ပြန်ဖက်ထားသည်။ နောက်ဆုံးတော့ အေးဘုံနဲ့ အမေ ပြန်ဆုံဖြစ်လိုက်ကြပါသေးသည်။